[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Ṣaḍviṃśabrāhmaṇa](https://indike.org/pramana/in.veda.brahmana.sadvimsa) › [Shadvimshabrahmanabhashya (Sayana)](https://indike.org/pramana/in.veda.brahmana.sadvimsa!sayana) › 30 # Ṣaḍviṃśa Brāhmaṇa ("26th" book) 30 Ṣaḍviṃśabrāhmaṇabhāṣya (Sāyaṇa) 30 - **Language:** Sanskrit ## Contents - [30.2](https://indike.org/pramana/in.veda.brahmana.sadvimsa!sayana.30.2) — 5 parts - [30.3](https://indike.org/pramana/in.veda.brahmana.sadvimsa!sayana.30.3) — 4 parts ### [30.1](https://indike.org/pramana/in.veda.brahmana.sadvimsa!sayana.30.1) eṣu lokeṣu pṛthivyādilokaviṣaye devāścāsurāśca parasparam aspardhanta | asurebhyaḥ spardhamānā devāḥ prajāpatimupādhāvan | tataḥ prajāpatistebhya upasannebhyo devebhya etāṃ vakṣyamāṇāṃ daivīṃ devasaṃbandhinīṃ śāntiṃ śatrukṛtopadravanirharaṇasādhanabhūtāṃ prāyacchaditi | tataḥ kimityatrāha— saḥ vakṣyamāṇādbhutaviśeṣanimittavān prācīṃ diśam anvīkṣya āvartate 5 homakaraṇārthaṃ pravartate | vakṣyamāṇānāmadbhutaviśeṣāṇāṃ prācyā diśo'pi indrādisaṃbandhitvāviśeṣāt | idānīṃ nimittaviśeṣān darśayati— saḥ vakṣyamāṇādbhutaviśeṣanimittavān homādhikārī dakṣiṇāṃ diśam anvīkṣya āvartate | homārthaṃ pravartate | nimittaviśeṣāṇāṃ dakṣiṇāyā diśo'pi yāmyatvāviśeṣāt | idānīṃ nimittaviśeṣān darśayati— sa vakṣyamāṇanimittavān adhikārī pratīcīṃ paścimāṃ diśam anvīkṣya āvartate homakaraṇārthaṃ pravarteta | tannimittaviśeṣāṇāṃ pratīcyā diśaśca varuṇasaṃbandhitvāviśeṣāt | idānīṃ nimittaviśeṣān darśayati— sa vakṣyamāṇanimittavān adhikārī udīcīṃ diśam anvīkṣya āvartate pravartate homārtham | nimittaviśeṣāṇām udīcyā diśaśca vaiśravaṇasaṃbandhitvāviśeṣāt | idānīṃ nimittaviśeṣān darśayati— sa nimittaviśeṣavān pṛthivīmanvīkṣyāvartate homārthaṃ pravartate | vakṣyamāṇanimittānāṃ pṛthivyāśrayatvaviśeṣāt | idānīṃ nimittaviśeṣān darśayati- vakṣyamāṇanimittānāmantarikṣasya ca vāyusaṃbandhāviśeṣāt vakṣyamāṇanimittaviśeṣavānadhikārī antarikṣam anvīkṣya homārthaṃ pravartate | idānīṃ nimittaviśeṣān darśayati-- sa vakṣyamāṇanimittavān divaṃ dyulokamanvīkṣyāvartate | pravartate homārtham | divo vakṣyamāṇanimittānāṃ ca somasaṃbandhitvāviśeṣāt | idānīṃ nimittaviśeṣān darśayati— sa vakṣyamāṇādbhutaviśeṣanimittavānadhikārī parām utkṛṣṭāṃ vaiṣṇavīṃ 5 divam anvīkṣyāvartate | homārthaṃ pravartate | nimittānāṃ diśa(va ?)