Pramāṇa · Search · About · API

Taittiriyabrahmana 1.3.10

Taittirīyabrāhmaṇa 1.3.10

Language
Sanskrit

1.3.10.1

índro vṛtrám̐ hatvā́ /
ásurān párābhā́vya /
sò 'māvāsyā̀ṃ práty ā́gacchat /
té pitáraḥ pūrvedyúr ā́gacchan /
pitṛ́̄n yajñò 'gacchat /
táṃ devā́ḥ púnar ayācanta /
tám ebhyo ná púnar adaduḥ /
tè 'bruvan váraṃ vṛṇāmahai /
átha vaḥ púnar dāsyāmaḥ /
asmábhyam evá pūrvedyúḥ kriyātā íti //

1.3.10.2

tám ebhyaḥ púnar adaduḥ /
tásmāt pitṛ́bhyaḥ pūrvedyúḥ kriyate /
yát pitṛ́bhyaḥ pūrvedyúḥ karóti /
pitṛ́bhya evá tád yajñáṃ niṣkrī́ya yájamānaḥ prátanute /
sómāya pitṛ́pītāya svadhā́ náma íty āha /
pitúr evá_ádhi somapīthám ávarundhe /
ná hí pitā pramī́yamāṇa ā́ha_eṣá somapīthá íti /
indriyáṃ vái somapītháḥ /
indriyám evá somapīthám ávarundhe /
téna_indriyéṇa dvitī́yāṃ jāyā́m abhyàśnute //

1.3.10.3

etád vái brā́hmaṇaṃ purā́ vājaśravasā́ vidā́m akrann /
tásmāt te dvé_dve jāyé abhyā̀kṣata /
yá eváṃ véda /
abhí dvitī́yāṃ jāyā́m aśnute /
agnáye kavyavā́hanāya svadhā́ náma íty āha /
yá evá pitṝṇā́m agníḥ /
táṃ prīṇāti /
tisrá ā́hutīr juhoti /
trír nídadhāti /
ṣáṭ sáṃpadyante //

1.3.10.4

ṣáḍ vā́ ṛtávaḥ /
ṛtū́n evá prīṇāti /
tūṣṇī́ṃ mékṣaṇam ā́dadhāti /
ásti vā hí ṣaṣṭhá ṛtúr ná vā /
devā́n vái pitṛ́̄n prītā́n /
manuṣyā̀ḥ pitáro 'nu prápipate /
tisrá ā́hutīr juhoti trír nídadhāti /
ṣáṭ sáṃpadyante /
ṣáḍ vā́ ṛtávaḥ //

1.3.10.5

ṛtávaḥ khálu vái devā́ḥ pitáraḥ /
ṛtū́n evá devā́n pitṛ́̄n prīṇāti /
tā́n prītā́n /
manuṣyā̀ḥ pitáro 'nu prapipate /
sakṛdācchinnáṃ barhír bhavati /
sakṛ́d iva hí pitáraḥ /
trír nídadhāti /
tṛtī́ye vā́ itó loké pitáraḥ /
tā́n evá prīṇāti /
párāṅ ā́vartate //

1.3.10.6

hlī́kā hí pitáraḥ /
ā́_uṣmáṇo vyāvṛ́ta úpāste /
ūṣmábhāgā hí pitáraḥ /
brahmavādíno vadanti /
prā́śyā́3ṃ ná prā́śyā́3m íti /
yát prāśnīyā́t /
jányam ánnam adyāt /
pramā́yukaḥ syāt /
yán ná prāśnīyā́t /
áhaviḥ syāt //

1.3.10.7

pitṛ́bhya ā́vṛścyeta /
avaghréyam evá /
tán ná_iva prā́śitaṃ ná_iva_áprāśitam /
vīráṃ vā vái pitáraḥ prayánto háranti /
vīráṃ vā dadati /
daśā́ṃ chinatti /
háraṇabhāgā hí pitáraḥ /
pitṛ́̄n evá nirávadayate /
úttara ā́yuṣi lóma chindīta /
pitṝṇā́m̐ hy etarhi nédīyaḥ //

1.3.10.8

námaskaroti /
namaskāró hí pitṝṇā́m /
námo váḥ pitaro rásāya /
námo váḥ pitaraḥ śúṣmāya /
námo vaḥ pitaro jīvā́ya /
námo vaḥ pitaraḥ svadhā́yai /
námo vaḥ pitaro manyáve /
námo vaḥ pitaro ghorā́ya /
pítaro námo vaḥ /
yá etásmin loké sthá //

1.3.10.9

yuṣmā́m̐s té nu /
yè 'smín loké /
mā́ṃ té 'nu /
yá etásmim̐l loké sthá /
yūyáṃ téṣāṃ vásiṣṭhā bhūyāsta /
yè 'smím̐l loké /
aháṃ téṣāṃ vásiṣṭho bhūyāsam íty āha /
vásiṣṭhaḥ samānā́nāṃ bhavati /
yá eváṃ vidvā́n pitṛ́bhyaḥ karóti /
eṣá vái manuṣyā̀ṇāṃ yajñáḥ //

1.3.10.10

devā́nāṃ vā́ ítare yajñā́ḥ /
téna vā́ etát pitṛloké carati /
yáḥ pitṛ́bhyaḥ karóti /
sá īśvaráḥ prámetoḥ /
prājāpatyáyā_ṛcā́ púnar áiti /
yajñó vái prajā́patiḥ /
yajñénaivá sahá púnar áiti /
ná pramā́yuko bhavati /
pitṛloké vā́ etád yájamānaś carati /
yát pitṛ́bhyaḥ karóti /
sá īśvará ā́rtim ā́rtoḥ /
prajā́patis tvā́ váinaṃ táta únnetum arhati_íty āhuḥ /
yát prājāpatyáyā_ṛcā́ púnar áiti /
prajā́patir eváinaṃ táta únnayati /
ná_ā́rtim ā́rcchati yájamānaḥ //

Commentaries (4)

Linked texts (8)