[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Ṣaḍviṃśabrāhmaṇa](https://indike.org/pramana/in.veda.brahmana.sadvimsa) › [Shadvimshabrahmanabhashya (Sayana)](https://indike.org/pramana/in.veda.brahmana.sadvimsa!sayana) › 27 # Ṣaḍviṃśa Brāhmaṇa ("26th" book) 27 Ṣaḍviṃśabrāhmaṇabhāṣya (Sāyaṇa) 27 - **Language:** Sanskrit ### [27.1](https://indike.org/pramana/in.veda.brahmana.sadvimsa!sayana.27.1) sakṣīraṃ kṣīravad‌vṛkṣaprakṛtikam | sthūlaṃ mūle mūlapradeśe | bālāgram agrapradeśe sūkṣmam | madhye ca anurūpam mūlapradeśāpekṣayā sthaulyābhāvena anurūpam etādṛśaṃ yūpaṃ karoti kuryādityarthaḥ | atha yathoktaṃ yūpaṃ vajratvena yajñavighnakarttṛrakṣoghnatvena ca praśaṃsati- ### [27.2](https://indike.org/pramana/in.veda.brahmana.sadvimsa!sayana.27.2) yūpo vajra eva | tathā ca taittirīyakam - indro vṛtrāya vajraṃ prāharat | sa tredhā vyabhak | sphyastṛtīyaṃ rathastṛtīyaṃ yūpastṛtīyam (tai. saṃ. 5.2.6. 1-2) iti | ataḥ asmai yajamānārthaṃ vajreṇaiva bhrātṛvyaṃ yāgavighnakāriṇaṃ rākṣasaṃ praharati | yūpasya aṣṭāśrīkaraṇaṃ vidhatte- ### [27.3](https://indike.org/pramana/in.veda.brahmana.sadvimsa!sayana.27.3) tasya yūpasya aṣṭasaṃkhyākā aśrīḥ karoti kuryāt | dikṣu catasraḥ vidikṣu catasra iti | tat praśaṃsati— ### [27.4](https://indike.org/pramana/in.veda.brahmana.sadvimsa!sayana.27.4) tathā sati ūrdhvādhodigbhyāṃ saha daśa diśaḥ parigṛhītavān bhavati | tataśca yūpe yūpaviṣaye ubhayataḥ dvayoḥ pārśvayoḥ dve pāṅkte dve pañcasaṃkhye karoti kṛtavān bhavati | pañcapadā paṅktiḥ (sa. a. sū. 5-6) iti saṃkhyāmnānāt | vikalpena dharmāntaraṃ darśayati— ### [27.5](https://indike.org/pramana/in.veda.brahmana.sadvimsa!sayana.27.5) pañcadaśāratniṃ vā saptadaśāratniṃ vā ekaviṃśatyaratniṃ vā kuryāt | yūpasya kāmyāni prakṛtidravyāṇi darśayati— ### [27.6](https://indike.org/pramana/in.veda.brahmana.sadvimsa!sayana.27.6) puṣṭikāmasya pālāśaprakṛtikaṃ yūpaṃ kuryāt | evamanyadapi yojyam | yajñiyaṃ yajñāhaṃ yatkiṃca vaikaṅkatādikaṃ vṛkṣajātamasti tatprakṛtikaṃ yūpaṃ paśukāmasya kuryāt | pālāśādiṣveva varjanīyān pratijñāpūrvakaṃ darśayati— ### [27.7](https://indike.org/pramana/in.veda.brahmana.sadvimsa!sayana.27.7) tatra teṣu varjanīyā bhavanti gaḍulo granthiyuktaḥ | vraṇilaḥ pakṣādikṛtavraṇopetaḥ | vyāvṛtaḥ viruddhāvṛttaḥ apradakṣiṇāvarta ityarthaḥ | kuṣṭhiḥ muṇḍaḥ kuṭilo vā | kubjaḥ śūlaḥ | kubjo vakrāgraḥ śūlastīkṣṇāgraḥ | dagdhaḥ dāvāgninā | śuṣkaḥ nīrasaḥ | suṣiraḥ sanālaḥ | ghuṇajagdhaḥ kṛmyādibhirbhakṣitaḥ | ityete apraśastāḥ | pratijñāpūrvakamupādeyān darśayati— ### [27.8](https://indike.org/pramana/in.veda.brahmana.sadvimsa!sayana.27.8) athāpraśastapradarśanānantaraṃ praśastā ucyanta iti śeṣaḥ | śuddhāvartāḥ pradakṣiṇāvartāḥ anupūrvasamāḥ ānupūrvyeṇa samāśca praśastā upādeyā ityarthaḥ | yūpāśridevatāḥ pratijñāpūrvaṃ darśayati— ### [27.9](https://indike.org/pramana/in.veda.brahmana.sadvimsa!sayana.27.9) atha yūpasyā'śridevatānyucyanta