Pramāṇa · Search · About · API

Pancavimsha 80: atha pañcamaḥ khaṇḍaḥ

Pañcaviṃśa 80

Language
Sanskrit

atha pañcamaḥ khaṇḍaḥ

80.1

uṣṇikkakubhāvate bhavataḥ

80.2

uṣṇikkakubbhyāṃ vā indro vṛtrāya vajraṃ prāharatkakubhi parākramatoṣṇihā prāharattasmāt kakubho madhyamaṃ padaṃ
bhūyiṣṭhākṣaraṃ parākramaṇam̐ hi tadabhi samauhattasmāduṣṇiha uttamaṃ padaṃ bhūyiṣṭhākṣaraṃ puro gururiva hi vajraḥ

80.3

vajraṃ bhrātṛvyāya praharati ya evaṃ veda

80.4

nāsike vā ete yajñasya yaduṣṇikakubhau tasmāt
samānaṃ cchandaḥ satī nānā yajñaṃ vahatastasmāt samānāyā
nāsikāyāḥ satyā nānā prāṇāvuccarataḥ

80.5

prāṇā vā uṣṇikakubhau tasmāttābhyānna vaṣaṭkurvanti yadvaṣaṭkuryuḥ prāṇānagnau pradahyuḥ

80.6

tāsu saphaṃ viphamiva vai tṛtīyasavanaṃ tṛtīyasavanasya saphatvāyāthaitatpauṣkalametena vai prajāpatiḥ puṣkalān
paśūnasṛjata teṣu rūpamadadhāyadetatsāma bhavati paśuṣveva
rūpandadhāti

80.7

purojitī vo andhasa iti padyā cākṣyaryā ca vivarājau bhavataḥ padyayā vai devāḥ svargaṃ lokamāyannakṣaryayā
ṛṣayo nu prājānanyadete padyā cākṣaryyā ca vivarājau bhavataḥ svargasya lokasya prajñātyai

80.8

tāsu śyāvāśvam

80.9

śyāvāśvamārśvanānasaṃ satramāsīnaṃ dhanvodavahan
sa etatsāmopaśyattena vṛṣṭimasṛjata tato vai sa pratyatiṣṭhattato gātumavindata gātuvidvā etatsāma

80.10

vindate gātuṃ prati tiṣṭhatyetena tuṣṭuvānaḥ

80.11

indrastṛtīyasavanāddhībhatsamāna udakrāmattandevāḥ
śyāvāśvenehāhi ehiyetyanvāhvayan sa upāvarttata
yadetatsāma bhavati tṛtīyasavanasya sendratvāya

80.12

athaitadāndhīgavamandhīgurvā etatpaśukāmaḥ sāmāpaśyattena sahasraṃ paśūnasṛjata yadetatsāma bhavati paśūnāṃ
puṣṭyai madhye nidhanamaiḍambhavatyetena vai tṛtīyasavanaṃ pratiṣṭhitaṃ yanmadhye nidhanamaiḍanna syādapratiṣṭhitaṃ tṛtīyasavanaᳵ
syāt

80.13

daśākṣaraṃ madhyato nidhanamupayanti daśākṣarā vivarāḍvirājyeva pratitiṣṭhati

80.14

abhipriyāṇi pavateti kāvaṃ prājāpatyaᳵ sāma

80.15

prajā vai priyāṇi paśavaḥ priyāṇi prajāyāmeva paśuṣu
pratitiṣṭhati

80.16

athauśanakāve saha stauti—
raśmī vā etau yajñasya yadauśanakāve devakośo vā
eṣa yajñamabhisamubjito yadete antato bhavato yajñasyāriṣṭyai

Linked texts (6)