Mantrabrahmana 2.2

Mantrabrāhmaṇa 2.2

prathamā ha vyuvāsa
sā dhenur abhavad yame /
sā naḥ payasvatī duhām
uttarāmuttarām̐ samām //

prati kṣatre pratitiṣṭhāmi rāṣtre
praty aśveṣu pratitiṣṭhāmi goṣu /
prati prāṇe pratitiṣṭhāmi puṣṭau
praty aṅgeṣu pratitiṣṭhāmy ātmani //

prati dyāvāpṛthivyoḥ pratitiṣṭhāmi yajñe //

syonā pṛthivi no bhavā-
-nṛkṣarā niveśanī /
yacchā naḥ śarma sapratho
devān mā bhayād iti //

yat paśavaḥ pradhyāyata
manasā hṛdayena ca /
vācā sahasrapāśayā
pratibadhnāmi vo manaḥ //

anu tvā mātā manyatām
anu pitānu bhrātā /
sagarbhyo 'nu sakhā sayūthyaḥ //

āttaṃ devebhyo haviḥ //

yat paśur māyum akṛto-
-ro vā padbhir āhate /
agnir mā tasmād enaso
viśvān muñcatv am̐hasaḥ //

agnāv agniś carati praviṣṭa
ṛṣīṇāṃ putro adhirāja eṣaḥ /
sa naḥ syonaḥ suyajā yajāti
yathā devānāṃ janimāni veda //

aulūkhalāḥ saṃpravadanti grāvāṇo
haviṣ kṛṇvantaḥ parivatsarīṇām /
ekāṣṭake suprajasaḥ suvīrā
jyog jīvema balihṛto vayaṃ te //

iḍāyās padaṃ ghṛtavat sarīsṛpaṃ
jātavedaḥ prati havyā gṛbhāya /
ye grāmyāḥ paśavo viśvarūpās
teṣām̐ saptānāṃ mayi rantir astu //

eṣaiva sā yā pūrvā vyaucchat
seyam apsv antaś carati praviṣṭā /
vadhūr jigāya prathamā janitrī
viśve hy asyāṃ mahimāno antaḥ //

eṣaiva sā yā prathamā vyaucchat
sā dhenur abhavad viśvarūpā /
sam̐vatsarasya yā patnī
sā no astu sumaṅgalī //

yāṃ devāḥ pratipaśyanti
rātrīṃ dhenum ivāyatīm /
sā naḥ payasvatī duhā
uttarāmuttarām̐ samām //

sam̐vatsarasya pratimām̐
yāṃ tvā rātri yajāmahe /
prajām ajaryāṃ naḥ kuru
rāyas poṣeṇa sam̐sṛja //

anv imaṃ no anumatir
yajñaṃ deveṣu manyatām /
agniś ca havyavāhanaḥ
sa no dād dāśuṣe mayaḥ //

Commentaries (1)