Taittiriyabrahmana 1.1.10
Taittirīyabrāhmaṇa 1.1.10
- Language
- Sanskrit
1.1.10.1
prajā́patiḥ prajā́ asṛjata /
sá riricānò 'manyata /
sá tápo 'tapyata /
sá ātmán vīryàm apaśyat /
tád avardhata /
tád asmāt sáhasordhvám asṛjyata /
sā́ virā́ḍ abhavat /
tā́ṃ devāsurā́ vyàgṛhṇata /
sò 'bravīt prajā́patiḥ /
máma vā́ eṣā́ //
1.1.10.2
dóhā evá yuṣmā́kam íti /
sā́ tátaḥ prā́cy údakrāmat /
tát prajā́patiḥ páryagṛhṇāt /
átharva pitúṃ me gopāya_íti /
sā́ dvitī́yam údakrāmat /
tát prajā́patiḥ páryagṛhṇāt /
nárya prajā́ṃ me gopāya_íti /
sā́ tṛtī́yam údakrāmat /
tát prajā́patiḥ páryagṛhṇāt /
śám̐sya paśū́n me gopāya_íti //
1.1.10.3
sā́ caturthám udakrāmat /
tát prajā́patiḥ páryagṛhṇāt /
sápratha sabhā́ṃ me gopāyéti /
sā́ pañcamám údakrāmat /
tát prajā́patiḥ páryagṛhṇāt /
áhe budhniya mántraṃ me gopāya_íti /
agnī́n vā́vá sā́ tā́n vyakramata /
tā́n prajā́patiḥ páryagṛhṇāt /
átho paṅktím evá /
paṅktír vā́ eṣā́ brāhmaṇé práviṣṭā //
1.1.10.4
tā́m ātmánó 'dhi nírmimīte /
yád agnír ādhīyáte /
tásmād etā́vanto 'gnáya ā́dhīyante /
pā́ṅktaṃ vā́ idám̐ sárvam /
pā́ṅktenaivá pā́ṅktam̐ spṛṇoti /
átharva pitúṃ me gopāya_íty āha /
ánnam eváiténa spṛṇoti /
nárya prajā́ṃ me gopāya_íty āha /
prajā́m eváténa spṛṇoti /
śám̐sya paśū́n me gopāya_íty āha //
1.1.10.5
paśū́n eváiténa spṛṇoti /
sápratha sabhā́ṃ me gopāya_íty āha /
sabhā́m eváiténa_indriyám̐ spṛṇoti /
áhe budhniya mántraṃ me gopāya_íty āha /
mántram eváiténa śríyam̐ spṛṇoti /
yád anvāhāryapácane 'nvāhā́ryaṃ pacanti /
téna so 'sya_abhī́ṣṭaḥ prītáḥ /
yád gā́rhapatya ā́jyam adhiśráyanti sáṃpatnīr yājáyanti /
téna so 'sya_abhī́ṣṭaḥ prītáḥ /
yád āhavanī́ye juhvati //
1.1.10.6
téna sò 'sya_abhī́ṣṭaḥ prītáḥ /
yát sabhā́yāṃ vijáyante /
téna sò 'sya_abhī́ṣṭaḥ prītáḥ /
yád āvasathé 'nnam̐ háranti /
téna sò 'sya_abhī́ṣṭaḥ prītáḥ /
táthāsya sárve prītā́ abhī́ṣṭā ā́dhīyante /
pravasathám eṣyánn evám úpatiṣṭheta_ékam_ekam /
yáthā brāhmaṇā́ya gṛhé vāsíne paridā́ya gṛhā́n éti /
tādṛ́g evá tát /
púnar āgátya_úpatiṣṭhate /
sā́bhāgeyam eváiṣāṃ tát /
sā́ táta ūrdhvā́_ā́rohat /
sā́ rohiṇy àbhavat /
tád rohiṇyái rohiṇitvám /
rohiṇyā́m agním ā́dadhīta /
svá eváinaṃ yónau prátiṣṭhitam ā́dhatte /
ṛdhnóty enena //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Discussed in (11)
- Mānasāra Series (I. A Dictionary of Hindu Architecture; II. Indian Architecture according to Mānasāra-Śilpaśāstra; III. Mānasāra on Architecture and Sculpture: Sanskrit Text; IV. Architecture of Mānasāra: Translation; V. Architecture of Mānasāra: Illustrations; VI. Hindu Architecture in India and Abroad; VII. An Encyclopaedia of Hindu Architecture) — Acharya 1927, English
- Vedic Index of Names and Subjects — Macdonell & Keith 1912, English
- A Vedic Concordance — Bloomfield 1906, English
- Bhāratīya Jyotiḥśāstra (History of Indian Astronomy), translated by R. V. Vaidya — Dīkṣita & Vaidya 1896, English
- History of Dharmaśāstra (Ancient and Mediaeval Religious and Civil Law in India) — Kane 1930, English
- Original Sanskrit Texts on the Origin and History of the People of India, their Religion and Institutions — Muir 1858, English
- The Religion and Philosophy of the Veda and Upanishads — Keith 1925, English
- Republics in Ancient India, c. 1500 B.C.–500 B.C. — Sharma 1968, English
- State and Government in Ancient India — Altekar 1949, English
- Vedic Mythology — Macdonell 1897, English
- On the Meaning of the Mahābhārata — Sukthankar 1957, English