Mantrabrahmana 2.4
Mantrabrāhmaṇa 2.4
- Language
- Sanskrit
2.4.1
idaṃ bhūmer bhajāmaha
idaṃ bhadram̐ sumaṅgalam /
parā sapatnān bādhasvā-
-nyeṣām̐ vindate dhanam
anyeṣām̐ vindate vasu //
2.4.2
imam̐ stomam arhate jātavedase
ratham iva saṃmahemā manīṣayā /
bhadrā hi naḥ pramatir asya sam̐sady
agne sakhye mā riṣāmā vayaṃ tava //
2.4.3
bharāmedhmaṃ kṛṇavāmā havīm̐ṣi te
citayantaḥ parvaṇāparvaṇā vayam /
jīvātave pratarām̐ sādhayā dhiyo
'gne sakhye mā riṣāmā vayaṃ tava //
2.4.4
śakema tvā samidham̐ sādhayā dhiyas
tve devā havir adanty āhutam /
tvam ādityām̐ āvaha tām̐ hy uśmasy
agne sakhye mā riṣāmā vayaṃ tava //
2.4.5
tapaś ca tejaś ca śraddhā ca hrīś ca satyaṃ cā-
-krodhaś ca tyāgaś ca dhṛtiś ca dharmaś ca
satvaṃ ca vāk ca manaś cātmā ca brahma ca
tāni prapadye tani mām avantu /
bhūr bhuvaḥ svar oṃ
mahāntam ātmānaṃ prapadye //
2.4.6
virūpākṣo 'si dantāñjiḥ /
tasya te śayyā parṇe gṛhā antarikṣe vimitam̐ hiraṇmayam /
tad devānām̐ hṛdayāny ayasmaye kumbhe 'ntaḥ saṃnihitāni /
tāni balabhṛc ca balasāc ca rakṣato 'pramaṇī animiṣataḥ satyam /
yat te dvādaśa putrās
te tvā sam̐vatsaresam̐vatsare kāmapreṇa yajñena yājayitvā
punar brahmacaryam upayanti /
tvaṃ deveṣu brāhmaṇo 'sy ahaṃ manuṣyeṣu
brāhmaṇo vai brāhmaṇam upadhāvaty upa tvā dhāvāmi /
japantaṃ mā mā pratijāpīr juhvantaṃ mā mā pratihauṣīḥ
kurvantaṃ mā mā pratikārṣīḥ /
tvāṃ prapadye tvayā prasūta idaṃ karma kariṣyāmi
tan me rādhyatāṃ tan me samṛdhyatāṃ tan ma upapadyatām /
samudro mā viśvavyacā brahmānujānātu
tutho mā viśvavedā brahmaṇaḥ putro 'nujānātu
śvātro mā pracetā maitrāvaruṇo 'nujānātu /
tasmai virūpākṣāya dantāñjaye samudrāya viśvavyacase
tuthāya viśvavedase śvātrāya pracetase
sahasrākṣāya brahmaṇaḥ putrāya namaḥ //
2.4.7
sahasrabāhur gaupatyaḥ
sa paśūn abhirakṣatu /
mayi puṣṭiṃ puṣṭipatir dadhātu
mayi prajāṃ prajāpatiḥ // svāhā //
2.4.8
kautomatam̐ sam̐vananam̐
subhāgaṃkaraṇaṃ mama /
nākulī nāma te mātā-
-thāhaṃ puruṣāmayaḥ /
yan nau kāmasya vicchinnaṃ
tan nau saṃdhehy oṣadhe //
2.4.9
vṛkṣa iva pakvas tiṣṭhasi
sarvān kāmān bhuvaspate /
yas tvainam̐ veda tasmai me
bhogān dhukṣvākṣatān bṛhan //
2.4.10
ṛtam̐ satye pratiṣṭhitaṃ
bhūtaṃ bhaviṣyatā saha /
ākāśa upanirajjatu
mahyam annam atho śriyam //
2.4.11
abhibhāgo 'si sarvasmim̐s
tad u sarvaṃ tvayi śritam /
tena sarveṇa sarvo mā
vivāsana vivāsaya //
2.4.12
kośa iva pūrṇo vasunā
tvaṃ prīto dadase dhanam /
adṛṣṭo dṛṣṭam ābhara
sarvān kāmān prayaccha me //
2.4.13
ākāśasyaiṣa ākāśo
yad etad bhāti maṇḍalam /
evaṃ tvā deva yo vede-
-śāneśāṃ prayaccha me //
2.4.14
bhūr bhuvaḥ svar om̐
sūrya iva dṛśe bhūyāsam
agnir iva tejasā vāyur iva prāṇena
soma iva gandhena bṛhaspatir iva buddhyā-
-śvināv iva rūpeṇendrāgnī iva balena
brahmabhāga evāhaṃ bhūyāsaṃ
pāpmabhāgā me dviṣantaḥ //
Commentaries (1)
- Padapāṭha (sandhi-resolved text, TITUS) — Sanskrit
Linked texts (2)
- Chāndogyabrāhmaṇa — Sanskrit
- Paippalādasaṃhitā — Sanskrit