Pramāṇa · Search · About · API

Taittiriyabrahmana 1.3.3

Taittirīyabrāhmaṇa 1.3.3

Language
Sanskrit

1.3.3.1

devā́ vái yád anyáir gráhair yajñásya nā́vā́rundhata /
tád atigrāhyàir atigṛ́hyā́vārundhata /
tád atigrāhyā̀ṇām atigrāhyatvám /
yád atigrāhyā̀ gṛhyánte /
yád evā́nyáir gráhair yajñásya nā́varundhé /
tád evá táir atigṛ́hyā́varundhe /
páñca gṛhyante /
pā́ṅkto yajñáḥ /
yā́vān evá yajñáḥ /
tám āptvā́varundhe //

1.3.3.2

sárva aindrā́ bhavanti /
ekadháivá yájamāna indriyáṃ dadhati /
saptádaśa prājāpatyā́ gráhā gṛhyante /
saptadaśáḥ prajā́patiḥ /
prajā́pater ā́ptyai /
ékayarcā́ gṛhṇāti /
ekadháivá yájamāne vīryàṃ dadhāti /
somagrahā́m̐ś ca surāgrahā́m̐ś ca gṛhṇāti /
etád vái devā́nāṃ paramám ánnam /
yát sómaḥ //

1.3.3.3

etán manuṣyā̀ṇām /
yát súrā /
paraméṇaivā́smā annā́dyenā́varam annā́dyam ávarundhe /
somagrahā́n gṛhṇāti /
bráhmaṇo vā́ etát téjaḥ /
yát sómaḥ /
bráhmaṇa evá téjasā téjo yájamāne dadhāti /
surāgrahā́n gṛhṇāti /
ánnasya vā́ etác chámalam /
yát súrā //

1.3.3.4

ánnasyaivá śámalena śámalaṃ yájamānād ápahanti /
somagrahā́m̐ś ca surāgrahā́m̐ś ca gṛhṇāti /
púmān vái sómaḥ /
strī́ súrā /
tán mithunám /
mithunám evā́sya tád yajñé karoti prajánanāya /
ātmā́nam evá somagraháiḥ spṛṇoti /
jāyā́m̐ surāgraháiḥ /
tásmād vājapeyayājy àmúṣmim̐l loké stríyam̐ sáṃbhavati /
vājapéyābhijitam̐ hy àsya //

1.3.3.5

pū́rve somagrahā́ gṛhyante /
ápare surāgrahā́ḥ /
purokṣám̐ somagrahā́n sādayati /
paścādakṣám̐ surāgrahā́n /
pāpavasyasásya vídhṛtyai /
eṣá vái yájamānaḥ /
yát sómaḥ /
ánnam̐ súrā /
somagrahā́m̐ś ca surāgrahā́m̐ś ca vyátiṣajati /
annā́dyenaiváinaṃ vyátiṣajati //

1.3.3.6

saṃpṛ́caḥ stha sáṃ mā bhdréṇa pṛṅktéty āha /
ánnaṃ vái bhadrám /
annā́dyenaiváinam̐ sám̐sṛjati /
ánnasya vā́ etác chámalam /
yát súrā /
pāpmáiva khálu vái śámalam /
pāpmánā vā́ etam etác chámalena vyátiṣajati /
yát somagrahā́m̐ś ca surāgrahā́m̐ś ca vyatiṣájati /
vipṛ́caḥ stha ví mā pāpmánā pṛṅktéty āha /
pāpmánaiváinam̐ śámalena vyā́vartayati //

1.3.3.7

tásmād vājapeyayājī́ pūtó médhyo dakṣiṇyàḥ /
prā́ṅ dravati somagraháiḥ /
amúm evá táir lokám abhíjayati /
pratyáṅ surāgraháiḥ /
imám evá táir lokám abhíjayati /
prátiṣṭhanti somagraháiḥ /
yā́vad evá satyám /
téna sūyate /
vājasṛ́dbhyaḥ surāgrahā́n haranti /
ánṛtenaivá víśam̐ sám̐sṛjati /
hiraṇyapātráṃ mádhoḥ pūrṇáṃ dadāti /
madhvyò 'sānī́ti /
ekadhā́ brahmáṇa úpaharati /
ekadháivá yájamāna ā́yus téjo dadhāti //

Commentaries (4)

Linked texts (5)