śca vaiṣṇavatvāt | idānīṃ nimittaviśeṣān darśayati— ### [30.2.1](https://indike.org/pramana/in.veda.brahmana.sadvimsa!sayana.30.2.1) tataḥ anantaraṃ te devāḥ śāntīkāḥ | praharaṇārthe śaktiyaṣṭyorīkak (pā. 4.4.59) iti vihita īkakpratyayo bāhulakācchānterapi bhavati | tena prajāpatidarśitaśāntihomāyudhāḥ santaḥ asurānabhyajayan | tato devāḥ śatrukṛtopadravarahitā abhavan | asurāstu parābhūtā āsan | kiṃ ca, ya evamuktaprakāreṇa veda tasyāsya bhrātṛvyaḥ śatruḥ ātmanā svenaiva parāmavati | yadarthamākhyāyikā darśitā taṃ homaṃ setikartavyatākaṃ darśayati— atha punaḥ yadāsya puruṣasya saṃbandhināṃ maṇiḥ hārādisaṃbaddhaḥ | tadādīnāṃ daraṇaṃ bhedanam | āyāsaḥ cittapīḍā | athavā rājakulena saha 15 vivādo bhavet | tathā yānam āndolikā | tadādīnāṃ bhañjaneṣu | teṣu bhagneṣvityarthaḥ | api vā, gajavājiprabhṛtayaḥ apramīyāḥ pramāpaṇāyogyāḥ yadi pramīyante | ityevamādīni hārādibhañjanādīni tānyetāni sarvāṇi adbhutāni indradevatyāni prāyaścittāni prāyaścittanimittāni bhavantītyarthaḥ | evaṃ nimittāni darśayitvā idānīṃ taddoṣanibarhaṇasādhanaṃ setikarttavyatākaṃ homaṃ darśayati— atha punaḥ yadāsya puruṣasya saṃbandheṣu prajayā putrādikayā sahiteṣu gavādiṣu svaśarīre vāriṣṭāni pīḍāḥ prādurbhavanti | athavā anekavidhā jvarādayo vyādhayaḥ prādurbhavanti | tathā atisvapnaṃ duḥsvapnaṃ dṛśyeta | asvapnam anidrā | atibhojanaṃ bhasmakarogavaśena bahutaramabhyavahāraḥ | evaṃ nimittaviśeṣān darśayitvā idānīṃ taddhetudoṣanirharaṇasādhanaṃ homaṃ setikartavyatākaṃ darśayati— ### [30.2.2](https://indike.org/pramana/in.veda.brahmana.sadvimsa!sayana.30.2.2) atha yadāsya puruṣasya kṣetragṛhasaṃstheṣu kṣetrastheṣu gṛhasthiteṣu vā dhānyeṣvītayaḥ vakṣyamāṇāḥ prādurbhavanti | ītīreva pradarśayati | ītayo vā anekavidhā anekaprakārāḥ khalu | ākhuḥ mūṣikaḥ | pataṅgaḥ pakṣiviśeṣaḥ | pipīlikāḥ prasiddhāḥ | madhvakā madhumakṣikāḥ | bhaumakāḥ bhūmau bhavāḥ kṣudrajantavaḥ | śukāḥ kīrāḥ | śarabhakāḥ prasiddhāḥ | saukṣmakāḥ sūkṣmasaṃbandhijantavaḥ | ityevamādīni ativṛṣṭyādīni | tānyetāni sarvāṇyadbhutāni varuṇadevatyāni prāyaścittāni prāyaścittanimittāni bhavanti | atha taddhetupāpanirharaṇasādhanaṃ homaṃ setikartavyatākaṃ darśayati— atha punarasya puruṣasya yadā kanakādibhyo viyogo bhavati | athavā ārambhā udyogā vipadyante | niṣphalā bhavanti | athavā, anyāni krūrāṇi piśācādidarśanādīni, api vā mitrāṇi suhṛdo virajyante vidviṣanti | athavā, ariṣṭāni duḥkhasūcakāni | vayāṃsi kākādīni svagṛhamadhyāsate | vālmīkabhaumāni bhūmau bhavāni prāṇijātāni jāyante | prādurbhavanti | athavā chatrākaṃ siligraha upadṛśyate | athavā madhūni saraghā vābhinilīyante svagṛhe | evamādīni tānyetāni sarvāṇi anyānyapi ad‌bhutāni vaiśravaṇadevatyāni kauberāṇi prāyaścittāni prāyaścittanimittāni bhavanti | atha punarasya saṃbandhinī pṛthivī taṭati taṭataṭeti śabdaṃ karoti | sphuṭati bhidyate | kūjati śabdaṃ karoti | kampati kampate | jvalati ### [30.2.3](https://indike.org/pramana/in.veda.brahmana.sadvimsa!sayana.30.2.3) agnyādisaṃbandhaṃ vinaiva | rudati roditi | dhūmāyati agniṃ vinaiva dhūmapracuro bhavati | akasmātsalilamudgirati vṛṣṭiṃ vinaiva | tathā salile prakṣiptaḥ pāṣāṇaḥ plavanna majjati plavamāna eva tiṣṭhati, na tu majjati | nimagnaṃ mṛtaśarīram udake prakṣiptaṃ notplavati, kiṃ tu nimajjati | kiṃ ca, akāle puṣpaṃ ca phalaṃ ca puṣpaphalam abhinirvartati vṛkṣamabhito jāyate | tathā aśvataryāṃ garbho jāyate | aśvataryāḥ prajāpatinā ātterataskatvāt garbhābhāvaḥ | tasmādaśvatarī aprajā | ātteratā hi (tāṃ. brā. 6.1.4.) iti śruteḥ | tathā yadā yasmin deśe hastinī kariṇī majjati nirnimittamudake nimajjati | tathā yatra yasmin deśe bhūkampo jāyate tatra tadā taddeśādhipatī rājā vinaśyati | kiṃ ca yadā gaurgṛhamārohet grāmamahiṣī vā | gṛhamārohed ityanuṣaṅgaḥ | āraṇyakamahiṣyā gṛhārohaṇāsaṃbhavād grāmamahiṣīti viśeṣaṇam | ityevamādīni grāmasūkarādergṛhārohaṇādīni ityādiśabdārthaḥ | tānyetāni sarvāṇyadbhutānyagnidevatyāni prāyaścittāni prāyaścittanimittāni bhavanti | tatra taddhetuduritāpūrvanibarhaṇasādhanaṃ homaṃ setikartavyatākaṃ darśayati— ### [30.2.4](https://indike.org/pramana/in.veda.brahmana.sadvimsa!sayana.30.2.4) atha punarasya deśā yadā vivātā vātamātrarahitā ativātā atiśayitavātā vāyante | aya vaya gatāviti dhātuḥ | svaritet (Cp. pā. 1.3.72) | abhreṣu ca aparūpaṇi parvatādiṣu nirnimittaṃ bhraṃśakṛtāni virūddhāni rūpāṇi dṛśyante | tathā asya gṛhāṇi | kharaḥ gardabhaḥ | karabhakaḥ kramelakaḥ | mantho mṛgaviśeṣaḥ | kaṅkaḥ pakṣiviśeṣaḥ | kapotādayaḥ prasiddhāḥ | gomāyuḥ kroṣṭā | etaiḥ praviṣṭāni dṛśyante | kiṃca, upari antarikṣe pāṃsavo dhūlayaḥ | māṃsapeśī māṃsakhaṇḍaḥ | asthirudhire prasiddhe | eteṣāṃ varṣāṇi pravartante | tathā kākamithunāni kākamaithunāni dṛśyante | tathā rātrau maṇidhanuṃ indradhanuḥ paśyet | kiṃ ca śaśakāḥ śaśāśca grāmaṃ yadā praviśanti | vṛkṣāśca rudhirāṇi stravanti | ākāśe rājakulaṃ vasati | gandharvanagarādikamavasthitaṃ dṛśyata iti śeṣaḥ | ityevamādīni | tānyetāni sarvāṇi vāyudevatyānyadbhutāni prāyaścittāni prāyaścittanimittāni bhavanti | atha taddhetuduritāpūrvanibarhaṇasādhanaṃ homaṃ vidhyantasahitaṃ darśayati— atha punarasya gocare yadā tārāvarṣāṇi nakṣatravṛṣṭayaḥ patanti jāyanta ityarthaḥ | ulkāśca nipatanti diśo dhūmāyanti | nirnimittaṃ dhūmayuktā iva dṛśyanta ityarthaḥ | tathā tā eva dahyanti dahyante; jvālārūpā dṛśyante ityarthaḥ | kiṃca, antarikṣe ketavo dhūmaketavaḥ uttiṣṭhanti | tathā gavāṃ śṛṅgeṣu viṣāṇeṣu dhūmo jāyate | tathā gavāṃ staneṣu rudhiram eva sravati; na payaḥ | kiṃca, atyarthaṃ himaṃ bahulaṃ nipatatītyevamādīni sarvāṇyadbhutāni somadevatyāni