Pramāṇa · Search · About · API

Taittiriyabrahmana 1.1.6

Taittirīyabrāhmaṇa 1.1.6

Language
Sanskrit

1.1.6.1

devāsurā́ḥ sáṃyattā āsann /
té devā́ vijayám upayántaḥ /
agnáu vāmáṃ vásu sáṃ nyadadhata /
idám u no bhaviṣyati /
yádi no jeṣyánti_íti /
tád agnír ná_utsáham aśaknot /
tát tredhā́ vinyàdadhāt /
paśúṣu tṛ́tīyam /
apsú tṛ́tīyam /
ādityé tṛ́tīyam //

1.1.6.2

tád devā́ vijítya /
púnar ávārurutsanta /
tè 'gnáye pávamānāya púroḍā́śam aṣṭā́kapālaṃ níravapan /
paśávo vā́ agníḥ pávamānaḥ /
yád evá paśúṣv ā́sīt /
tát téna_ávārundhata /
tè 'gnáye pāvakā́ya /
ā́po vā́ agníḥ pāvakáḥ /
yád evá_ápsv ā́sīt /
tát téna_ávārundhata //

1.1.6.3

tè 'gnáye śúcaye /
asáu vā́ ādityò 'gníḥ śúciḥ /
yád evá_ādityá ā́sīt /
tát téna_ávārundhata /
brahmavādíno vadanti /
tanúvo vā́váitā́ agnyādhéyasya /
āgneyó vā́ aṣṭā́kapālo 'gnyādhéyam íti /
yát táṃ nirvápet /
ná_etā́ni /
yáthātmā́ syā́t //

1.1.6.4

ná_áṅgāni /
tādṛ́g evá tát /
yád etā́ni nirvápet /
ná tám /
yáthā́ṅgāni syuḥ /
ná_ā́tmā́ /
tādṛ́g evá tát /
ubháyāni sahá nirúpyāṇi /
yajñásya sātmátvāya /
ubháyaṃ vā́ etásya_indriyáṃ vīryàm āpyate //

1.1.6.5

yò 'gním ādhatté /
aindrāgnám ékādaśakapālam ánu nírvapet /
ādityáṃ carúm /
indrāgnī́ vái devā́nām áyātayāmānau /
yé evá deváte áyātayāmnī /
tā́bhyām evā́smā indriyáṃ vīryàm ávarunddhe /
ādityò bhavati /
iyáṃ vā́ áditiḥ /
asyā́m evá prátitiṣṭhati /
dhenvái vā́ etád rétaḥ //

1.1.6.6

yád ā́jyam /
anaḍúhas taṇḍulā́ḥ /
mithunám evá_ávarunddhe /
ghṛté bhavati /
yajñásya_álūkṣāntatvāya /
catvā́ra ārṣeyā́ḥ /
prā́śnanti /
diśā́m evá jyótiṣi juhoti /
paśávo vā́ etā́ni havī́m̐ṣi /
eṣá rudráḥ /
yád agníḥ //

1.1.6.7

yát sadyá etā́ni havī́m̐ṣi nirvápet /
rudrā́ya paśū́n ápi dadhyāt /
apaśúr yájámānaḥ syāt /
yán ná_anunirvápet /
ánavaruddhā asya paśávaḥ syuḥ /
dvādaśásu rā́trīṣv ánu nírvapet /
saṃvatsarápratimā vái dvā́daśa rā́trayaḥ /
saṃvatsaréṇaivā́smai rudrám̐ śamayitvā́ /
paśū́n ávarunddhe /
yád ékam_ekam etā́ni havī́m̐ṣi nirvápet //

1.1.6.8

yáthā trī́ṇy āvápanāni pūráyet /
tādṛ́k tát /
ná prajánanam úcchim̐ṣet /
ékaṃ nirúpya /
úttare sámasyet /
tṛtī́yam evā́smai lokám úcchim̐ṣati prajánanāya /
táṃ prajáyā paśúbhir ánu prájāyate /
átho yajñásyaiváiṣā́_abhíkrāntiḥ /
rathacakráṃ pravartayati /
manuṣyarathénaivá devaratháṃ pratyávarohati //

1.1.6.9

brahmavādíno vadanti /
hotavyàm agnihotrā́3ṃ ná hotavyā́3m íti /
yád yájuṣā juhuyā́t /
áyathāpūrvam ā́hutī juhuyāt /
yán ná juhuyāt /
agníḥ párābhavet /
tūṣṇī́m evá hotavyàm /
yathāpūrvám ā́hutī juhóti /
ná_agníḥ párābhavati /
agnī́dhe dadāti //

1.1.6.10

agnímukhān evá_ṛtū́n prīṇāti /
upabárhaṇaṃ dadāti /
rūpā́ṇām ávaruddhyai /
áśvaṃ brahmáṇe /
indriyám evá_ávarundhe /
dhenúm̐ hótre /
āśíṣa evá_ávarunddhe /
anaḍvā́ham adhvaryáve /
váhnir vā́ anaḍvā́n /
váhnir adhvaryúḥ //

1.1.6.11

váhninaivá váhni yajñásya_ávarunddhe /
mithunáu gā́vau dadāti /
mithunásya_ávaruddhyai /
vā́so dadāti /
sarvadevatyàṃ vái vā́saḥ /
sárvā evá devátāḥ prīṇāti /
ā́ dvādaśábhyo dadāti /
dvā́daśa mā́sāḥ saṃvatsaráḥ /
saṃvatsará evá prátitiṣṭhati /
kā́mam ūrdhváṃ déyam /
áparimitasya_ávaruddhyai //

Commentaries (5)

Linked texts (2)

Discussed in (3)