Pramāṇa · Search · About · API

Taittiriyabrahmana 1.1.5

Taittirīyabrāhmaṇa 1.1.5

Language
Sanskrit

1.1.5.1

prajā́patir vācáḥ satyám apaśyat /
téna_agním ā́dhatta /
téna vái sá ārdhnot /
bhū́r bhúvaḥ súvar íty āha /
etád vái vācáḥ satyám /
yá eténa_agním ādhatte /
ṛdhnóty evá /
átho satyáprāśūr evá bhavati /
átho yá eváṃ vidvā́n abhicárati /
stṛṇutá eváinam //

1.1.5.2

bhū́r íty āha /
prajā́ evá tád yájamānaḥ sṛjate /
bhúva íty āha /
asmínn evá loké prátitiṣṭhati /
súvar íty āha /
suvargá evá loké prátitiṣṭhati /
tribhír akṣárair gā́rhapatyam ā́dadhāti /
tráya imé lokā́ḥ /
eṣv èváinaṃ lokéṣu prátiṣṭhitam ā́dhatte /
sárvaiḥ pañcábhir āhavanī́yam //

1.1.5.3

suvargā́ya vā́ eṣá lokā́ya_ā́dhīyate /
yád āhavanī́yaḥ /
suvargá evā́smai loké vācáḥ satyám̐ sárvam āpnoti /
tribhír gā́rhapatyam ā́dadhāti /
pañcábhir āhavanī́yam /
aṣṭáu sáṃpadyante /
aṣṭā́kṣarā gāyatrī́ /gāyatró 'gníḥ /
yā́vān evā́gníḥ /
tám ā́dhatte //

1.1.5.4

prajā́patiḥ prajā́ asṛjata /
tā́ asmāt sṛṣṭā́ḥ párācīr āyann /
tā́bhyo jyótir údagṛhṇāt /
táṃ jyótiḥ páśyantīḥ prajā́ abhí samā́vartanta /
upári_iva_agním údgṛhṇīyād uddháran /
jyótir evá páśyantīḥ prajā́ yájamānam abhí samā́vartante /
prajā́pater ákṣy aśvayat /
tát párāpatat /
tád áśvo 'bhavat /
tád áśvasya_aśvatvám //

1.1.5.5

eṣá vái prajā́patiḥ /
yád agníḥ prājāpatyó 'śvaḥ /
yád áśvaṃ purástān náyati /
svám evá cákṣuḥ páśyan prajā́patir ánūdeti /
vajrī́ vā́ eṣáḥ /
yád áśvaḥ /
yád áśvaṃ purástān náyati /
jātā́n evá bhrā́tṛvyān práṇudate /
púnar ā́vartayati //

1.1.5.6

janiṣyámāṇān evá prátinudate /
ny ā̀havanī́yo gā́rhapatyam akāmayata /
ní gā́rhapatya āhavanī́yam /
táu vibhā́jaṃ nā́śaknot /
só 'śvaḥ pūrvavā́ḍ bhūtvā́ /
prā́ñcaṃ pū́rvam údavahat /
tát pūrvavā́haḥ pūrvavāṭtvám /
yád áśvaṃ purástān náyati /
víbhaktir eváinayoḥ sā́ /
átho nā́nāvīryāv eváinau kurute //

1.1.5.7

yád upáry_upari śíro háret /
prāṇā́n vícchindyāt /
adhò'dhaḥ śíro harati /
prāṇā́nāṃ gopīthā́ya /
íyaty ágre harati /
átha_íyaty átha_íyati /
tráya imé lokā́ḥ /
eṣv èváinaṃ lokéṣu prátiṣṭhitam ā́dhatte /
prajā́patir agním asṛjata /
sò 'bibhet prámā dhakṣyatī́ti //

1.1.5.8

tásya tredhā́ mahimā́naṃ vyàuhat /
śā́ntyā ápradāhāya /
yát tredhā́_agnír ādhīyáte /
mahimā́nam evā́sya tád vyūhati /
śā́ntyā ápradāhāya /
púnar ā́vartayati /
mahimā́nam evā́sya sáṃdadhāti /
paśúr vā́ eṣáḥ /
yád áśvaḥ /
eṣá rudráḥ //

1.1.5.9

yád agníḥ /
yád áśvasya padè 'gním ādadhyā́t /
rudrā́ya paśū́n ápidadhyāt /
apaśúr yájamānaḥ syāt /
yán ná_ākramáyet /
ánavaruddhā asya paśávaḥ syuḥ /
pārśvatá ā́kramayet /
yáthā́hitasya_agnér áṅgārā abhyavavárteran /
ávaruddhā asya paśávo bhávanti /
ná rudrā́ya_ápidadhāti //

1.1.5.10

trī́ṇi havī́m̐ṣi nírvapati /
virā́ja evá víkrāntaṃ yájamānó 'nu víkramate /
agnáye pávamānāya /
agnáye pāvakā́ya /
agnáye śúcaye /
yád agnáye pávamānāya nirvápati /
punā́ty eváinam /
yád agnáye pāvakā́ya /
pūtá evā́sminn annā́dyaṃ dadhāti /
yád agnáye śúcaye /
brahmavarcasám evā́sminn upáriṣṭād dadhāti //

Commentaries (4)

Linked texts (7)