Taittiriyabrahmana 1.3.1
Taittirīyabrāhmaṇa 1.3.1
- Language
- Sanskrit
1.3.1.1
devāsurā́ḥ sáṃyattā āsan /
té devā́ vijayám upayántaḥ /
agnī́ṣómayos tejasvínīs tanū́s sáṃnyadadhata /
idám u no bhaviṣyati /
yádi no jeṣyántī́ti /
ténāgnī́ṣómāv ápākrāmatām /
té devā́ vijítya /
agnī́ṣómāv ánvaicchan /
tè 'gním ánvavindann ṛtúṣū́tsannam /
tásya víbhaktībhis tejasvínīs tanū́r ávārundhata //
1.3.1.2
té sómam ánvavindan /
tám aghnan /
tásya yathābhijñā́yaṃ tanū́r vyàgṛhṇata /
té gráhā abhavan /
tád gráhāṇāṃ grahatvám /
yásyaiváṃ vidúṣo gráhā gṛhyánte /
tásya tv èvá gṛhītā́ḥ /
nā́nāgneyaṃ punarādhéye kuryāt /
yád ánāgneyaṃ punarādhéye kuryā́t /
vyṛ̀ddham evá tát //
1.3.1.3
ánāgneyaṃ vā́ etát kriyate /
yát samídhas tánūn ápātam iḍó barhír yajati /
ubhā́v āgneyā́v ā́jyabhāgau syātām /
ánājyabhāgau bhavata íty āhuḥ /
yád ubhā́v āgneyā́v anváñcāv íti /
agnáye pávamānāyóttaraḥ syāt /
yát pávamānāya /
ténā́jyabhāgaḥ /
téna saumyáḥ /
búdhanvaty āgneyásyā́jyabhāgasya puro'nuvākyā̀ bhavati //
1.3.1.4
yáthā suptáṃ bodháyati /
tādṛ́g evá tát /
agnínyaktāḥ patnīsaṃyājā́nām ṛ́caḥ syuḥ /
ténāgneyám̐ sárvaṃ bhavati /
ekadhā́ tejasvínīṃ devátāmúpaitī́ty āhuḥ /
sáinam īśvarā́ pradáha íti /
néti brūyāt /
prajánanaṃ vā́ agníḥ /
prajánanam evópaitī́ti /
kṛtáyajuḥ sáṃbhṛtasaṃbhāra íty āhuḥ //
1.3.1.5
ná saṃbhṛtyāḥ saṃbhārā́ḥ /
ná yájuḥ kāryàm íti /
átho khálu /
saṃbhṛ́tyā evá saṃbhārā́ḥ /
kāryàṃ yájuḥ /
punarādhéyasya sámṛddhyai /
ténopām̐śú prácarati /
éṣya iva vā́ eṣáḥ /
yát punarādhéyaḥ /
yáthopām̐śú naṣṭám iccháti //
1.3.1.6
tādṛ́g evá tát /
uccáiḥ sviṣṭakṛ́tam útsṛjati /
yáthā naṣṭáṃ vittvā́ prā́hāyám íti /
tādṛ́g evá tát /
ekadhā́ tejasvínīṃ devátām úpaitī́ty āhuḥ /
sáinam īśvarā́ pradáha íti /
tát táthā nópaiti /
prayājānūyājéṣv evá víbhaktīḥ kuryāt /
yathāpūrvám ā́jyabhāgau syā́tām /
eváṃ patnīsaṃyājā́ḥ //
1.3.1.7
tád vaiśvānarávat prajánanavattaram úpaitī́ti /
tád āhuḥ /
vyṛ̀ddhaṃ vā́ etát /
ánāgneyaṃ vā́ etát kriyata íti /
néti brūyāt /
agníṃ prathamáṃ víbhaktīnāṃ yajati /
agním uttamáṃ patnīsaṃyājā́nām /
ténāgneyám /
téna sámṛddhaṃ kriyata íti //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- Altindische Grammatik — Jacob Wackernagel & Albert Debrunner, German