Pramāṇa · Search · About · API

Taittirīya Āraṇyaka 5.5

Taittirīyāraṇyaka 5.5

Language
Sanskrit

5.5.1

agníṣ ṭvā vásubhiḥ purástād rocayatu gāyatréṇa chándaséty āha \
agnír eváinaṃ vásubhiḥ purástād rocayati gāyatréṇa chándasā \
sá mā rucitó rocayéty āha \
āśíṣam eváitā́m ā́ śāste \
índras tvā rudráir dakṣiṇató rocayatu tráiṣṭubhena chándasety āha \
índra eváinam̐ rudráir dakṣiṇató rocayati tráiṣṭubhena chándasā \
sá mā rucitó rocayéty āha \
āśíṣam eváitā́m ā́ śāste \
váruṇas tvādityáiḥ paścā́d rocayatu jā́gatena chándaséty āha \ váruṇa
eváinaṃ ādityáiḥ paścā́d rocayati jā́gatena chándasā \

5.5.2

sá mā rucitó rocayéty āha \
āśíṣam eváitā́m ā́ śāste \
dyutānás tvā mārutó marúdbhir uttarató rocayatv ā́nuṣṭubhena chándaséty āha \
dyutāná eváináṃ mārutó marúdbhir uttarató rocayaty ā́nuṣṭubhena chándasā \
sá mā rucitó rocayéty āha \
āśíṣam eváitā́m ā́ śāste \
bṛ́haspátis tvā víśvair deváir upáriṣṭād rocayatu pā́ṅktena chándaséty āha \
bṛ́haspátir eváinaṃ víśvair deváir upáriṣṭād rocayatu pā́ṅktena chándasā \
sá mā rucitó rocayéty āha \
āśíṣam eváitā́m ā́ śāste \

5.5.3

rocitás tváṃ deva gharma devéṣv ásī́ty āha \
rocitó hy èṣá devéṣu \
rociṣīyā́háṃ manuṣyèṣv íty āha \
rócata eváiṣá manuṣyèṣu \
sámrāḍ gharma rucitás tváṃ devéṣv ā́yuṣmām̐s tejasvī́ brahmavarcasy àsī́ty āha \

5.5.3_2

rucitó hy èṣá devéṣv ā́yuṣmām̐s tejasvī́ brahmavarcasī́ \
rucitò 'háṃ manuṣyèṣv ā́yuṣmām̐s tejasvī́ brahmavarcasī́ bhūyāsam íty āha \
rucità eváiṣá manuṣyèṣv ā́yuṣmām̐s tejasvī́ brahmavarcasī́ bhavati \
rúg asi rúcaṃ máyi dhehi máyi rúg íty āha \
āśíṣam eváitā́m ā́ śāste \
táṃ yád etáir yájurbhir árocayitvā \
rucitó gharmá íti prabrūyāt \ rucitó gharmáḥ
árocuko 'dhvarúḥ syā́t \
árocuko yájamānaḥ \
átha yád enam etáir yajurbhī rocayitvā́ \
rucitó gharmá íti prā́ha \
rócuko 'dhvaryúr bhávati \
rócuko yájamānaḥ \ \\ paścā́d rocayati jā́gatena chándasā sá mā rucitó rocayéty āhāśíṣam eváitā́m ā́ śāste 'ṣṭau ca \\

Commentaries (1)

Linked texts (3)

Discussed in (2)