Pramāṇa · Search · About · API

Samavedabrahmananyashtau 317

Sāmavedabrāhmaṇānyaṣṭau 317

Language
Sanskrit

317.1

saptamaḥ khaṇḍaḥ
ṣoḍaśakalaḥ somya puruṣaḥ pañcadaśāhāni māśīḥ kāmamapaḥ
pibāpomayaḥ prāṇo na pibato vicchetsyata iti

317.2

sa ha
pañcadaśāhāni nāśātha hainamupasasāda kiṃ bravīmi bho ityṛcaḥ somya
yajūṃṣi sāmānīti sa hovāca na vai mā pratibhānti bho iti

317.3

taṃ hovāca yathā somya mahato'bhyāhitasyaiko'ṅgāraḥ khadyotamātraḥ
pariśiṣṭaḥ syāttena tato'pi na bahu dahedevaṃ somya te ṣoḍaśānāṃ
kalānāmekā kalātiśiṣṭā syāttayaitarhi vedānnānubhavasyaśānātha me
vijñāsyasīti

317.4

sa hāśātha hainamupasasāda taṃ ha yatkiṃ ca papraccha
sarvaṃ ha pratipede

317.5

taṃ hovāca yathā somya mahato'bhyāhitasyaikamaṅgāraṃ khadyotamātraṃ pariśiṣṭaṃ taṃ tṛṇairupasamādhāya
prājvalayettena tato'pi bahu dahet

317.6

evaṃ somya te ṣoḍaśānāṃ
kalānāmekā kalātiśiṣṭā'bhūtsānnenopasamāhitā prājvālī
tayaitarhi vedānubhavasyannamayaṃhi somya mana āpomayaḥ
prāṇastejomayī vāgiti tadvāsya vijajñāviti vijajñāviti

Linked texts (10)