Vedārthaprakāśa

Commentary on Daivata Brāhmaṇa (Devatādhyāyabrāhmaṇa)

Language: Sanskrit
Author: Sāyaṇācārya
Extent: 68 passages, 1,463 words
Text: partly digitised
Source: archiveorg · Devatadhyaya Brahmanam Sayana; ed. B. R. Sharma · Scan of a printed edition hosted by the Internet Archive (archive.org); the ancient text is in the public…

1 — 1 part
2 — 26 parts
3 — 12 parts
4 — 24 parts
5 — 5 parts

Text

1.10

tatrādau sāmnāṃ nidhanabhedena taddevatābhidhānāya tā evānukramate —

2.1

etāḥ sāmadevatāḥ iti śeṣaḥ |
tatrādāvagnidevatyāni sāmānyāha —

nidhanaṃ nāma pāñcabhaktikasya sāptabhaktikasya vā sāmno'ntyo bhāgaḥ | sarvatra sāmnāṃ caturvidhaṃ nidhanam | svaro nidhanamiḍā vāgiti | tadetaddevānte
nidhanam ] antarnidhanamiti ca dvedhā | tatra nidhanāditritayavyatiriktasya svara iti rūḍhyā nāmadheyam | iḍānidhanāni kāleyarauravādīni | bāhyākṣaranairapekṣyeṇa ṛgantyapadānyeva yatra nidhanasthānīyāni tāni padanidhanāni yaudhājayasaṃhitādīni | īkāranidhanāni mahāvatsapramahāvairājādīni | uktatrividhanidhanāni yāni sāmāni tānyetānyāgneyāni agnidevatākāni |
athendradevatyānyāha —

2.3

ādiṣṭebhyaḥ iḍānidhanānītyādyuktebhyaḥ sarvāṇi svārāṇi prājāpatyāni iti vakṣyamāṇebhyaśca [ anyāni ] vyatiriktāni yāni nidhanavanti santi tāni sarvāṇi aindrāṇi iti jānīyāt |
atha prajāpatidevatākānyāha —

2.4

svaryamāṇam ṛgantyākṣaraṃ hāikāraśca svaranidhanam | tadvanti sarvāṇi prājāpatyāni iti |
uktalakṣaṇaṃ sāma svayamevodāharati --

2.5

etad hāikārayuktasyodāharaṇam |
atha somadevatyānyāha --

2.6

yāni ṛgakṣaravyatiriktastobharahitāni kevalaṛgbhāvayuktāni tāni ṛksāmāni |
svayameva tānyudāharati --

2.7

atha varuṇadevatyānyāha --

2.8

vāṅnidhanavanti vāṅnidhanāni vāruṇāni |
uktalakṣaṇaṃ sāma udāharati --

2.9

atha tvaṣṭṛdevatyānyāha --

2.10

akṣaramanusvaryate yeṣu tāni yathoktāni |
tānyudāharati —

2.11

athāṅgirodevatyānyāha —

2.12

abhisomāsa āyavaḥ (sā. 518) ityādiṣu gītāni svaḥpṛṣṭhāni|
atha pūṣadevatyānāṃ lakṣaṇamāha —

2.13

kāśītadaivodāsādīni svarṇidhanāni |
atha sārasvatasya lakṣaṇamāha —

2.14

yadyapi vāṅnidhanāni vāruṇānīti pūrvamevoktaṃ tathāpyetayorutpanne eva vāṅnidhane sārasvate | ata evoktadvayavyatiriktānāṃ vāruṇatvādapunaruktiḥ |
athaindrāgnasya lakṣaṇamāha —

2.15

ya ānayatparāvataḥ (sā. 127) [ityasyāṃ ye] dve sāmnī utpanne te indrāgnidevatye |
athāgneyendrayoḥ sāmanī āha —

