[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Ṣaḍviṃśabrāhmaṇa](https://indike.org/pramana/in.veda.brahmana.sadvimsa) › [Shadvimshabrahmanatika](https://indike.org/pramana/in.veda.brahmana.sadvimsa!sadvimsabrahmanatika) › 25 # Ṣaḍviṃśa Brāhmaṇa ("26th" book) 25 Ṣaḍviṃśabrāhmaṇaṭīkā 25 - **Language:** Sanskrit ### [25.1](https://indike.org/pramana/in.veda.brahmana.sadvimsa!sadvimsabrahmanatika.25.1) prajāpatirvidhātā purā tapo'tapyata cakāra | tasya tapasā tapyamānasya viśuddhasattvasya devān sṛjeyamiti mano buddhiḥ prājāyata | tataḥ te ime prasiddhā indrādayo devāḥ tena asṛjyanta | katham? divā ahani devān , naktaṃ rātrau asurān \[asṛjata\] | yat yato divā devānasṛjata prajāpatiḥ tad devānāṃ devatvam atiśayitadīptimattvam | yat yato asūryaṃ, na vidyate sūryo yasmin tat asūryaṃ naktam | kālādhvanoratyantasaṃyoge (pā. 2. 3. 5) iti dvitīyā | asurānasṛjatetyanuṣaṅgaḥ | tat tenāsurāṇāmasuratvaṃ karmaṇi prakāśarāhityam | yat yataḥ pītatvam | pā pāna iti dhātoḥ pīyanta iti kartari kvip | teṣāṃ bhāvaḥ pītatvam | kavyasyāmṛtasya pātṛtvam | tena pitṝṇāṃ pitṛtvam | santvetādṛśāḥ devāḥ | kiṃ tata ityatrāha— ### [25.2](https://indike.org/pramana/in.veda.brahmana.sadvimsa!sadvimsabrahmanatika.25.2) tataḥ te devāḥ agnihotrāt svargaṃ kāmayamānā santaḥ tapaḥ cakruḥ | teṣāṃ tapyamānānāṃ tebhyastapyamānebhyaḥ pṛthivyantarikṣaṃ dyauriti lokatrayātmako raso'jāyata | tatsārabhūtāḥ pṛthivyādayo lokā abhyatapan ṛgvedādīnuddiśya tapaścakruḥ | tebhyastapyamānebhyaḥ ṛgvedādyātmako raso'jāyata | katham ? pṛthivyā ṛgvedātmako rasaḥ samajani | evamuttaratrāpi | te vedā abhyatapan | tebhyo gārhapatyādyātmako raso'jāyata| katham? ṛgvedād gārhapatyo raso'jāyata | samānamanyat | te gārhapatyādayo'pyabhyatapan | tebhyastapyamānebhyaḥ sahasraśīrṣaḥ aparimitamūrdhā sahasrākṣaḥ asaṃkhyātanayanaḥ sahasrapāt aparimitapādaḥ puruṣo raso'jāyata | evaṃ caturtharasātmakatvāt praśastatamo'yaṃ puruṣa ityarthaḥ | bhavatvevam | tataḥ kimityatrāha— ### [25.3](https://indike.org/pramana/in.veda.brahmana.sadvimsa!sadvimsabrahmanatika.25.3) tataḥ te devā prajāpatiṃ sraṣṭāram upādhāvan | upetya ca vedaśarīraiḥ ṛgvedādyātmakaiḥ gārhapatyādibhiḥ yadidam amṛtaśarīramutpannaṃ tad idaṃ mṛtyorna samāpsyate samāptiṃ prāpnotīti | ha vā ityetāvaitihāsadyotanārthau | sa puruṣaḥ ko nāma kaḥ khalvasīti evaṃ prajāpatimabruvan | antima itikāro devānāṃ praśnaparisamāptidyotanārthaḥ | prajāpateruttaramāha— ### [25.4](https://indike.org/pramana/in.veda.brahmana.sadvimsa!sadvimsabrahmanatika.25.4) sa tairevaṃ pṛṣṭaḥ prajāpatiḥ uvāca | yajño nāma agnihotrayajña eva so'yaṃ puruṣaḥ nānyaḥ kaściditi | tadidaṃ vivikṣitamagnihotraṃ sadyoyajñasaṃsthātmakatvena praśaṃsati— ### [25.5](https://indike.org/pramana/in.veda.brahmana.sadvimsa!sadvimsabrahmanatika.25.5) teṣāmutpannānāṃ devānārthe prajāpatiḥ sadyoyajñasaṃsthāmupaiti | sadyaḥ samāpyamānayajñātmakatvādagnihotraṃ prāpnotītyarthaḥ | ata eva eṣo'gnihotrarūpo yajñaḥ sadyaḥ saṃsthāṃ samāptimupaiti prāpnoti | nanu dīkṣaṇīyādītikarttavyatāyā abhāvāt kathamasya yajñatvamityāśaṅkya prasiddhajyotiṣṭomādiyajñasādṛśyasiddhayartham atrāpi dīkṣaṇīyādītikarttavyatāṃ saṃpādayati— ### [25.6](https://indike.org/pramana/in.veda.brahmana.sadvimsa!sadvimsabrahmanatika.25.6) gārhapatyam agniṃ yat prāduṣkaroti agnihotrārthaṃ prādurbhāvayati sā dīkṣaṇīyā dīkṣaṇīyākhyeṣṭiḥ | prāthamyasāmyāt | dakṣiṇāgnimāhavanīyaṃ cāgniṃ yat prāduṣkaroti sā prāyaṇīyeṣṭiḥ upakārakatvasāmyāt | samidho'bhyādadhate samidādhānaṃ kurvanti iti yat tā upasadaḥ upasadākhyahomāḥ | atha agnihotre utpūtājyaskandane prāyaścittaṃ darśayati— ### [25.7](https://indike.org/pramana/in.veda.brahmana.sadvimsa!sadvimsabrahmanatika.25.7) athaśabdo vākyòpakrame | yasya yajamānasya utpūtam utpavanena saṃskṛtam ājyaṃ skandati pātrāt sā vai saiva skannā nāma skannarūpā āhutirbhavatīti | tato vai skannāhutyā yajamānaḥ pramāyurbhavati maraṇaśīlo bhavatītyarthaḥ | tasminnimitte varo deyaḥ gorūpāṃ dakṣiṇāṃ dadyādityarthaḥ | saiva dakṣiṇā tasya ājyaskandasya prāyaścittiḥ | pratyavāyaparihārārthaṃ karmetyāhurbrahmavādinaḥ | anutpūtājyaskandane prāyaścittamāha - ### [25.8](https://indike.org/pramana/in.veda.brahmana.sadvimsa!sadvimsabrahmanatika.25.8) atha punaḥ yasya yajamānasya saṃbandhi ājyam anutpūtam utpavanarahitaṃ skandati pātrāt, asāvaskannā nāma askannarūpā āhutiḥ | tataḥ tayaivāhutyā yajamānasya cittaṃ pramāyurvināśi bhavatīti tannimittaṃ citraṃ nānāvidhaṃ dravyaṃ deyam | saiva tasya prāyaścittiranutpūtaskandaprāyaścittiriti | agnihotre savanatrayaṃ saṃpādayati - ### [25.10](https://indike.org/pramana/in.veda.brahmana.sadvimsa!sadvimsabrahmanatika.25.10) atraivodayanīyādisaṃpattiṃ darśayati— ### [25.11](https://indike.org/pramana/in.veda.brahmana.sadvimsa!sadvimsabrahmanatika.25.11) annā annāni havīṃṣi ādadāti iti yat tena udayanīyasya etadākhyasya karmaṇaḥ udavasānīyasya ca samāptyai kṛtaṃ bhavatītyarthaḥ || 10-11 || agnihotra eva mathane agneranutpāde vikalpena prāyaścittaṃ darśayati— ### [25.12](https://indike.org/pramana/in.veda.brahmana.sadvimsa!sadvimsabrahmanatika.25.12) atha punaḥ yasya yajamānasya agnirmathyamāno yadi na jāyeta tarhi anyamāhṛtya laukikamagniReleasemānīya asminnavakāśe āhavanīyādhāre vyāhṛtibhirjuhuyāt | laukikāgnerapyabhāve brāhmaṇasya haste juhuyāt | evamanyadapi vyākhyeyat | tathā cāśvalāyanaḥ—agnihotrāya kāle'gnāvajāyamāne'nyamānīya juhuyāt | pūrvvābhābhe uttarottaraṃ brāhmaṇapāṇyajakarṇadarbhastambāpsu (ā. śrau. sū. 3.14.14-16) ityādi | agnihotre svayaṃkṛtahomastutyarthaṃ gauṇakartṛ\[pradarśana\]puraḥsaram uttarottaraṃ mukhyān kartṛn darśayati— ### [25.13](https://indike.org/pramana/in.veda.brahmana.sadvimsa!sadvimsabrahmanatika.25.13) anyaiḥ śiṣyādivyatiriktaiḥ śatahutān śataśo hutān kṛtān homān apekṣya śiṣyahutaḥ śiṣyeṇa kṛtaḥ eko homaḥ varam utkṛṣṭaḥ | evamanyadapi vyākhyeyam | astvevaṃ kiṃ tata ityāha— ### [25.14](https://indike.org/pramana/in.veda.brahmana.sadvimsa!sadvimsabrahmanatika.25.14) yata evamātmakṛto homaḥ praśastaḥ tasmāt svayaṃ hotā devānāmāhvātā svayameva dohī agnihotrārthaṃ payaso dogdhā san svayameva yajamānaḥ svayamevāgnihotramupatiṣṭheta | tatra dakṣiṇāṃ darśayati— ### [25.15](https://indike.org/pramana/in.veda.brahmana.sadvimsa!sadvimsabrahmanatika.25.15) haumyaśeṣaṃ hutāvaśiṣṭaṃ havireva dakṣiṇā | nānyadityarthaḥ | athoktamagnihotraṃ praśaṃsati— ### [25.16](https://indike.org/pramana/in.veda.brahmana.sadvimsa!sadvimsabrahmanatika.25.16) ya evam uktarītyā vidvān jānan agnihotraṃ juhoti etasya sarvairyajñakratubhiḥ eva iṣṭaṃ bhavati | sarve kratavaḥ kṛtā bhavantītyarthaḥ | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇe pañcamādhyāye prathamaḥ khaṇḍaḥ | yaduktamagnihotramātreṇaiva sarvakratubhiriṣṭaṃ bhavatīti tadetadākhyāyikayā upapādayati— ## Linked texts (1) - [Ṣaḍviṃśabrāhmaṇa](https://indike.org/pramana/in.veda.brahmana.sadvimsa.66.1.p1) — Sanskrit --- Source: [https://indike.org/pramana/in.veda.brahmana.sadvimsa!sadvimsabrahmanatika.25](https://indike.org/pramana/in.veda.brahmana.sadvimsa!sadvimsabrahmanatika.25) · Pramāṇa