prāyaścittanimittāni bhavanti | idānīṃ taddhetuduritāpūrvaparihārārthaṃ homaṃ darśayati— ### [30.2.5](https://indike.org/pramana/in.veda.brahmana.sadvimsa!sayana.30.2.5) atha punarasya puruṣasya yadā yānāni ayuktāni ayogyāni kharamahiṣādīni pravartante | svapnāvasthāyāṃ tathāsya gocare bhavati | tathā devatāyatanāni kampante | nirnimittaṃ calanti | tathā daivatapratimā isanti hāsaṃ kurvanti | tathā rudanti aśrūṇi vimuñcanti | gāyanti gānaṃ kurvanti | nṛtyanti gātrāṇi vikṣipanti | sphuṭanti ekadeśataḥ sphuṭanaṃ prāpnuvanti | tathā svidyanti svedanaṃ prāpnuvanti | bhidyanti vidīryante | unmīlanti netronmīlanaṃ kurvanti | nimīlanti ca | tathā nadyaśca pratiprayānti vaiparītyena pravahanti | kiṃca, āditye tapati sati kabandhaṃ śirorahitaṃ śarīraṃ svacchāyāyāḥ dṛśyate | tathā vijale jalarahite avṛṣṭikāle pariviṣyate candrādityayoḥ pariveṣo dṛśyate | tathā ketavo dhvajāḥ | patākāḥ kṣudradhvajāḥ | chatravajraviṣāṇāni,-viṣāṇaṃ gajaviṣāṇanirmitam, -etāni niṣkāraṇaṃ prajvalanti | aśvānāṃ ca vāladhīṣu aṅgārāḥ kṣaranti patanti | ahatāni daṇḍādibhiratāḍitāni idānīṃ taddhetuduritāpūrvabarhaṇasādhanaṃ homaviśeṣaṃ setikarttavyatākaṃ darśayati — ### [30.3.1](https://indike.org/pramana/in.veda.brahmana.sadvimsa!sayana.30.3.1) athaśabdo vākyopakrame | pūrvāhna eva prātaḥ \[āhutiṃ\] naityakāgnihotrahomaṃ hutvā vīraṇān tatsaṃjñakān tṛṇaviśeṣān | phalavatīṃ priyaṅgum | anyat prasiddham | ityetāni darbhādīni saṃbhāradravyāṇi svayameva āhared yajamānaḥ | putrādinā vā āhārayet | āhṛtya ca tāni snātaḥ prayataḥ vāgyataḥ śuciḥ san śuddhavāsāḥ nityatantreṇa naityakena tantreṇa sthaṇḍilamupalipya gomayena | tatsthaṇḍilam adbhiḥ prokṣya | lakṣaṇaṃ svaśākhoktavidhimanatikramya darbhaiḥ sthaṇḍilam ullikhya punaradbhiḥ abhyukṣya agnimupasamādhāya, indrāyendo marutvate (sa0 472) ityādyairindrādidevatyairagnibhiḥ pūrvoktairmantrairvakṣyamāṇairdravyaiḥ indrādīnuddiśya pratyekamaṣṭottaraśataṃ juhuyāditi śeṣaḥ | dravyāṇāṃ pradarśanam - odanetyādi | kṛsaraṃ mudgādimiśraistaṇḍulaiḥ pakvamannam | raktapāyasaṃ raktaśālitaṇḍulaiḥ pakvaṃ pāyasam | ghṛtapāyasaṃ ghṛtamiśreṇa kṣīreṇa pakvaṃ pāyasam | anyat prasiddham | ete sarve odanādayo dravyaviśeṣāḥ pṛthak ghṛtottarāḥ caravaḥ | eteṣāmalābhe ghṛtottarāścarava eva grāhyā ityarthaḥ | athavā, sarveṣāṃ teṣāmalābhe pāyasaḥ paramānnameva grāhyamityarthaḥ | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye ṣaṣṭhādhyāye dvitīyaḥ khaṇḍaḥ | idānīmaindrādbhutaviśeṣe homaviśeṣaṃ darśayituṃ tadaṅgatvena kaṃcinniyamaṃ tāvaddarśayati— ### [30.3.2](https://indike.org/pramana/in.veda.brahmana.sadvimsa!sayana.30.3.2) sthālīpākaṃ sthālīpākavidhānamanatikramya caruṃ śrapayitvā indrāyendo marutvate pavasva madhumattamaḥ arkasya yonimāsadam || (sā. 472) ityanayā ṛcā taṃ hutvā punarindrāya svāhetyādibhiḥ pañcabhirmantraiḥ pañcabhirāhutibhirabhijuhoti | juhuyāt | tatastatra nyūnātiriktaprāyaścittārthaṃ bhūḥ svāhetyādibhirvyāhṛtibhirhutvā atha paścāt indrāyendo (sā. 472) ityasyāmṛci aṣṭottaraśataṃ sāma gāyet | anantaraṃ svastivācanādikaṃ pūrvavat kuryāt | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇe ṣaṣṭhādhyāye tṛtīyaḥ khaṇḍaḥ | yābhyanimittaviśeṣe homaviśeṣaṃ darśayituṃ tadarthamapi kiṃcinnimittaṃ darśayati— nāke suparṇam (sā0 320) ityanayā sthālīpākaṃ hutvā punaryamāya svāhetyādibhiḥ pañcabhirmantraiḥ pañcabhirā jyāhutibhirabhijuhoti juhuyāt | tatastatra nyūnātirekaprāyaścittārthaṃ vyāhṛtibhirhutvā atha paścāt nāke suparṇam (sā0 320) ityasyāmṛci sāma gāyet | pūrvavat svastivācanaṃ kuryāditi | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye ṣaṣṭhādhyāye caturthaḥ khaṇḍaḥ | atha vāruṇanimittaviśeṣe homaviśeṣaṃ darśayituṃ tadarthaṃ niyamaṃ darśayati— iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye ṣaṣṭhādhyāye pañcamaḥ khaṇḍaḥ | 5 || atha vaiśravaṇanaimittikaṃ homaṃ darśayituṃ tadarthamapi kiṃcinniyamaṃ darśayati— ### [30.3.3](https://indike.org/pramana/in.veda.brahmana.sadvimsa!sayana.30.3.3) abhi tyaṃ devam̐ savitāramoṇyoḥ kavikratumarcāmi satyasavam̐ ratnadhāmabhi priyaṃ matim | ūrdhvā yasyāmatirbhā adidyutatsavīmani hiraṇyapāṇiramamīta sukratuḥ kṛpā svaḥ || (sā. 464) ityeṣā ṛk | anyat pūrvavadvyākhyeyam | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇe 'ṣaṣṭhādhyāye ṣaṣṭhaḥ khaṇḍaḥ | 6 || atha agnidevatākanimittaviśeṣe homaviśeṣaṃ darśayituṃ tadarthamapi niyamaṃ darśayati- agniṃ dūtaṃ vṛṇīmahe hotāraṃ viśvavedasam | asya yajñasya sukratum || (sā. 3) ityanayā ṛcā sthālīpākavidhānena caruṃ śrapayitvā taṃ hutvā punaragnaye svāhetyādibhiḥ pañcabhiḥ mantraiḥ pañcabhira|jyāhutibhirabhijuhoti | juhuyāt | punarnyūnātirekaprāyaścittārthaṃ vyāhṛtibhirhutvā yathoktāyāmṛci pūrvavat sāma gāyet | svastivācanādi pūrvavat | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye ṣaṣṭhādhyāye saptamaḥ khaṇḍaḥ | 7 || atha vāyudevatākanimittaviśeṣe homaviśeṣaṃ darśayituṃ tadaṅgatvenādau antarikṣanirīkṣaṇapūrvakamāvartanaṃ darśayati-- vāta ā vātu bheṣajam̐ śambhu mayobhu no hṛde| pra na āyūm̐ṣi tāriṣat || (sā. 184) ityeṣā ṛk | anyat pūrvavad vyākhyeyam | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye ṣaṣṭhādhyāye aṣṭamaḥ khaṇḍaḥ | 8 || atha somadevatākanimittaviśeṣe homaviśeṣaṃ darśayituṃ tadaṅgatvena dyunirīkṣaṇapūrvakamāvartanaṃ darśayati— ityeṣā