2.16

upa no haribhiḥ sutam (grāma. 4. 4. 150. 2) ityasyānte sutaṃ rayiṣṭhā ityetad gīyate | tathā sahorayiṣṭhā ityetad yaste madāyāṃ [ityasyāḥ] (13. 1. 470. 3) tṛtīye gīyate | te ubhe apyāgneyendre | evaṃ nidhanabhedena sarveṣāṃ sāmnāṃ sāmānyena agnyādīndrāgniparyantā daśa devatā draṣṭavyāḥ | āgneyendrayornirdeśe'pyaindrāgnasyaiva viparyāsādananyatvam |
atha prakārāntareṇa nidhanavaśāt kṛtsnasāmnāṃ devatābhidhānāya tā evānukramate —

2.17

yathāgnyādayaḥ pratyekaṃ sāmadevatāḥ evaṃ vasvādayo'pi saṃghātmakāḥ sarveṣāṃ sāmnāṃ nidhanacatuṣṭayabhedena devatāḥ |
atha nirdeśakrameṇaiva tāsāṃ sāmāni vibhajya darśayati —

2.18

svaranidhanādibhedena sāmānyabhāgānāṃ cāturvidhyam | [tatra] svareḍāvāṅnidhanavyatiriktasya nidhanatvamiti pūrvamevoktam | eteṣāṃ lakṣaṇāni ca pradarśitāni |
nanu sāmnāṃ pūrvamevāgnyādidevatākatvaṃ vyavasthitam | itaḥ paramapi sarvāṇyāgneyānītyādinā vakṣyate ca | [ataḥ] kimarthaṃ vasvādidevatākatvakathanamiti tatrāha —

2.19

bhūyaso bhāvo bhūyastvam | saṃghaśa ityarthaḥ | tadanatikramya pradeśāḥ sāmnāṃ vasvādyupadeśā vartante | ata uktāgneyādyapekṣayā vasvādikaivatānyabhyantarāṇi | pṛthak pṛthak devatābhidhānāt pūrvoktānāṃ bāhyatvam | idānīṃ saṃghaśo'bhidhānādāntaratvam |
athoktaprakāradevatābhidhānena nigūḍhataraṃ sāmnāṃ devatāparijñānaprakāramāha–

2.20

pūrvatra sāmnāṃ caturthā vibhāgena devatācatuṣṭayābhidhānameva | iha tu sarveṣāmapi sāmnāmagnyādidevatākatvābhidhānādantarataratvam | svarāṇāṃ prājāpatyatvaṃ pūrvavadeva | atra auśanakāvādisvarasaṃgrahārthatvāt apaunaruktyam | ata evāntarataratvam |
athoktaprakārādapi laghūtaraṃ devatāparijñānaprakāramāha –

2.21

kṛtsnasāmnāṃ brahmaṇaivādau sṛṣṭestattaddevatāvyājena tasyaiva pratipādyatvāt brāhmatvam |
atha sāmnāṃ devatāsaṃbandhaviṣaye jñātavyaṃ rahasyamāha –

2.22

kaiṣā upaniṣaditi darśayati —

2.23

ṛk prasiddhā | sāma gītyātmakam | svaraḥ kruṣṭādiḥ |
astvevam | tataḥ kim ? ityata āha —

2.24

ṛkṛta ākhyānāni yajñāyajñīyavāravantīyayadvāhiṣṭhīyaprabhṛtīni | teṣāṃ mātṛbhūtaṛgrūpenākhyānāt mātṛtastānyākhyāyante | sāmata ākhyātāni yaudhājayaprabhṛtīni | tāni pitṛta ākhyāyante | svarata ākhyātāni vāmadevyādīni | prajāpatitastānyākhyāyante | evaṃ samastasyodgīthasyodgānakarmaṇa ṛksāmasvarā iti trayo'vayavāste pṛthak pṛthak mātādibhedena prasiddhā bhavanti |
athodgīthasyoktavidhatvaṃ praśaṃsati —

2.25

bandhavo mātādayastadvān | na kevalaṃ bandhumattvaṃ kiṃtu teṣāṃ matyaḥ matārhaḥ saṃmataśca |
uktārthaparijñātāraṃ praśaṃsati —

2.26

spaṣṭo'rthaḥ |
iti śrīsāyaṇācāryaviracite mādhavīye vedārthaprakāśe devatādhyāye pañcame brāhmaṇe prathamaḥ khaṇḍaḥ |
pūrvasmin khaṇḍe sāmnāṃ bahudhā devatā uktāḥ | atha tadāśrayabhūtaṛgāśritānāṃ chandasāṃ devatā vidhāsyati | idānīṃ teṣāṃ varṇānabhidhātuṃ pratijānīte —

3.1

vakṣyante iti śeṣaḥ |
atha gāyatryādibhedena varṇaviśeṣānāha —

3.2

sāraṅgaṃ śabalam | śeṣāḥ spaṣṭāḥ | eteṣāmakṣarasaṃkhyāṃ tu — atha chandāṃsi | gāyatryuṣṇig (kātyāyanasarvānukramasūtra 5. 1-2) ityupakramya caturviṃśatyakṣarādīni caturuttarāṇi (kā. sa. sū. 5. 3) ityanukramaṇyāmukta tvāt caturviṃśatyakṣaraprabhṛti catvāri catvāri akṣarāṇi adhikāni uṣṇigādiṣu draṣṭavyāni |
athātijagatīprabhṛtīnāṃ varṇānāha —

3.3

ato yānyanyāni gāyatryādisaptacchandovyatiriktāni atijagatīprabhṛtīni utkṛtiparyantāni teṣāṃ śyāvaṃ kapiśavarṇaṃ vidyāt | tathendro viśvasya rājati (sā. 456) ityādyekapadānāṃ nakulaṃ nakulajātervarṇaṃ jānīyāt | dvipadānām imā nu kam (sā. 452) ityādīnāṃ babhruḥ babhruvarṇaḥ | tathā yāni ṛgyajurādibrāhmaṇagatāni gāyatryādīni teṣāṃ ca sāraṅgādayo varṇā draṣṭavyāḥ |
atha yajñasaṃbandhināṃ gāyatryādyupabaddhānāṃ mantrāṇāṃ devatā vakṣyāmīti pratijānīte —

3.4

athānuktānāṃ virajaṃ varṇaṃ darśayati —

3.5

pibā somamindra mandatu tvā (sā. 398) ityevamādayo virājaḥ | te pṛśnivarṇā iti jānīyāt |
atha agnergāyatryabhavad (dai.brā. 1. 2. 7) ityādimantradvayaśravaṇaṃ kimarthamityāśaṅkya tattātparyamāha —

3.6

tata uttaraṃ vākyajātaṃ devatābhidhānamityarthaḥ |
atha agnyādīnāṃ devatānāṃ gāyatryādisaṃbandhakathanaparaṃ mantradvayam | tatra prathamaṃ mantramudāharati —

3.7

agneḥ sayugvā sahāyabhūtā gāyatrī abhavat | prajāpatermukhādajāyata | devatāsu madhye agniḥ chandaḥsu madhye gāyatrī ca ubhāvapyajāyetāmityarthaḥ | tathaiva taittirīyakam — prajāpatirakāmayata | prajāyeyeti | sa mukhatastrivṛtaṃ niramimīta | tamanurgādavatā anvasṛjyata gāyatrī chandaḥ | (tai. saṃ. 7. 1-1) iti | yadvā, sayugvetyuttaratra saṃbadhyate | agneḥ sakāśāt gāyatryajāyatetyarthaḥ | tathā uṣṇihayā uṣṇikchandasā saha sayugvā saha yujyamānaḥ
savitā devaḥ saṃbabhūva tasmāt prajāpaterjajñe | āpaṃ cāpi halāntānām (ma. bhāṣya. 2.4.81) iti vacanāduṣṇihaśabdādāppratyayaḥ | tathā ukthaiḥ stotraśastrairmahasvān tejasvī somaḥ anuṣṭubhā anuṣṭupcchandasā sārdhaṃ tasmādeva prajāpaterajāyata | tathā bṛhaspaterdevasya vācaṃ vākyaṃ bṛhatīchandaḥ āvad akṣarat | agacchadvā | bṛhatyā sārdhaṃ bṛhaspatirapi tasmāt prajāpaterjajña ityarthaḥ |
atha dvitīyaṃ mantramāha —

3.8

api ca mitrāvaruṇayordevayorvirāṭ chandaḥ abhiśrīḥ prāptāśrayā āsīt | tathā indrasya triṣṭup chandaḥ ahno bhāgo mādhyaṃdinasavanasyākhyābhūt | tathā jagatī chandaḥ viśvān devān āviveśa praviṣṭā | tena agnyādidevatākena gāyatryādicchandaupanibaddhena vedena ṛṣayo manuṣyāḥ
maraṇaśīlā manuṣyāśca cāklṛpre caklṛpire | vāgbhireva klṛptāḥ sṛṣṭāḥ āsannityarthaḥ | ato gāyatryāderagnyādirdevatā ityuktaṃ bhavati |
athoparitanānāṃ chandasāṃ devatā āha -

3.9

3.10

vāsavī vasudevatākā |
atha cchandasāmuktadevatākatve pramāṇamupanyasyati -

3.11

satulaṃ samānaṃ yathā eteṣu gāyatryādicchandaḥsu | yathā etaddevatyā eva agnyādidevatākā eva ṛcaḥ prāyeṇa bhavantīti manyeta jānīyāt | samanumanyeteti pāṭhe saṃbhavantītyanumanyeta vidyādityanvayaḥ |
atha agnyādidevatākaṛgāśrayāṇāmapi chandasāmetaddevatākatvameva yuktamityāha -

3.12

yathā gāyatryādicchandaḥsu agnyādidevatākatvamṛcāṃ tathā chandasām api gāyatryādiṛgāśrayāṇām | uśabdo'pyarthe | etaddaivataṃ khalu | etā agnyādidevatā eva bhavituṃ yuktāḥ khalvityarthaḥ |
iti śrīsāyaṇācāryaviracite mādhavīye vedārthaprakāśe devatādhyāye pañcame brāhmaṇe dvitīyaḥ khaṇḍaḥ |
atha sāmāśrayāṇāṃ chandasāṃ devatākathanaprasaṅgena teṣāmeva nirvacanāni didarśayiṣurādau pratijānīte —

4.1

atha sāmnāṃ devatābhidhānāntaram ataḥ yato nirvacanena niruktaṃ gāyatryādi cchando gāyatraṃ sāma jāgataṃ sāmetyādi sāmanāmasūpayujyate ata ityarthaḥ | nirvacanaṃ prakṛtipratyayavibhāgena vyutpādanaṃ pradarśyata iti śeṣaḥ |
tatra gāyatryā darśayati —

4.2

gai śabde | śabdaḥ stavanam | gāyati stauti prakāśayati devatāmiti gāyatrī |
atha brāhmaṇapradarśanenaiva prakārāntareṇa nirvacanaṃ darśayati —

4.3

gāyanaḥ vedajātaṃ śabdayataḥ prajāpatermukhād eṣā vedasārabhūtā udapatad udagacchad [hi] yataḥ | ato'pi gāyatrītyarthaḥ || atraiva gāyatrīvidyāyāṃ prakārāntareṇa nirukto gāyatrīśabdaḥ |
gāyati ca trāyate ca yā vai sā gāyatrī | yā vai khalu gāyati ca vṛthā saṃsāre mā kliśyata taducchittaye māmeva bhajadhvam (chā. u. 3.12.1) iti svayaṃ śabdayati ca | tathā kurvāṇaṃ duḥkhātmakāt saṃsārāt trāyate pālayati sā ca gāyatrīti nirucyate iti śeṣaḥ | tadyad gāyaṃstatrettasmādgāyatrī nāma (bṛ. ā. 5. 14.4) iti hi bṛhadāraṇyakam | tathā ca smārtaṃ nirvacanamapi -- gāyantaṃ trāyate yasmād gāyatrī tena sā smṛtā | (vyāsa) iti |
athoṣṇiho nirvacanaṃ bahuprakāraṃ darśayati --

