Pramāṇa · Search · About · API

Taittiriyabrahmana 1.3.4

Taittirīyabrāhmaṇa 1.3.4

Language
Sanskrit

1.3.4.1

brahmavādíno vadanti /
na_ágniṣṭomó na_úkthyaḥ /
ná ṣoḍaśī́ na_átirātráḥ /
átha kásmād vājapéye sárve yajñakratávo 'varudhyanta íti /
paśúbhir íti brūyāt /
āgneyáṃ paśúm ā́labhate /
agniṣṭomám evá téná_avarundhe /
aindrāgnéna_ukthyàm /
aindréṇa ṣoḍaśinaḥ stotrám /
sārasvatyā́_atirātrám //

1.3.4.2

mārutyā́ bṛhatáḥ stotrám /
etā́vanto vái yajñakratávaḥ /
tā́n paśúbhir evá_avarundhe /
ātmā́nam evá spṛṇoty agniṣṭoména /
prāṇāpānā́v ukthyèna /
vīryàm̐ ṣoḍaśínaḥ stotréṇa /
vā́cam atirātréṇa /
prajā́ṃ bṛhatáḥ stotréṇa /
imám evá lokám abhíjayaty agniṣṭoména /
antárikṣam ukthyèna //

1.3.4.3

suvargáṃ lokám̐ ṣoḍaśínaḥ stotréṇa /
devayā́nān evá pathá ā́rohaty atirātréṇa /
nā́kam̐ rohati bṛhatáḥ stotréṇa /
téja evā́tmán dhatta āgneyéna paśúnā /
ójo bálam aindrāgnéna /
indriyám aindréṇa /
vā́cam̐ sārasvatyā́ /
ubhā́v evá devalokáṃ ca manuṣyalokáṃ ca_abhíjayati mārutyā́ vaśáyā /
saptádaśa prājāpatyā́n paśū́n ā́labhate /
saptadaśáḥ prajā́patiḥ //

1.3.4.4

prajā́pater ā́ptyai /
śyāmā́ ékarūpā bhavanti /
evám iva hí prajā́patiḥ sámṛddhyai /
tā́n páryagnikṛtān útsṛjati /
marúto yajñám ajighām̐san prajā́pateḥ /
tébhya etā́ṃ mārutī́ṃ vaśā́m ā́labhata /
táyaiváinān aśamayat /
mārutyā́ pracárya /
etā́n sáṃjñapayet /
marúta evá śamayitvā́ //

1.3.4.5

etáiḥ prácarati /
yajñásya_ághātāya /
ekadhā́ vapā́ juhoti /
ekadevatyā̀ hi /
eté /
átho ekadháivá yájamāne vīryàṃ dadhāti /
naivāréṇa saptádaśaśarāveṇa_etárhi prácarati /
etát puroḍāśā hy èté /
átho paśūnā́m evá cchidrám ápidadhāti /
sārasvatyā́_uttamáyā prácarati /
vā́g vái sárasvatī /
tásmāt prāṇā́nāṃ vā́g uttamā́ /
átho prajā́patāv evá yajñáṃ prátiṣṭhāpayati /
prajā́patir hí vā́k /
ápannadatī bhavati /
tásmān manuṣyā̀ḥ sarvāṃ vā́caṃ vadanti //

Commentaries (4)

Linked texts (4)