ṛk | anyat pūrvavad vyākhyeyam | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye ṣaṣṭhādhyāye navamaḥ khaṇḍaḥ | 9 || ### [30.3.4](https://indike.org/pramana/in.veda.brahmana.sadvimsa!sayana.30.3.4) atha vaiṣṇavādadbhutaviśeṣe homaviśeṣaṃ darśayituṃ tadaṅgatvena parasyā divo 'nvīkṣaṇapūrvakamanāvartanaṃ darśayati— sthīlāpākaṃ sthālīpākavidhānamanatikramya caruṃ śrapayitvā, idaṃ ³²³viṣṇurvi³²cakrame ³¹tredhā ²²ni ³²dadhe ¹²padam | samūḍhamasya ⁷²pām̐sule || (sā. 222) ityanayā ṛcā hutvā punar viṣṇave svāhetyādibhiḥ pañcabhirmantraiḥ pañcabhira|jyāhutibhirabhirjuhoti | tatastannyūnātirekaprāyaścittārthaṃ vyāhṛtibhirhutvā atha paścāt idaṃ viṣṇuḥ (sā. 222) ityasyāṃ vaiṣṇavyāmṛci sāma aṣṭottaraśataṃ gāyet | śuddhe bhūtale homaṃ kuryāditi darśayituṃ bhūśuddhihetuṃ darśayati— ### [30.4](https://indike.org/pramana/in.veda.brahmana.sadvimsa!sayana.30.4) khananāt kuddālādibhiḥ | dahanādagninā | abhimarśanāt mantrapūrvakaṃ hastena | gobhirākramaṇācca ityetaiḥ khananādibhiḥ caturbhiḥ bhūmiḥ śudhyate | tathā pañcamāt gomayenopalepanāt bhūmiḥ śudhyata ityanuṣaṅgaḥ | sāmagānānantaraṃ kiṃ kuryādityata āha— ### [30.5](https://indike.org/pramana/in.veda.brahmana.sadvimsa!sayana.30.5) tataḥ saṃbhārān prāguktān darbhādīn homasaṃbhārān pradakṣiṇaṃ yathā bhavati tathā homasamīpadeśamānīya brāhmaṇānupaveśya svasti vācya puṇyāhavācanaṃ kṛtvā karma samāpayediti śeṣaḥ | saṃbhārāṇāṃ madhye kasyacidupahatau tasyābhyukṣaṇaṃ śuddhihetutvena vidhatte— ### [30.6](https://indike.org/pramana/in.veda.brahmana.sadvimsa!sayana.30.6) etaiḥ yathoktaiḥ saṃbhāraiḥ yadupaspṛṣṭam upahataṃ tad dravyam abhyukṣet svastidā viśaspatiḥ (ṛ. ve. 10.152.2) ityādiḥ svastivācanamantraiḥ | ataḥ abhyukṣaṇādupahatidoṣaḥ śāmyatyeva | naimittikahomāṅgatvena brāhmaṇabhojanaṃ dakṣiṇāṃ ca darśayati— homānantaraṃ brāhmaṇabhojanam | bhujerṇyantāllyuṭ | brāhmaṇān bhojayedityarthaḥ | tathā tasmin home hiraṇyaṃ kanakaṃ gauśca vāsaśca aśvo bhūmiriti 5 caitā dakṣiṇāḥ suvarṇādikamṛtvigbhyo dadyāt | ataḥ evaṃ sāṅgahomānantaram adbhutādisūcito doṣaḥ śāmyatyeva | yathoktaṣaṣṭhādhyāyapratipāditaḥ eṣa homaḥ śāntyarthaḥ | aindrādyadbhutasūcitaduritāpūrvaśāntyarthaḥ | dviruktirādarārthā | adhyāyasamāptidyotanārthā ca | iti śrīsāyaṇācāryaviracite mādhavīye sāmavedārthaprakāśe ṣaḍviṃśabrāhmaṇabhāṣye 10 ṣaṣṭhādhyāye daśamaḥ khaṇḍaḥ | 10 || 11 ## Linked texts (1) - [Ṣaḍviṃśabrāhmaṇa](https://indike.org/pramana/in.veda.brahmana.sadvimsa.81.1-2) — Sanskrit --- Source: [https://indike.org/pramana/in.veda.brahmana.sadvimsa!sayana.30](https://indike.org/pramana/in.veda.brahmana.sadvimsa!sayana.30) · Pramāṇa