Mantrabrahmana 1.2

Mantrabrāhmaṇa 1.2

imam aśmānam ārohā-
-śmeva tvam̐ sthirā bhava /
dviṣantam apabādhasva
mā ca tvaṃ dviṣatām adhaḥ //

iyaṃ nāry upabrūte
'gnau lājān āvapantī /
dīrghāyur astu me patiḥ
śatam̐ varṣāṇi jīvatv
edhantāṃ jñātayo mama // svāhā //

aryamaṇaṃ nu devaṃ
kanyā agnim ayakṣata /
sa imāṃ devo aryamā
preto muñcatu māmutaḥ // svāhā //

pūṣaṇaṃ nu devaṃ
kanyā agnim ayakṣata /
sa imāṃ devo pūṣā
preto muñcatu māmutaḥ // svāhā //

kanyalā pitṛbhyaḥ patilokam̐ yatī-
-yam apa dīkṣām ayaṣṭa /
kanya uta tvayā vayaṃ dhārā udanyā ivā-
-tigāhemahi dviṣaḥ //

ekam iṣe viṣṇus tvā nayatu //

dve ūrje viṣṇus tvā nayatu //

trīṇi vratāya viṣṇus tvā nayatu //

catvāri māyobhavāya viṣṇus tvā nayatu //

pañca paśubhyo viṣṇus tvā nayatu //

ṣaḍ rāyas poṣāya viṣṇus tvā nayatu //

sapta saptabhyo hotrābhyo viṣṇus tvā nayatu //

sakhā saptapadī bhava
sakhyaṃ te gameyam̐
sakhyāt te mā yoṣam̐
sakhyān me mā yoṣṭhāḥ //

sumaṅgalīr iyam̐ vadhūr
imām̐ sameta paśyata /
saubhāgyam asyai dattvāyā-
-thāstam̐ viparetana //

samañjantu viśve devāḥ
sam āpo hṛdayāni nau /
saṃ mātariśvā saṃ dhātā
sam u deṣṭrī dadhātu nau //

gṛbhnāmi te saubhagatvāya hastaṃ
mayā patyā jaradaṣṭir yathāsaḥ /
bhago aryamā savitā puraṃdhir
mahyam tvādur gārhapatyāya devāḥ //

aghoracakṣur apatighny edhi
śivā paśubhyaḥ sumanāḥ suvarcāḥ /
vīrasūr jīvasūr devakāmā syonā
śaṃ no bhava dvipade śaṃ catuṣpade //

ā naḥ prajāṃ janayatu prajāpatir
ā jarasāya samanaktv aryamā /
adurmaṅgalīḥ patilokam āviśa
śaṃ no bhava dvipade śaṃ catuṣpade //

imāṃ tvaṃ indra mīḍhvaḥ
suputrām̐ subhagāṃ kṛdhi /
daśāsyāṃ putrān ādhehi
patiṃ ekādaśaṃ kuru //

samrājñī śvaśure bhava
samrājñī śvaśrvāṃ bhava /
nanāndari samrājñī bhava
samrājñī adhi devṛṣu //

mama vrate te hṛdayaṃ dadhātu
mama cittam anu cittaṃ te astu /
mama vācam ekamanā juṣasva
bṛhaspatis tvā niyunaktu mahyam //

Commentaries (1)