Pancavimsha 75: atha daśamaḥ khaṇḍaḥ
Pañcaviṃśa 75
- Language
- Sanskrit
Contents
- 75.17 — 1 part
atha daśamaḥ khaṇḍaḥ
75.1
imau vai lokau sahāstāntau viyantāvabrūtāṃ vivāhaṃ
vivahāvahai saha nāvāstviti
75.2
tayorayamamuṣmai śyaitaṃ prāyacchannaudhasamasāvasmai
75.3
tata enayonnidhane viparyyakrāmatāṃ devavivāho vai
śyaitanaudhase
75.4
pravasīyāᳪsaṃ vivāhamāpnoti ya evaṃ veda
75.5
ito vā ime lokā ūrdhvāḥ kalpamānā yantyamuto'rvāñcaḥ kalpamānā āyanti
75.6
yadrathantareṇa stuvantīmam̐llokaṃ tena yunaktyantarikṣaṃ
vāmadevyena naudhasenāmuṃ yad bṛhatā stuvantyamum̐llokaṃ tena
yunaktyantarikṣaṃ vāmadevyena śyaitenemam
75.7
kḷptām̐nnimām̐llokānupāste ya evaṃ veda
75.8
bṛhadrathantare vai śyaitanaudhase yadrathantarāya naudhasaṃ
prati prayuñjanti bṛhadevāsmai tatprati prayuñjanti bṛhadvyaitatparokṣaṃ yannaudhasaṃ yad bṛhate śyaitaṃ prati prayuñjanti rathantaramevāsmai tatprati prayuñjanti rathantaram̐ hyetatparokṣaṃ
yacchyaitam
75.9
ubhābhyāṃ bṛhadrathantarābhyāṃ stute ya evaṃ veda
75.10
devā vai brahma vyabhajanta tānnodhāḥ kākṣīvata āgacchatte'bruvannṛṣirna āgam̐stasmai brahma dadāmeti tasmā
etat sāma prāyacchanyannodhase prāyaccham̐stasmānnaudhasaṃ
brahma vai naudhasam
75.11
brahmavarcasakāma etena stuvīta brahmavarcasī bhavati
75.12
athaitacchyaitam
75.13
prajāpatiḥ paśūnasṛjata te'smātsṛṣṭā apākrāmam̐stānetena sāmnābhivyāharatte'smā atiṣṭhanta te śetyā abhavan
yacchetyā abhavam̐stasmācchyaitaṃ paśavo vai śyaitam
75.14
paśukāma etena stuvīta paśumān bhavati
75.15
prajāpatiḥ prajā asṛjata tāḥ sṛṣṭā aśocam̐stāḥ
śyaitena huṃmā ityabhyajighrattato vai tāḥ samaidhanta samedhante tām̐ samāṃ prajā yatraivaṃ vidvāñchyaitenodgāyati
75.16
eṣa vai yajamānasya prajāpatiryadudgātā yacchyaitena hikaroti prajāpatireva bhūtvā prajā abhijighrati
75.17
vvasunidhanaṃ bhavati paśavo vai vvasu paśuṣveva pratitiṣṭhati
75.17.p1
aṣṭamo'dhyāyaḥ
Linked texts (3)
- Viṃśabrāhmaṇa — Sanskrit
- Tāṇḍya or Pañcaviṃśa-brāhmaṇa — Sanskrit
- Sāmavedabrāhmaṇānyaṣṭau — Sanskrit