Samavedabrahmananyashtau 261
Sāmavedabrāhmaṇānyaṣṭau 261
- Language
- Sanskrit
261.1
adite'numanyasva| anumate'numanyasva| sarasvatyanumanyasva
deva savitaḥ prasuva yajñaṃ prasuva yajñapatiṃ bhagāya| divyo gandharvaḥ
ketapūḥ ketaṃ naḥ punātu vācaspatirvācaṃ naḥ svadatu
261.2
kāma veda te
nāma mado nāmāsi samānayāmuṃ surā te abhavat| paramatra janmāgne
tapaso nirmito'si svāhā
261.3
imaṃ ta upasthaṃ madhunā saṃsṛjāmi
prajāpatermukhametaddvitīyam| tena puṃso'bhi bhavāsi sarvān vaśān
vaśinyasi rājñī svāhā
261.4
agniṃ kravyādamakṛṇvan guhānāḥ
strīṇāmupasthamṛṣayaḥ purāṇāḥ| tenājyamakṛṇvaṃstraiśrṛṅgaṃ tvāṣṭraṃ tvayi
taddhātu svāhā
261.5
yā akṛntannavayan yā atanvata yāśca devyo
antānabhito tatantha| tāstvā devyo jarasā saṃvyayantvāyuṣmatīdaṃ
paridhatsva vāsaḥ
261.6
paridhatta dhatta vāsasaināṃ śatāyuṣīṃ kṛṇuta
dīrghamāyuḥ| śatañca jīva śaradaḥ suvarcā vasūni cāryeṃ vibhṛjāsi
jīvan
261.7
somo'dadadgandharvāya gandharvo'dadadagnaye| rayiṃ ca
putrāṃścādādagnirmahyamatho imām
261.8
pra me patiryā naḥ panthāḥ
kalpatām| śivā ariṣṭā patilokaṃ gameyam
261.9
prāsyāḥ patiryā
naḥ panthāḥ kalpatām| śivā ariṣṭā patilokaṃ gamyāḥ
261.10
agniretu prathamo devatābhyaḥ so'syai prajāṃ muñcatu mṛtyupāśāt| tadayaṃ
rājā varuṇo'numanyatāṃ yatheyaṃ strī pautramaghaṃ na rodāt svāhā
261.11
imāmagnirgāyatāṃ gārhapatyaḥ prajāmasyai jaradaṣṭiṃ kṛṇotu
aśūnyopasthā jīvatāmastu mātā pautramānandamabhi vibudhyatāmiyaṃ
svāhā
261.12
dyauste pṛṣṭhaṃ rakṣatu vāyurūrū aśvinau ca stanandhyāṃste
putrān savitā'bhirakṣatu| ā vāsasaḥ paridhānādbṛhaspatirviśve devā
abhirakṣantu paścāt svāhā
261.13
mā te gṛheṣu niśi ghoṣa
utthādanyatra tvadrudatyaḥ saṃviśantu| mā tvaṃ rudatyura ā vadhiṣṭhā
jīvapatnī patiloke virāja paśyantī prajāṃ sumanasyamānām
svāhā
261.14
aprajasyaṃ pautramartyaṃ pāpmānamuta vā adham| śīrṣṇaḥ
srajamivonmucya dviṣadbhyaḥpratimuñcāmi pāśam svāhā
261.15
paraitu
mṛtyuramṛtaṃ ma agād vaivasvato no abhayaṃ kṛṇotu paraṃ mṛtyo anu
parehi panthāṃ yatra no anya itaro devayānāt| cakṣuṣmate śṛṇvate te
bravīmi mā naḥ prajāṃ rīriṣo mota vīrān svāhā
Linked texts (9)
- Chāndogyabrāhmaṇa (ed. Durgamohan Bhattacharyya) — Sanskrit
- Mantrabrāhmaṇa — Sanskrit
- Gobhilagṛhyasūtra — Gobhila, Sanskrit
- Chāndogyabrāhmaṇa / Mantrabrāhmaṇa — Sanskrit
- Subodhinīpaddhati — Śivarāma 1615, Sanskrit
- Mantrabrāhmaṇa or Upaniṣadbrāhmaṇa or Chāndogyabrāhmaṇa — Sanskrit
- Mantras in Gobhilagṛhyasūtra — Sanskrit
- Satkriyāsāradīpikā — Gopālakavi 1500, Sanskrit
- Chāndogyamantra — Sanskrit