Taittiriyabrahmana 1.2.5
Taittirīyabrāhmaṇa 1.2.5
- Language
- Sanskrit
1.2.5.1
ápratiṣṭhāṃ vā́ eté gacchanti /
yéṣām̐ saṃvatsaré 'nāpté 'tha /
ekādaśíny āpyáte /
vaiṣṇaváṃ vāmanám ā́labhante /
yajñó vái víṣṇuḥ /
yajñám evā́labhante prátiṣṭhityai /
aindrāgnám ā́labhante /
indrāgnī́ vái devā́nām áyātayāmānau /
yé evá deváte áyātayāmnī /
té evā́labhante //
1.2.5.2
vaiśvadevám ā́labhante /
devátā evā́varundhate /
dyāvāpṛthivyā̀ṃ dhenúm ā́labhante /
dyā́vāpṛthivyór evá práti tiṣṭhanti /
vāyavyàṃ vatsám ā́labhante /
vāyúr eváibhyo yáthāyatanā́d devátā ávarundhe /
ādityā́m áviṃ vaśā́m ā́labhante /
iyáṃ vā́ áditiḥ /
asyā́m evá prátitiṣṭhanti /
maitrāvaruṇī́m ā́labhante //
1.2.5.3
mitréṇaivá yajñásya svìṣṭam̐ śamayanti /
váruṇena dúriṣṭam /
prājāpatyáṃ tūparáṃ mahāvratá ā́labhante /
prājāpatyó 'tigrāhyò gṛhyate /
áhar evá rūpéṇa sámardhayanti /
átho áhna eváiṣá balír hriyate /
āgneyám ā́labhante práti prájñātyai /
ajapetvā́n vā́ eté pū́rvair mā́sair ávarundhate /
yád eté gavyā́ḥ paśáva ālabhyánte /
ubháyeṣāṃ paśūnā́m ávarudhyai //
yád átiriktām ekādaśínīm ālábheran /
ápriyaṃ bhrā́tṛvyam abhyátiricyeta /
yád dváudvau paśū́ samásyeyuḥ /
kánīya ā́yuḥ kurvīran /
yád eté brā́hmaṇavantaḥ paśáva ālabhyánte /
nā́priyaṃ bhrā́tṛvyam abhyàtirícyate /
ná kánīya ā́yuḥ kurvate //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- Altindische Grammatik — Jacob Wackernagel & Albert Debrunner, German