Pramāṇa · Search · About · API

Samavedabrahmananyashtau 281

Sāmavedabrāhmaṇānyaṣṭau 281

Language
Sanskrit

281.1

ṣaṣṭhaḥ khaṇḍaḥ
iyamevargagniḥ sāma tadetadetasyāmṛcyadhyūḍhaḥ sāma tasmādṛcyadhyūḍhaḥ sāma gīyata iyameva sā'gniramastatsāma

281.2

antarikṣamevargarvāyuḥ sāma tadetadetasyāmṛcyadhyūḍhaḥ sāma| tasmādṛcyadhyūḍhaḥ sāma gīyate'ntarikṣameva sā vāyuramastatsāma

281.3

dyaurevargādityaḥ sāma tadetadetasyāmṛcyadhyūḍhaḥ sāma| tasmādṛcyadhyūḍhaḥ sāma gīyate| dyaureva sā''dityo'mastatsāma

281.4

nakṣatrāṇyevark candramāḥ sāma tadetadetasyāmṛcyadhyūṃḍhaḥ sāma| tasmādṛcyadhyūḍhaḥ sāma gīyate| nakṣatrāṇyeva sā candramā amastatsāma

281.5

atha yadetadādityasya śuklaṃ bhāḥ saivargatha yannīlaṃ paraḥ kṛṣṇaṃ tatsāma tadetadetasyāmṛcyadhyūḍhaḥ sāma| tasmādṛcyadhyūḍhaḥ sāma gīyate

281.6

atha yadevaitadādityasya śuklaṃ bhāḥ saiva sā'tha yannīlaṃ paraḥ kṛṣṇaṃ tadamastatsāmātha ya eṣo'ntarāditye hiraṇmayaḥ puruṣo dṛśyate hiraṇyaśmaśrurhiraṇyakeśa āpraṇakhātsarva eva suvarṇaḥ

281.7

tasya yathā kapyāsaṃ puṇḍarīkamevamakṣiṇī tasyoditi nāma sa eṣa sarvebhyaḥ pāpmabhya udita udeti ha vai sarvebhyaḥ pāpmabhyo ya evaṃ veda

281.8

tasyark ca sāma ca geṣṇau tasmādudgīthastasmāttvevodgātaitasya hi gātā| sa eṣa ye cāmuṣmātparāñco lokāsteṣāṃ ceṣṭe devakāmānāṃ cetyadhidaivatam

Linked texts (12)