Taittiriyabrahmana 1.2.2
Taittirīyabrāhmaṇa 1.2.2
- Language
- Sanskrit
1.2.2.1
návaitā́ny áhāni bhavanti /
náva vái suvargā́ lokā́ḥ /
yád etā́ny áhāny upayánti /
navásv evá tát suvargéṣu lokéṣu satríṇaḥ pratitíṣṭhanto yanti /
agniṣṭomā́ḥ páraḥsāmānaḥ kā́ryā íty āhuḥ /
agniṣṭomásaṃmitaḥ suvargó loká íti /
dvā́daśāgniṣṭomásya stotrā́ṇi /
dvā́daśa mā́sāḥ saṃvatsaraḥ /
tát tán ná sū́rkṣyam /
ukthyā̀ evá saptadaśā́ḥ páraḥsāmānaḥ kāryā̀ḥ //
1.2.2.2
paśávo vā́ ukthā́ni /
paśūnā́m ávarudhyai /
viśvajidabhijítāv agniṣṭomáu /
ukthyā̀ḥ saptadaśā́ḥ páraḥsāmānaḥ /
té sám̐stutā virā́jam abhí sáṃpadyante /
dvé cárcāv áti ricyete /
ékayā gáur átiriktaḥ /
ékayāyur ūnáḥ /
suvargó vái lokó jyótiḥ /
ū́rg virā́ṭ //
1.2.2.3
suvargám evá téna lokám abhí jayanti /
yát páram̐ rā́thantaram /
tát prathamé 'han kāryàm /
bṛhád dvitī́ye /
vairūpáṃ tṛtī́ye /
vairājáṃ caturthé /
śākvaráṃ pañcamé /
raivatám̐ ṣaṣṭhé /
tád u pṛṣṭhébhyo náyanti /
saṃtánaya eté gráhā gṛhyante //
1.2.2.4
atigrāhyā̀ḥ páraḥsāmasu /
imā́n eváitáir lokā́n sáṃ tanvanti /
mithunā́ eté gráhā gṛhyante /
atigrāhyā̀ḥ páraḥsāmasu /
mithunám evá táir yájamānā ávarundhate /
bṛhát pṛṣṭháṃ bhavati /
bṛhád vái suvargó lokáḥ /
bṛhatáivá suvargáṃ lokáṃ yanti /
trayastrim̐śí nā́ma sā́ma /
mádhyandine pávamāne bhavati //
1.2.2.5
tráyastrim̐śad vái devátāḥ /
devátā evā́varundhate /
yé vā́ itáḥ párāñcam̐ saṃvatsarám upayánti /
ná hainaṃ té svastí sámaśnuvate /
átha ye 'muto 'rvā́ñcam upa yánti /
té hainam̐ svastí sámaśnuvate /
etád vā́ amúto 'rvā́ñcam úpa yanti /
yád evám /
yó ha khálu vā́vá prajā́patiḥ /
sá u vevéndraḥ /
tád u devébhyo náyanti //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- Kāṭhakaśākhā — Sanskrit
- Kāṭhakasaṃhitā — Sanskrit