[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Ṣaḍviṃśabrāhmaṇa](https://indike.org/pramana/in.veda.brahmana.sadvimsa) › [Shadvimshabrahmanabhashya (Sayana)](https://indike.org/pramana/in.veda.brahmana.sadvimsa!sayana) › 10 # Ṣaḍviṃśa Brāhmaṇa ("26th" book) 10 Ṣaḍviṃśabrāhmaṇabhāṣya (Sāyaṇa) 10 - **Language:** Sanskrit ### [10.1](https://indike.org/pramana/in.veda.brahmana.sadvimsa!sayana.10.1) yasmādagnernetāraḥ śālāmukhīyāduttaravedyādau prāñcamagnimunnayanti | tasmāddhotā prāṅāsīnaḥ prāṅmukha upaviṣṭo bhūtvā'nvāha anubravītīti | praiṣamanuvacanaṃ kuryāt | tathā prāṅāsīno yajati yājyāṃ paṭhet | prāṅāsīnaḥ śaṃsati śastraṃ paṭhati | dharmāntaramāha- ### [10.2](https://indike.org/pramana/in.veda.brahmana.sadvimsa!sayana.10.2) yasmādasau paridṛśyamāna ādityaḥ prāṅ prāggacchanaḥ apāṅ pratyaggacchanaḥ imān lokān saṃcarati pratyahaṃ, tasmādadhvaryuḥ svakarmaṇi prāṅapāṅ saṃcarati | dharmāntaraṃ darśayati- ### [10.3](https://indike.org/pramana/in.veda.brahmana.sadvimsa!sayana.10.3) athaśabdo vākyaupakrame | yata eṣa candramā dakṣiṇena pathā eti gacchati tasmād brahmāṇaṃ dakṣiṇato dakṣiṇadigbhāge āsayanti upaveśayanti | anyaṃ dharmaṃ darśayati— ### [10.4](https://indike.org/pramana/in.veda.brahmana.sadvimsa!sayana.10.4) yata etasyāṃ prasiddhāyām udīcyāṃ diśi bhūyiṣṭham adhikaṃ parjanyo vidyotate viśeṣeṇa svamahimānaṃ prakaṭayati tasmādudgātā etām udīcīṃ diśaṃ prati udaṅmukhaḥ san udgāyati | dharmāntaraṃ vidhatte— ### [10.5](https://indike.org/pramana/in.veda.brahmana.sadvimsa!sayana.10.5) bhūtānāṃ pṛthivyādīnāṃ madhye eṣa vyāpta ākāśaḥ sanno'vahito bhavati | tasmāt sadaso madhye sadasyaṃ saptadaśamṛtvijam āsayanti | dharmāntaraṃ vidhatte— ### [10.6](https://indike.org/pramana/in.veda.brahmana.sadvimsa!sayana.10.6) uta āpa uccāvacā nyūnādhikānyūnādhikabhāvena vartante uta api ca tā āpo gādhāḥ kacidapagatapratiṣṭhā iva bhavanti | uta api ca tā āpo gambhīrāḥ agādhā iva bhavanti | tasmā ddhotrāśaṃsino'pi pañcarcena śastreṇa stutiṃ kurvanti | uta api ca bhūyasā bahvībhiḥ ṛgbhiḥ sādhyena śastreṇa stutiṃ kurvanti | dharmāntaraṃ vidhatte— ### [10.7](https://indike.org/pramana/in.veda.brahmana.sadvimsa!sayana.10.7) ata ādityasyaiva gataṃ gamanaṃ raśmayaḥ tadīyāḥ anuyanti anugacchanti | tasmād adhvaryoreva gataṃ camasādhvaryavo'nuyantīti | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye dvitīyādhyāye caturthaḥ khaṇḍaḥ | atha camasamakṣaṇāyopahavādyaḥ kathyante + tatra prathamaṃ prātaḥsavanasaṃbandhina upahavān darśayati- ## Linked texts (1) - [Ṣaḍviṃśabrāhmaṇa](https://indike.org/pramana/in.veda.brahmana.sadvimsa.29.1-2) — Sanskrit --- Source: [https://indike.org/pramana/in.veda.brahmana.sadvimsa!sayana.10](https://indike.org/pramana/in.veda.brahmana.sadvimsa!sayana.10) · Pramāṇa