4.4

4.5

kakupśabdo'pyupamāṃpradhānaḥ | yathā vṛṣabhasya madhyapradeśaḥ kakupsaṃjñaka ucchrito bhavati evaṃ madhyamapādasya jāgatatvāt caturakṣaraṃ kakutsthānīyamasyā astīti kakup | dakārasya pakāraḥ | kakudasyāvasthāyāṃ lopaḥ (pā. 5. 4. 146) ityasmādasamāse'pyakāralopaḥ |
kakupśabdasya kākubhaṃ dantadhāvanamityādārthāntarasmaraṇāt svābhimatārthamāha —

4.6

4.7

stobhatirvṛddhyarthaḥ | gāyatrītaḥ samākṣarapādavṛddheḥ |
uktārthe brāhmaṇasaṃmatiṃ darśayati —

4.8

nirukte prakārāntareṇa brāhmaṇavākyamudāhṛtam | gāyatrīmeva tripadāṃ satīṃ caturthena anuṣṭobhatīti ca brāhmaṇam (ni. 7. 3. 12) || iti |
atha pipīlikāmadhyāyā nirvacanaṃ vaktuṃ pipīlikāśabdasya nirvacanamāha —

4.9

na hyasau kṣaṇamapyudāste |
idānīṃ tacchandonirvacanamupamāprādhānyena darśayati —

4.10

pipīlikā nāmābhitaḥ sthūlo madhye kṛśa udbhijjaḥ prāṇiviśeṣaḥ | tanmadhyamiva madhyaṃ yasyāḥ sā tathoktā | madhyamapadalopī samāsaḥ | asyāstanumadhyatvamanukramaṇyām — ekādaśinoḥ paraḥ ṣaṭkastanuśirā | madhye cet pipīlikamadhyā || (śu. ya. sarvā. sū. 27-28) ityuktam | atha bṛhatyā nirvacanamāha —

4.11

asyā anuṣṭubhaḥ sarvapādeṣvekākṣaravardhanāt pravṛddhatvam ||
atha virājo nirvacanaṃ bahuprakāramāha —

4.12

virāṭśabdaḥ, ramu krīḍāyāṃ, rājṛ dīptau, rādha sādha saṃsiddhau iti tribhyo dhātubhyo'nyatamenāpi niṣpādyate | dhātutrayārthasya asmin saṃbhavāt |
atha paṅkternirvacanamāha —

4.13

pañcasaṃkhyāyogāt paṅktiśabdaḥ pañcatvapradarśanaparaḥ | [ataḥ] pañcapadeti |
atha triṣṭubho nirvacanaṃ darśayati —

4.14

stobhatiḥ stutikarmā uttarapadaṃ yasyāḥ sā triṣṭup |
tadanantaraṃ pūrvapadasya triśabdasya kiṃ pravṛttinimittamiti svayameva pṛṣṭvā uttaramapi brūte —

4.15

4.16

ubhayatastrikoṭitvāt vajrastrivṛt | tasya stobhinīvetti upamāpradhāno'yaṃ nirdeśaḥ | yat trivṛt stobhaḥ tat triṣṭubhastriṣṭupnvam iti brāhmaṇam |
atha jagatīśabdaṃ nirvakti —

4.17

4.18

pūrvaṃ prajāpatiḥ jajjalākurvan jagatīṃ sṛṣṭavānityarthaḥ | nirukte'pyevaṃ darśitam — jagatī gatattamaṃ chando jañjagatirvā jajjajamāno'sṛjaditi ca brāhmaṇam iti |
atha aticchandaso nirvacanam —

4.19

atipūrva chando'ticchandāḥ | chandaso'rthajñānenaivāticchandaso vijñānaṃ sulabhamiti bhāvaḥ | tathā ca jagatīmatikramyādhikabaḷavattvena yā vartate saivātijagatītyevaṃ phalitam |
athedānīṃ chandasa eva nirvacanaṃ vakti —

