Taittiriyabrahmana 1.1.7
Taittirīyabrāhmaṇa 1.1.7
- Language
- Sanskrit
1.1.7.1
gharmáḥ śíras tád ayám agníḥ /
sáṃpriyaḥ paśúbhir bhuvat /
chardís tokā́ya tánayāya yaccha /
vā́taḥ prāṇástád ayám agníḥ /
sáṃpriyaḥ paśúbhir bhuvat /
svaditáṃ tokā́ya tánayāya pitúṃ paca /
prā́cīm ánu pradíśaṃ préhi vidvā́n /
agnér agne puró agnír bhavehá /
víśvā ā́śā dī́dyāno víbhāhi /
ū́rjaṃ no dhehi dvipáde cátuṣpade //
1.1.7.2
arkáś cákṣus tád asáu sū́ryas tád ayám agníḥ /
sáṃpriyaḥ paśúbhir bhuvat /
yát te śukra śukráṃ várcaḥ śukrā́ tanū́ḥ /
śukráṃ jyótir ájasram /
téna me dīdihi téna tvā_ā́dadhe /
agnín āgne bráhmaṇā /
ānaśé vyānáśe sárvam ā́yur vyānáśe /
yé te agne śivé tanúvau /
virā́ṭ ca svarā́ṭ ca /
té mā́ viśatāṃ té mā jinvatām //
1.1.7.3
yé te agne śivé tanúvau /
samrā́ṭ ca_abhibhū́ś ca /
té mā́ viśatāṃ té mā jinvatām /
yé te agne śivé tanúvau /
vibhū́ś ca paribhū́ś ca /
té mā́ viśatāṃ té mā jinvatām /
yé te agne śive tanúvau /
prabhvī́ ca prábhūtíś ca /
té mā́ viśatāṃ té mā jinvatām /
yā́s te agne śivā́s tanúvaḥ /
tā́bhis tvā_ā́dadhe /
yā́s te agne ghorā́s tanúvaḥ /
tā́bhir amúṃ gaccha //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Discussed in (2)
- A Vedic Concordance — Bloomfield 1906, English
- History of Dharmaśāstra (Ancient and Mediaeval Religious and Civil Law in India) — Kane 1930, English