Mantrabrahmana 1.5
Mantrabrāhmaṇa 1.5
- Language
- Sanskrit
1.5.1
ayam ūrjāvato vṛkṣa
ūrjīva phalinī bhava /
parṇam̐ vanaspate 'nu tvā-
-nu tvā sūyatām̐ rayiḥ //
1.5.2
yenāditeḥ sīmānaṃ nayati
prajāpatir mahate saubhagāya /
tenāham asyai sīmānaṃ nayāmi
prajām asyai jaradaṣṭiṃ kṛṇomi //
1.5.3
rākām aham̐ suhavām̐ suṣṭutī huve
śṛṇotu naḥ subhagā bodhatu tmanā /
sīvyatv apaḥ sūcyācchidyamānayā
dadātu vīram̐ śatadāyumukhyam //
1.5.4
yās te rāke sumatayaḥ supeśaso
yābhir dadāsi dāśuṣe vasūni /
tābhir no adya sumanā upāgahi
sahasrapoṣam̐ subhage rarāṇā //
1.5.5
kiṃ paśyasi /
prajāṃ paśūnt saubhāgyaṃ mahyaṃ
dīrghāyuṣṭvaṃ patyuḥ //
1.5.6
yā tiraścī nipadyate
aham̐ vidharaṇī iti /
tāṃ tvā ghṛtasya dhārayā
yaje sam̐rādhanīm aham /
sam̐rādhanyai devyai deṣṭryai //
1.5.7
vipaścit puccham abharat
tad dhātā punar āharat /
parehi tvam̐ vipaścit
pumān ayaṃ janiṣyate
'sau nāma //
1.5.8
iyam ājñedam annam
idam āyur idam amṛtam //
1.5.9
medhāṃ te mitrāvaruṇau
medhām agnir dadhātu te /
medhāṃ te aśvinau devāv
ādhattāṃ puṣkarasrajau //
1.5.10
yat te susīme hṛdayam̐
hitam antaḥ prajāpatau //
vedāhaṃ manye tad brahma
māhaṃ pautram aghaṃ nigām //
1.5.11
yat pṛthivyā anāmṛtaṃ
divi candramasi śritam /
vedāmṛtasyāhaṃ nāma
māhaṃ pautram agham̐ riṣam //
1.5.12
indrāgnī śarma yacchataṃ
prajāyai me prajāpatī /
yathāyaṃ na pramīyeta
putro janitryā adhi //
1.5.13
yad adaś candramasi kṛṣṇaṃ
pṛthivyā hṛdayam̐ śritam /
tad aham̐ vidvām̐s tat paśyan
māhaṃ pautram agham̐ rudam //
1.5.14
ko 'si katamo 'sy
eṣo 'sy amṛto 'si /
āhaspatyaṃ māsaṃ praviśāsau //
1.5.15
sa tvāhne paridadātv
ahas tvā rātryai paridadātu
rātris tvāhorātrābhyāṃ paridadātv
ahorātrau tvārdhamāsebhyaḥ paridattām
ardhamāsās tvā māsebhyaḥ paridadatu
māsās tva rtubhyaḥ paridadatv
ṛtavas tvā sam̐vatsarāya paridadatu
sam̐vatsaras tvāyuṣe jarāyai paridadātv asau //
1.5.16
aṅgādaṅgāt sam̐śravasi
hṛdayād adhi jāyase /
prāṇaṃ te prāṇena saṃdadhāmi
jīva me yāvad āyuṣam //
1.5.17
aṅgādaṅgāt saṃbhavasi
hṛdayād adhi jāyase /
vedo vai putranāmāsi
sa jīva śaradaḥ śatam //
1.5.18
aśmā bhava paraśur bhava
hiraṇyam astṛtaṃ bhava /
ātmāsi putra mā mṛthāḥ
sa jīva śaradaḥ śatam //
1.5.19
paśūnāṃ tvā hiṅkāreṇābhijighrāmy asau //
Commentaries (1)
- Padapāṭha (sandhi-resolved text, TITUS) — Sanskrit
Linked texts (7)
- Chāndogyabrāhmaṇa — Sanskrit
- Gobhilagṛhyasūtra — Gobhila, Sanskrit
- Kauṣītakagṛhyasūtra — Sanskrit
- Pāraskaragṛhyasūtra — Pāraskara, Sanskrit
- Jaiminīyagṛhyasūtra — Sanskrit
- Subodhinīpaddhati — Śivarāma 1615, Sanskrit
- Satkriyāsāradīpikā — Gopālakavi 1500, Sanskrit