4.20

[chandayati] ṛ[g][gāta][bhānāni]tyasmāt chandaḥśabdaḥ | gacchati
cetad vāgjātam | yadvā | chādayati japitāram iti | chandāṃsi chādanāt (ni. 7. 3. 1) iti niruktam | chādayanti ha vā enaṃ chandāṃsi pāpebhya iti brāhmaṇam |
atha uktagāyatryādīnāmeva ekākṣaranyūnatvādhikyācca ye nicṛd - bhuriksaṃjñake chandasī bhavataḥ tayoḥ nirvacanamāha —

4.21

cṛtī hiṃsāgranthanayoḥ ityasmāt nipūrvāt nicṛcchabdaḥ | asti ca hiṃsārtho'lpākṣaranyūnatvāt | bhṛñ bharaṇe ityasmāt bhurit (k?) | asti cātra bharaṇamekākṣarādhikyāt | nyūna [tvā ] dhikyācca ete nicṛdbhūrijāvityanukrāntam |
yadarthaṃ gāyatryādicchandasāṃ varṇadevatānirvacanāni pratipāditāni teṣāṃ madhye gāyatryāṃ gīyamānasya gāyatrasāmnaḥ sarveṣāṃ prāthamyāt [tad-] devatā bahudhā darśayati-

4.22

gāyatraṃ sāma iti saṃbandhaḥ | tat sāma bhaktyā prajāpatermukhāt sahotpattilakṣaṇadvāreṇa āgneyam agnidevatārkaṃ bhavati | vastutastu devadevatyam ṛṣidevatyaṃ vā prājāpatyaṃ vā | parameṣṭhiśabdaḥ taddhitāvayavabhūtaprajāpatiśabdaviśeṣaṇam | parame niratiśayaloke tiṣṭhatīti parameṣṭhī | yadvā svārthikaḥ taddhitaḥ | parameṣṭhinaḥ prajāpateḥ sāma vetyarthaḥ |
atha yāsu gāyatraṃ bhavatītyatidiṣṭaṃ tatpradeśeṣu uktadevatākaṃ sāma gāyatraṃ gātavyamityatidiśati —

4.23

yatra yeṣu pradeśeṣu gāyatraṃ bhavatītyuktaṃ na gītaṃ tatra sāvitrī (tryāṃ ?) savitṛdevatākāyāṃ tatsaviturityasyāṃ gītaṃ sāma geyamityarthaḥ |
athāvihiteṣu yatsāvitrīgānamatidiśyate tadudāhṛtya darśayati —
athātra granthe vihitasya devatāparijñānasya phalamāha --

4.24

ṛṣayo mantradraṣṭāraḥ mantrajñāḥ | tena tadāśritāni sāmāni lakṣyante | teṣāṃ viṣayaḥ devatāchandonirvacanāni | tadabhijño yaḥ sa tathoktaṃ phalaṃ prāpnotīti śeṣaḥ || yadvā sāmnām ṛṣidevatayorubhayorapyapekṣitatvāt tadubhayapratipādakārṣeyadevatādhyāyākhyagranthadvayasya ekatvābhiprāyeṇa ṛṣīṇāṃ viṣayajña ityupanyāsaḥ |
ṛṣīṇāmityupalakṣaṇam | devatānāṃ viṣayajñasyāpyuktaṃ phalamastyevetyabhiprāyaḥ | smaranti | pūrvajanmādikaṃ smarantītyarthaḥ | śiṣṭaṃ spaṣṭam |
iti śrīsāyaṇācāryaviracite mādhavīye vedārthaprakāśe devatādhyāyabrāhmaṇabhāṣye tṛtīyaḥ khaṇḍaḥ |
pūrvasmin khaṇḍe tatsaviturityasyāṃ sāvitryāṃ gāyatraṃ gītam | tasya ca devatā uktāḥ | ārṣeye cāyātayāmatvaṃ ṛṣayaśca pratipāditāḥ | gānaprakārasya ca lakṣaṇamuktaṃ prathamāyāṃ vā (ā. brā. 1. 15) ityādinā | idānīṃ gāyatrasāmādhārabhūtāyāḥ tasyāḥ sāvitryāḥ sakaladevatāvayavatvena upāsanamucyate —

