Shadvamshabrahmana 29
Ṣaḍvaṃśabrāhmaṇa 29
- Language
- Sanskrit
29.1
yūpaṃ karoti sakṣīraṃ sthūlaṃ mūle bālāgramanurūpam
29.2
vajro vai yūpo vajreṇaivāsmai bhrātṛvyaṃ praharati
29.3
aṣṭāśrīḥ karoti
29.4
daśa diśaḥ parigṛhṇāti| ubhayataḥ pāṅkte dve yūpe karoti
29.5
pañcadaśosaptadaśaikaviṃśatyaratniṃ vā
29.6
pālāśaṃ puṣṭikāmasya | bailvaṃ brahmavarcasakāmasya
audumbaramannādyakāmasya | khādiraṃ balakāmasya | vaibhītakarājavṛkṣau bhrātṛvyavataḥ| kramukāśvatthapāṣāṇāḥ yaśaskāmasya
yatkiṃca yajñiyaṃ paśukāmasya
29.7
tatra varjanīyā bhavanti| gaḍulo vraṇilo vyāvṛttaḥ
kuṭhiḥ kubjaḥ śūlo dagdhaḥ śuṣkaḥ suṣiro ghuṇajagdha
ityapraśastāḥ
29.7-2
tatra teṣu varjanīyā bhavanti gaḍulo granthiyuktaḥ | vraṇilaḥ paścādikṛtavraṇopetaḥ | vyāvṛttaḥ viruddhāvṛttaḥ apradakṣiṇāvarta ityarthaḥ | kuṭhiḥ muṇḍaḥ
kuṭilo vā | kuñjaḥ śūlaḥ | kuñjo vakrāgraḥ śūlastīkṣṇāgraḥ | dagdhaḥ
dāvāgninā | śuṣkaḥ nīrasaḥ | suṣiraḥ sanālaḥ | ghuṇajagdhaḥ kṛmyādibhirbhakṣitaḥ | ityete apraśastāḥ
29.8
atha praśastāḥ | śuddhāvartā anupūrvasamāḥ
praśastāḥ
29.9
yūpasyāśridaivatāni | agniḥ pūrvāyām | yamo dakṣiṇāyām
varuṇaḥ paścimāyām | soma uttarāyām | yā vidiśastāsvādityarudramarudvasavaḥ | aparājitāḥ pitaraścādharāyām ;
sādhyāścordhvāyām
29.10
sarvadevatyo vai yūpaḥ | yūpo vai bahurūpaḥ vajrībhūtvā devānupatiṣṭhate
29.11
te devāḥ prajāpatimupādhāvan | yūpena praharantyāropayantyāyodhayanti ca | tadyūpasya yūpatvam
29.12
mūlamaraṇiṃ sattvacaṃ nikhanet
29.12-2
tasya mūlaṃ satvacam aratniṃ nikhanet
29.13
tasya yannaikhānyaṃ tatpitṝṇām | yadūrdhvaṃ tanmanuṣyāṇām
yattadadho raśanāyā oṣadhivanaspatīnām | yadūrdhvaṃ raśanāyāstadviśveṣāṃ devānām
29.14
āplāvayantyalaṃkurvantyahatena vasanenācchādayanti ca
29.15
tad gandharvāpsarasām
29.16
indrasya caṣālam | yadūrdhvaṃ caṣālasyāṅgulamātraṃ kāryaṃ
tatsādhyānāṃ devānām
29.16-2
tasya yaccaṣālaṃ tad indrasya saṃbandhi | caṣālasyordhvaṃ yad aṅgulamātraṃ kāryaṃ tad sādhyākhyānāṃ devānāṃ saṃbandhi
29.17
prācyāṃ saṃnamatyetadvai viṣṇoḥ paramaṃ padam
29.18
tasyartavaḥ śarīram | śiraḥ saṃvatsaraḥ | vedā rūpāṇi
saṃvatsara eva pratitiṣṭhati | ya evaṃ veda
Linked texts (1)
- Ṣaḍviṃśabrāhmaṇa — Sanskrit