Pramāṇa · Search · About · API

Taittiriyabrahmana 1.1.1

Taittirīyabrāhmaṇa 1.1.1

Language
Sanskrit

1.1.1.1

bráhma sáṃdhattaṃ tán me jinvatam /
kṣatrám̐ sáṃdhattaṃ tán me jinvatam /
íṣam̐ sáṃdhattaṃ tā́ṃ me jinvatam /
ū́rjam̐ sáṃdhattaṃ tā́ṃ me jinvatam /
rayím̐ sáṃdhattaṃ tā́ṃ me jinvatam /
púṣṭim̐ sáṃdhattaṃ tā́ṃ me jinvatam /
prajā́m̐ sáṃdhattaṃ tā́ṃ me jinvatam /
paśū́n sáṃdhattaṃ tā́n me jinvatam /
stutò 'si jánadhāḥ /
devā́s tvā śukrapā́ḥ práṇayantu //

1.1.1.2

suvī́rāḥ prajā́ḥ prajanáyan párīhi /
śukráḥ śukráśociṣā /
stutò 'si jánadhāḥ /
devā́s tvā manthipā́ḥ práṇayantu /
suprajā́ḥ prajā́ḥ prajanáyan párīhi /
manthī́ manthíśociṣā /
saṃjagmānáu divá ā́ pṛthivyā́yuḥ /
sáṃdhattaṃ tán me jinvatam /
prāṇám̐ sáṃdhattaṃ táṃ me jinvatam /
apānám̐ sáṃdhattaṃ táṃ me jinvatam //

1.1.1.3

vyānám̐ sáṃdhattaṃ táṃ me jinvatam /
cákṣuḥ sáṃdhattaṃ tán me jinvatam /
śrótram̐ sáṃdhattaṃ tán me jinvatam /
mánaḥ sáṃdhattaṃ tán me jinvatam /
vā́cam̐ sáṃdhattaṃ tā́ṃ me jinvatam /
ā́yuḥ stha ā́yur me dhattam /
ā́yur yajñā́ya dhattam /
ā́yur yajñápataye dhattam /
prāṇáḥ sthaḥ prāṇáṃ me dhattaṃ /
prāṇáṃ yajñā́ya dhattam //

1.1.1.4

prāṇáṃ yajñápataye dhattam /
cákṣuḥ sthaś cákṣur me dhattam /
cákṣur yajñā́ya dhattam /
cákṣur yajñápataye dhattam /
śrótram̐ sthaḥ śrótraṃ me dhattam /
śrótraṃ yajñā́ya dhattam /
śrótraṃ yajñápataye dhattam /
táu deváu śukrāmanthinau /
kalpáyataṃ dáivīr víśaḥ /
kalpáyataṃ mā́nuṣīḥ //

1.1.1.5

íṣam ū́rjam asmā́su dhattam /
prāṇā́n paśúṣu /
prajā́ṃ máyi ca yájamāne ca /
nírastaḥ śáṇḍaḥ /
nírasto márkaḥ /
ápanuttau śáṇḍām árkau sahā́múnā /
śukrásya samíd asi /
manthínaḥ samíd asi /
sá prathamáḥ sáṃkṛtir viśvákarmā /
sá prathamó mitró váruṇo agníḥ /
sá prathamó bṛ́haspátiś cikitvā́n /
tásmā índrāya sutám ā́juhomi //

Commentaries (4)

Linked texts (3)