iti śeṣaḥ | pūrvāyāmaśrāvagnirdevatā | anyatsamānam | yā vidiśaḥ santi tā vidiśaste prasiddhā ādityādayo yathāsaṃkhyamadhitiṣṭhanti | aparājitāḥ | yasyāṃ diśi devā asuraiḥ parājitā nābhavan sā aparājitā | adharā digityarthaḥ | sā pitṛbhyaḥ | ūrdhvāyāṃ ca diśi sādhyāḥ tiṣṭhanti | \[sā\] taddevatyetyarthaḥ | ### [27.10](https://indike.org/pramana/in.veda.brahmana.sadvimsa!sayana.27.10) ata eva sarvadevatyo yūpaḥ | kiṃ ca yūpo'nekāśritvād bahurūpa eva yad vajrībhūtvā vajrātmakatvaṃ pratipadya devānupatiṣṭhate | ### [27.11](https://indike.org/pramana/in.veda.brahmana.sadvimsa!sayana.27.11) prāptayūgāste devāḥ prajāpatimupādhāvan | upetya ca te labdhānujñāḥ santaḥ yūpena vajrātmakena rākṣasān praharanti āropayanti āvṛṇvate ca | tathā āyodhayanti taiḥ saha yuddhaṃ kurvanti tat tena yūpasya yūpatvam | ### [27.12](https://indike.org/pramana/in.veda.brahmana.sadvimsa!sayana.27.12) pitrādisaṃbandhena yūpaṃ punaḥ stauti— ### [27.13](https://indike.org/pramana/in.veda.brahmana.sadvimsa!sayana.27.13) tasya yūpasya yannaikhānyaṃ nikhanasaṃbandhi sthānaṃ tat pitṝṇām āśrayaḥ | yadūrdhvaṃ sthānaṃ tanmanuṣyāṇām | raśanāyā yūpe baddhāyā darbhamayyā rajjvā adho yat sthānaṃ tat oṣadhivanaspatīnām | tadadhiṣṭhātṛdevānāmityarthaḥ | raśanāyā ūrdhvaṃ yat sthānaṃ tadviśreṣāṃ devānām | āśraya ityarthaḥ | dharmāntarāṇi darśayati— ### [27.14](https://indike.org/pramana/in.veda.brahmana.sadvimsa!sayana.27.14) yūpam āplāvayanti abhiṣiñceyuḥ | tathā alaṃkurvanti | kiṃ ca | ahatena vasanena vastreṇa ācchādayanti ācchādayeyuḥ | yathoktamāplāvanādikaṃ praśaṃsati— ### [27.15](https://indike.org/pramana/in.veda.brahmana.sadvimsa!sayana.27.15) tadetadāplāvanādi gandharvāṇāmapsarasāṃ cārthe kṛtaṃ bhavati | tadīyaṃ caṣālaṃ tadūrdhvapradeśaṃ ca indrādisaṃbandhena praśaṃsati— ### [27.16](https://indike.org/pramana/in.veda.brahmana.sadvimsa!sayana.27.16) sapraśaṃsaṃ dharmāntaraṃ vidhatte— ### [27.17](https://indike.org/pramana/in.veda.brahmana.sadvimsa!sayana.27.17) taṃ yūpaṃ prācīṃ diśaṃ prati saṃnamati saṃnamayedityarthaḥ | etadvai etadeva prācīsaṃnamanaṃ viṣṇordevasya paramam utkṛṣṭaṃ padaṃ sthānam | punaryūpaṃ tadīyaśarīrāderṛtvādyātmakatvenopavarṇanena praśaṃsati— ### [27.18](https://indike.org/pramana/in.veda.brahmana.sadvimsa!sayana.27.18) tasya yūpasya śarīraṃ vasantādyṛtavaḥ | śiraḥ saṃvatsaraḥ | vedāśca rūpāṇi ityevaṃ yo veda sa saṃvatsara eva pratitiṣṭhati | dīrghāyurbhavatītyarthaḥ | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye pañcamādhyāye caturthaḥ khaṇḍaḥ | atha saviśeṣāṃ saṃdhyāṃ praśnapūrvakamākhyāyikayā nirūpayituṃ brahmavādināṃ praśnaṃ tāvadupasthāpayati— ## Linked texts (1) - [Ṣaḍviṃśabrāhmaṇa](https://indike.org/pramana/in.veda.brahmana.sadvimsa.72.5) — Sanskrit --- Source: [https://indike.org/pramana/in.veda.brahmana.sadvimsa!sayana.27](https://indike.org/pramana/in.veda.brahmana.sadvimsa!sayana.27) · Pramāṇa