5.1

śiro brahmā hiraṇyagarbhaḥ satyalokaḥ śiraḥ | tathā lalāṭaṃ dyauḥ sādhiṣṭhātrī | romāṇi vāyavaḥ kṣudrāvayavāḥ| ūrū marutaḥ marudgaṇāḥ| adhaḥ(dhaḥ?)pratyakṣeṇa paridṛśyamānabhūtalopalakṣitam adholokasaptakam | pādau saptapātālapādetyarthaḥ | lalāṭaṃ dyauḥ ityanena lalāṭopalakṣitanābhiparyantāvayavāḥ dyulokopalakṣitordhvalokāḥ [pādau ityanena] pādopalakṣitāḥ adho [lokāḥ sapta] ityarthaḥ | tathā ca adhodhvarbhāgaḥ śarīrasyeti sakalalokātmakatvamuktaṃ bhavati | tathā ca gāyatrīvidyāyāṃ gāyatrī vā idaṃ sarvaṃ bhūtam ityādinā
sakalacarācarātmakatvasya pratipādanād iha tu śira ādyavayavatvena prapañcajātaṃ nirūpyate | śvasitaṃ vāyuḥ sarvasamaṣṭibhūtavāyuḥ śvasitam | śiṣṭaṃ nigadaspaṣṭam |
brahmādīnāṃ devānāṃ lokānāṃ ca sarveṣāṃ sāvitryaṅgṛtvenopāsanaṃ sarvātmakatayā evaṃ vedanaṃ kartavyamityāha -

5.2

etadvedituḥ phalamāha -

5.3

duṣṭatā duṣṭasya bhāvaḥ | rāgadveṣādikluṣitamanas [ktā] tathā (-yā?) durupayuktāt duṣṭopayogāt aśraddhālasā (syā ?) diprayuktakaraṇadoṣaduṣṭoccāraṇāt ityarthaḥ | tathā nyūnādhikācca nyūnādhikoccāraṇācca | kiṃca sarvasmāt | kiṃ saṃkocataḥ ? sarvasmāt sāvitrījapakaraṇe saṃbhāvitasarvadoṣāt svasti maṅgalaṃ bhavatyeva tasya vedituḥ |
kiṃca -

5.4

[devaṛṣibhyaḥ] gāyatryanugatebhyaḥ | sakāśāt bhavatīti śeṣaḥ ||
yadvā ārṣeyadevatādhyāyadvayapratipāditārthavedituḥ phalaṃ duṣṭatādurupayuktādityādi | tatra vedādhyayane sāvitrījape ca saṃbhāvitasarvadoṣāt svasti bhavatīti | ata eva devatā devaṛṣibhyaśca [iti] | devā ṛṣayaśca ye ārṣeyadevatādhyāyābhyāṃ pratipāditāstatsakāśācca svasti bhavati | te tu samyakprayoge'pi mantrānugatāḥ prītāḥ santaḥ svasti kurvantītyarthaḥ |

5.5

brahma vedaḥ sāvitryā saha satyaṃ ca tadubhayagatamavitathatvaṃ yāthārthyaṃ ca vāstavaṃ vidyamānaṃ duṣṭaprayoktāram anyathā ca nyūnādhikabhāvena prayoktāramapi māṃ pātu | tādṛśadoṣajanyapratyavāyād rakṣatviti prārthayedityarthaḥ | duṣṭatādurupayuktādityādiko'yaṃ mantraḥ | svastyastu maṅgalāni bhavantu | dviruktirdevatādhyāyaparisamāptyarthā | prārthanāyāmādarārthā ca |

Vedārthaprakāśa

Contents

Text