<!-- Pramāṇa, a library of Indian primary sources · https://indike.org/pramana/in.veda.brahmana.jaiminiya.3.184 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Jaiminīya (Talavakāra) Brāhmaṇa](https://indike.org/pramana/in.veda.brahmana.jaiminiya) › 3.184

# Jaiminīya (Talavakāra) Brāhmaṇa 3.184

Jaiminīyabrāhmaṇa 3.184

- **Language:** Sanskrit

### [3.184](https://indike.org/pramana/in.veda.brahmana.jaiminiya.3.184)

tāsu rauravam  
devā vā etā ayātayāmnīstanūrasurayuddhāya prāvṛhanta  
agnireva rauravaṃ prāvṛhata  
tenāsurānabhyatapat  
te'bhitapyamānā aravanta  
yadabhitapyamānā aravanta tadrauravasya rauravatvam  
abhitapati bhrātṛvyaṃ śreyānbhūtvā ya evaṃ veda  
tadāgneyaṃ sāmāgneye'hankriyate  
āgneyametadaharyadgāyatram  
agnirhi gāyatrī  
tadyadatra rauravaṃ kriyate'hareva tadrūpeṇa samardhayanti  
tenaibhyassamṛddhena svāyāṃ janatāyāmṛddhukaṃ bhavati  
tadaiḷaṃ bhavati paśavo vā iḷā  
paśavaśchandomāḥ paśūnāmevāvaruddhyai  
atha rathantaram  
jāmi dvādaśāhasyāstītyāhuḥ  
bārhataṃ ṣaṣṭhamaharbārhataṃ saptamam  
pavamāne rathantaraṃ prohantyajāmitāyai  
nānyato'pasakto vivadho hriyata ityāhuḥ  
tadyadubhe bṛhadrathantare bhavatassa vivadhatāyā eva  
yo vai mūlādagraṃ saṃcikramiṣati na sa śaknoty | atha yo'grādagraṃ saṃkrāmati  
sa śaknoti  
agrādvā ete'graṃ saṃkrāmanti ye bṛhato bṛhadupayanti  
tasmādbārhataṃ ṣaṣṭhamaharbhavati | bārhataṃ saptamam

- [Previous: 3.183](https://indike.org/pramana/in.veda.brahmana.jaiminiya.3.183)
- [Next: 3.185](https://indike.org/pramana/in.veda.brahmana.jaiminiya.3.185)
- [Up: 3](https://indike.org/pramana/in.veda.brahmana.jaiminiya.3)

---
Source: [https://indike.org/pramana/in.veda.brahmana.jaiminiya.3.184](https://indike.org/pramana/in.veda.brahmana.jaiminiya.3.184) · Pramāṇa
