[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Ṣaḍviṃśabrāhmaṇa](https://indike.org/pramana/in.veda.brahmana.sadvimsa) › [Shadvimshabrahmanatika](https://indike.org/pramana/in.veda.brahmana.sadvimsa!sadvimsabrahmanatika) › 23 # Ṣaḍviṃśa Brāhmaṇa ("26th" book) 23 Ṣaḍviṃśabrāhmaṇaṭīkā 23 - **Language:** Sanskrit ### [23.1](https://indike.org/pramana/in.veda.brahmana.sadvimsa!sadvimsabrahmanatika.23.1) atirātraścaturviṃśaṃ caturviṃśastomayuktaṃ prāyaṇīyamaharityete ādye ahanī | abhijidādyo viśvajidanto madhyamo navarātraḥ | mahāvratamatirātra ityete antime ahanī iti | tadetat satraṃ viśvadevakartṛkatvena somagṛhapatitvena ca praśaṃsati — ### [23.2](https://indike.org/pramana/in.veda.brahmana.sadvimsa!sadvimsabrahmanatika.23.2) rājñā dīptena somena gṛhapatinā saha viśve devāḥ satramāsata te evamabruvan naḥ asmākaṃ sarvatra sarveṣvapi lokeṣu soma eva rājā vibhavet viśeṣeṇa bhūyāditi | yata evaṃ tasmāt somo rājā sarvāṇi nakṣatrāṇi upaiti prāpnoti ādhipatyena | kiṃ ca, hi yasmāt somo retodhāḥ rasātmakatvena lohitādipariṇāmadvāreṇa retasa ādhāne hetuḥ | ato'pi somagṛhapatikaṃ satraṃ praśastamityarthaḥ | tadīyaṃ madhyamaṃ navarātraṃ stotumavayutyānuvadati— ### [23.3](https://indike.org/pramana/in.veda.brahmana.sadvimsa!sadvimsabrahmanatika.23.3) ya etatsatramupeyuḥ te saṃvatsarasya prakṛtibhūtasya saṃvatsarasādhyasya gavāmayanasya vikṛtitvāt trayodaśāhaṃ satramapi saṃvatsaranāmnocyate | tasyāntaḥ garbhaṃ madhyamaṃ navāham upayantīti | anūditamarthaṃ stauti— ### [23.4](https://indike.org/pramana/in.veda.brahmana.sadvimsa!sadvimsabrahmanatika.23.4) navāho vai navarātra eva saṃvatsarasya satrasya pratimā sadṛśaḥ tatratyānāṃ sarveṣāṃ stomānāṃ pṛṣṭhānāṃ ca atideśato vidyamānatvāt | tathā nava prāṇāḥ | ayaṃ navāho navasaṃkhyākāḥ prāṇāḥ | sapta śīrṣaṇyāḥ prāṇāḥ dvāvavāñcau (śa. brā. 6.4.2.5; tai. saṃ. 5.1.7.1) iti śruteḥ | ya etaṃ navāhamupeyuḥ te prāṇānevāvarundhate prāpnuvanti | prakārāntareṇa stauti— ### [23.5](https://indike.org/pramana/in.veda.brahmana.sadvimsa!sadvimsabrahmanatika.23.5) ya etā rātrīḥ | navarātramityarthaḥ | upayanti te prajāvantaḥ putrapautrādiyuktāḥ retodhānahetusomagṛhapatikayāgānuṣṭhānāt jīvāḥ śatavarṣalakṣaṇapuruṣāyuṣaśca santaḥ prāṇātmakatvanavarātropāyanāt jyotiḥ prakāśaṃ kīrtim aśnuvate prāpnuvanti | phalāntarasyātrāvidhānāt etadeva phalaṃ rātrisatranyāyenetyavagantavyam | ## Linked texts (1) - [Ṣaḍviṃśabrāhmaṇa](https://indike.org/pramana/in.veda.brahmana.sadvimsa.64.1-2) — Sanskrit --- Source: [https://indike.org/pramana/in.veda.brahmana.sadvimsa!sadvimsabrahmanatika.23](https://indike.org/pramana/in.veda.brahmana.sadvimsa!sadvimsabrahmanatika.23) · Pramāṇa