Pramāṇa · Search · About · API

Taittiriyabrahmana 1.1.4

Taittirīyabrāhmaṇa 1.1.4

Language
Sanskrit

1.1.4.1

dvādaśásu vikrāméṣv agním ā́dadhīta /
dvā́daśa mā́sāḥ samvatsaráḥ /
saṃvatsarā́d eváinam avarúdhya_ā́dhatte /
yád dvādaśásu vikrāméṣv ādádhīta /
párimitam ávarundhīta /
cákṣurnimita ā́dadhīta /
íyad dvā́daśavikrāmā́3 íti /
párimitaṃ caivá_áparimitaṃ ca_ávarunddhe /
ánṛtaṃ vái vācā́ vadati /
ánṛtaṃ mánasā dhyāyati //

1.1.4.2

cákṣur vái satyám /
ádrā́3g íty āha /
ádarśam íti /
tát satyám /
yáś cákṣurnimite 'gním ādhatté /
satyá eváinam ā́dhatte /
tásmād ā́hitāgnir ná_ánṛtaṃ vadet /
nā́sya brāhmaṇó 'nāśvān gṛhé vaset /
satyé hy asyāgnír ā́hitaḥ /
āgneyī́ vái rā́triḥ //

1.1.4.3

āgneyā́ḥ paśávaḥ /
aindrám áhaḥ /
náktaṃ gā́rhapatyam ā́dadhāti /
paśū́n evá_ávarunddhe /
dívā_āhavanī́yam /
indriyám evā́varunddhe /
ardhódite sū́rya āhavanī́yam ā́dadhāti /
etásmin vái loké prajā́patiḥ prajā́ asṛjata /
prajā́ evá tád yájamānaḥ sṛjate /
átho bhūtáṃ caivá bhavaiṣyác ca_ávarunddhe //

1.1.4.4

íḍā vái mānavī́ yajñānukāśíny āsīt /
sā́_aśṛṇot /
ásurā agním ā́dadhata íti /
tád agacchat /
tá āhavanī́yam ágra ā́dadhata /
átha gā́rhapatyam /
átha_anvāhāryapácanam /
sā́_abravīt /
pratī́cy eṣām̐ śrī́r agāt /
bhadrā́ bhūtvā́ párābhaviṣyantī́ti //

1.1.4.5

yásya_evám agnír ādhīyáte /
pratī́cy asya śrī́r eti /
bhadró bhūtvā́ párābhavati /
sā́_aśṛṇot /
devā́ agním ā́dadhata íti /
tád agacchat /
tè 'nvāhāryapácanam ágra ā́dadhata /
átha gā́rhapatyam /
átha_āhavanī́yam /
sā́_abravīt //

1.1.4.6

prā́cy eṣām̐ śrī́r agāt /
bhadrā́ bhūtvā́ suvargáṃ lokám eṣyanti /
prajā́ṃ tú ná vetsyanta íti /
yásya_evám agnír ādhīyáte /
prā́cy asya śrī́r eti /
bhadró bhūtvā suvargáṃ lokám eti /
prajā́ṃ tú ná vandate /
sā́bravīd íḍā mánum /
táthā vā́ aháṃ táva_agním ā́dhāsyāmi /
yáthā prá prajáyā paśúbhir mithunáir janiṣyáse //

1.1.4.7

práty asmím̐l loké sthāsyási /
abhí suvargáṃ lokáṃ jeṣyásī́ti /
gā́rhapatyam ágra ā́dadhāt /
gā́rhapatyaṃ vā́ ánu prajā́ḥ paśávaḥ prájāyante /
gā́rhapatyenaivā́smai prajā́ṃ paśū́n prā́janayat /
átha_anvāhāryapácanam /
tiryáṅṅ iva vā́ ayáṃ lokáḥ /
asmínn evá téna loké prátyatiṣṭhat /
átha_āhavanī́yam /
ténaivá suvargáṃ lokám abhyàjayat //

1.1.4.8

yásya_evám agnír ādhīyáte /
prá prajáyā paśúbhir mithunáir jāyate /
práty asmím̐l loké tiṣṭhati /
abhí suvargáṃ lokáṃ jayati /
yásya vā́ áyathādevatam agnír ādhīyáte /
ā́ devátābhyo vṛścyate /
pā́pīyān bhavati /
yásya yathādevatám /
ná devátābhya ā́ vṛścyate /
vásīyān bhavati //
bhṛ́gūṇāṃ tvā_áṅgirasāṃ vratapate vraténa_ā́dadhāmī́ti bhṛgvaṅgirásām ā́dadhyāt /
ādityā́nāṃ tvā devā́nāṃ vratapate vraténa_ā́dadhāmī́ty ányāsāṃ brā́hmaṇīnāṃ prajā́nām /
váruṇasya tvā rā́jño vratapate vraténa_ā́dadhāmī́ti rā́jñaḥ /
índrasya tvā_indriyéṇa vratapate vraténa_ā́dadhāmi_íti rājanyàsya /
mános tvā grāmaṇyò vratapate vraténa_ā́dadhāmī́ti váiśyasya /
ṛbhūṇā́ṃ tvā devā́nāṃ vratapate vraténa_ā́dadhāmi_íti rathakārásya /
yathādevatám agnír ā́dhīyate /
ná devátābhya ā́ vṛścyate /
vásīyān bhavati //

Commentaries (5)

Linked texts (7)