Pramāṇa · Search · About · API

Pancavimsha 62

Pañcaviṃśa 62

Language
Sanskrit

Contents

62.1

sa tu vai yajñena yajetetyāhuryasya virājaṃ yajñamukhe
dadhyuriti

62.2

navabhiḥ stuvanti hiṅkāro daśamo daśākṣarā vivarāḍ virājamevāsya yajñamukhe dadhati

62.3

navabhiḥ stuvanti nava prāṇāḥ prāṇairevainam̐ samarddhayanti hiṅkāro daśamastasmānnābhiranavattṛṣṇā daśamī
prāṇānām

62.4

navabhiḥ stuvanti navādhvaryuḥ prātaḥsavane grahān gṛhṇāti tāneva tatpāvayanti teṣāṃ prāṇānutsṛjanti

62.5

prajāpatirvai hiṅkārastriyo bahiṣpavamānyo yaddhiṅkṛtya prastauti mithunamevāsyā yajñamukhe dadhāti prajananāya

62.6

eṣa vai stomasya yogo yaddhiṅkāro yaddhiṅkṛtya prastauti yuktenaiva stomena prastauti

62.7

eṣa vai sāmnāvaraso yaddhiṅkāro yaddhiṅkṛtya prastauti
rasenevaitā abhyudya prastauti

62.8

āraṇyebhyo vā etat paśubhyaḥ stuvanti yadbahiṣpavamānamekarūpābhiḥ stuvanti tasmādekarūpā āraṇyāḥ
paśavaḥ

62.9

parācībhiḥ stuvanti tasmāt parāñcaḥ prajāyante
parāñco vitiṣṭhante

62.10

apariśrite stuvanti tasmādaparigṛhītā āraṇyāḥ
paśavaḥ

62.11

bahiḥ stuvantyantaranuśaꣲsanti tasmādgrāmamāhṛtairbhuñjate

62.12

grāmyebhyo vā etat paśubhyaḥ stuvanti yadājyairnānā
rūpaiḥ stuvanti tasmānnānārūpā grāmyāḥ paśavaḥ

62.13

punarabhyāvarttaꣲ stuvanti tasmātpretvaryyaḥ pretya punarāyanti

62.14

pariśrite stuvanti tasmāt parigṛhītā grāmyāḥ
paśavaḥ

62.15

amuṣmai vā etallokāya stuvanti yadbahiṣpavamānaꣲ
sakṛddhiṅkṛtābhiḥ parācībhiḥ stuvanti sakṛddhīto 'sau
parāṅlokaḥ

62.16

asmai vā etallokāya stuvanti yadājyaiḥ punarabhyāvarttaṃ stuvanti tasmādayam̐llokaḥ punaḥ punaḥ prajāyate

62.17

parāñco vā eteṣāṃ prāṇā bhavantītyāhurye parācībhirbahiṣpavamānībhiḥ stuvata ityāvatīmuttamāṃ gāyetprāṇānāndhṛtyai

62.18

cyavante vā ete'smāllokādityāhurye parācībhirbahiṣpavamānībhiḥ stuvata iti rathantaravarṇāmuttamāṅgāyediyaṃ vai rathantaramasyāmeva pratitiṣṭhati

62.18.p1

iti tāṇḍyamahābrāhmaṇe ṣaṣṭhādhyāyasya aṣṭamaḥ khaṇḍaḥ

Linked texts (3)