Pramāṇa · Search · About · API

Taittiriyabrahmana 1.3.2

Taittirīyabrāhmaṇa 1.3.2

Language
Sanskrit

1.3.2.1

devā́ vái yáthādarśaṃ yajñā́n ā́haranta /
yò 'gniṣṭomám /
yá ukthyàm /
yò 'tirātrám /
té saháivá sárve vājapéyam apaśyan /
té /
anyònyasmai nā́tiṣṭhanta /
ahám anéna yajā íti /
tè 'bruvan /
ājím asyá dhāvāméti //

1.3.2.2

tásminn ājím adhāvan /
táṃ bṛ́haspátir údajayat /
ténāyajata /
sá svā́rājyam agacchat /
tám índro 'bravīt /
mā́m anéna yājayéti /
ténéndram ayājayat /
só 'graṃ devátānāṃ páryait /
ágacchat svā́rājyam /
átiṣṭhantāsmai jyáiṣṭhyāya //

1.3.2.3

yá eváṃ vidvā́n vājapéyena yájate /
gácchati svā́rājyam /
ágram̐ samānā́nāṃ páryeti /
tíṣṭhante 'smai jyáisṭhyāya /
sá vā́ eṣá brāhmaṇásya caivá rājanyàsya ca yajñáḥ /
táṃ vā́ etáṃ vājapéya íty āhuḥ /
vājā́pyo vā́ eṣáḥ /
vā́jam̐ hy èténa devā́ áipsann /
sómo vái vājapéyaḥ /
yó vái sómaṃ vājapéyaṃ véda //

1.3.2.4

vājy èváinaṃ pītvā́ bhavati /
ā́sya vājī́ jāyate /
ánnaṃ vái vājapéyaḥ /
yá eváṃ véda /
átty ánnam /
ā́syān nādó jāyate /
bráhma vái vājapéyaḥ /
yá eváṃ véda /
átti bráhmaṇā́nnam /
ā́sya brahmā́ jāyate //

1.3.2.5

vā́g vái vā́jasya prasaváḥ /
yá eváṃ véda /
karóti vācā́ vīryàm /
áinaṃ vācā́ gacchati /
ápivatīṃ vā́caṃ vadati /
prajā́patir devébhyo yajñā́n vyā́diśat /
sá ātmán vājapéyam adhatta /
táṃ devā́ abruvan /
eṣá vā́vá yajñáḥ /
yád vājapéyaḥ //

1.3.2.6

ápy evá nó 'tra_astv íti /
tébhya etā́ újjitīḥ prā́yacchat /
tā́ vā́ etā́ újjitayo vyā́khyāyante /
yajñásya sarvatvā́ya /
devátānām ánirbhāgāya /
devā́ vái bráhmaṇaś cā́nnasya ca śámalam ápāghnan /
yád bráhmaṇaḥ śámalam āsīt /
sā́ gā́thā nārāśam̐sy àbhavat /
yád ánnasya /
sā́ súrā //

1.3.2.7

tásmād gā́yataś ca mattásya ca ná pratigṛ́hyam /
yátpratigṛhṇīyā́t /
śámalaṃ prátigṛhṇīyāt /
sárvā vā́ etásya vā́có 'varuddhāḥ /
yó vājapeyayājī́ /
yā́ pṛthivyā́ṃ yā́gnáu yā́ rathantaré /
yā́ntárikṣe yā́ vāyáu yā́ vāmadevyé /
yā́ diví yā́dityé yā́ bṛhatí /
yā́psú yáuṣadhīṣu yā́ vánaspátiṣu /
tásmād vājapeyayājy ā́rtvijīnaḥ /
sárvā hy àsya vā́có 'varuddhāḥ //

Commentaries (4)

Linked texts (7)