Taittiriyabrahmana 1.2.3
Taittirīyabrāhmaṇa 1.2.3
- Language
- Sanskrit
1.2.3.1
sáṃtatir vā́ eté gráhāḥ /
yát páraḥsāmānaḥ /
viṣūvā́n divākīrtyàm /
yáthā śā́lāyai pákṣasī /
evám̐ saṃvatsarásya pákṣasī /
yád eté ná gṛhéran /
víṣūcī saṃvatsarásya pákṣasī vyávasram̐seyātām /
ā́rtim ā́rcheyuḥ /
yád eté gṛhyánte /
yáthā śālāyai pákṣasī madhyamáṃ vam̐śám abhí samāyácchati //
1.2.3.2
evám̐ saṃvatsarásya pákṣasī divākīrtyàm abhí sáṃtanvanti /
nā́rtim ā́rchanti /
ekavim̐śám áhar bhavati /
śukrā́grā gráhā gṛhyante /
pratyúttabdhyai sayatvā́ya /
sauryà etád áhaḥ paśúr ā́labhyate /
sauryò 'tigrāhyò gṛhyate /
áhar evá rūpéṇa sámardhayanti /
átho áhna eváiṣá balír hriyate /
saptáitád áhar atigrāhyā̀ gṛhyante //
1.2.3.3
saptá vái śīrṣaṇyā̀ḥ prāṇā́ḥ /
asā́v ādityáḥ śíraḥ prajā́nām /
śīrṣánn evá prajā́nāṃ prāṇā́n dadhāti /
tásmāt saptá śīrṣán prāṇā́ḥ /
índro vṛtrám̐ hatvā́ /
ásurān parābhā́vya /
sá imā́m̐l lokā́n abhyàjayat /
tásyāsáu lokó 'nabhijita āsīt /
táṃ viśvákarmā bhūtvā́bhyajayat /
yád vaiśvakarmaṇó gṛhyáte //
1.2.3.4
suvargásya lokásyābhíjityai /
prá vā́ etè 'smā́l lokā́c cyavante /
yé vaiśvakarmaṇáṃ gṛhṇáte /
ādityáḥ śvó gṛhyate /
iyáṃ vā́ áditiḥ /
asyā́m evá práti tiṣṭhanti /
anyònyo gṛhyete /
víśvāny evā́nyéna kármāṇi kurvāṇā́ yanti /
asyā́m anyéna práti tiṣṭhanti /
tā́v ā́parārdhā́t saṃvatsarásyānyònyo gṛhyete /
tā́v ubháu sahá mahāvraté gṛhyete /
yajñásyaivā́ntaṃ gatvā́ /
ubháyor lokáyoḥ prátitiṣṭhanti /
arkyàm uktháṃ bhavati /
annā́dyasyā́varuddhyai //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Mānasāra Series (I. A Dictionary of Hindu Architecture; II. Indian Architecture according to Mānasāra-Śilpaśāstra; III. Mānasāra on Architecture and Sculpture: Sanskrit Text; IV. Architecture of Mānasāra: Translation; V. Architecture of Mānasāra: Illustrations; VI. Hindu Architecture in India and Abroad; VII. An Encyclopaedia of Hindu Architecture) — Prasanna Kumar Acharya, English
- Vedic Index of Names and Subjects — Arthur A. Macdonell & A. Berriedale Keith, English
- A History of Indian Philosophy — Surendranath Dasgupta, English
- The Arctic Home in the Vedas — Bal Gangadhar Tilak, English
- The Orion, or Researches into the Antiquity of the Vedas — Bal Gangadhar Tilak, English