Mantrabrahmana 1.8
Mantrabrāhmaṇa 1.8
- Language
- Sanskrit
1.8.1
imā me viśvatovīryo
bhava indraś ca rakṣatām /
pūṣam̐s tvaṃ paryāvartayā-
-naṣṭā āyantu no gṛhān //
1.8.2
imā madhumatīr mahyam
anaṣṭāḥ payasā saha /
gāva ājyasya mātara
ihemāḥ santu bhūyasīḥ //
1.8.3
gavām̐ śleṣmāsi
gāvo mayi śliṣyantu //
1.8.4
saṃgrahaṇa saṃgṛhāṇa
ye jātāḥ paśavo mama /
pūṣaiṣām̐ śarma yacchatu
yathā jīvanto apyayān //
1.8.5
bhuvanam asi sāhasram
indrāya tvā sṛmo 'dadāt /
akṣatam ariṣṭam ilāndam //
1.8.6
gopoṣaṇam asi gopoṣasyeśiṣe gopoṣāya tvā /
sahasrapoṣaṇam asi sahasrapoṣasyeśiṣe
sahasrapoṣāya tvā //
1.8.7
lohitena svadhitinā
mithunaṃ karṇayoḥ kṛtam /
yāvatīnām̐yāvatīnām̐ va
aiṣamo lakṣaṇam akāriṣam /
bhūyasīnāṃbhūyasīnām̐ va
uttarāmuttarām̐ samāṃ kriyāsam //
1.8.8
iyaṃ tantī gavāṃ mātā
savatsānāṃ niveśanī /
sā naḥ payasvatī duhā
uttarāmuttarām̐ samām //
Commentaries (1)
- Padapāṭha (sandhi-resolved text, TITUS) — Sanskrit
Linked texts (2)
- Chāndogyabrāhmaṇa — Sanskrit
- Subodhinīpaddhati — Śivarāma 1615, Sanskrit