Taittiriyabrahmana 1.3.5
Taittirīyabrāhmaṇa 1.3.5
- Language
- Sanskrit
1.3.5.1
sāvitráṃ juhoti kármaṇaḥ karmaṇaḥ purástāt /
kás tád veda_íty āhuḥ /
yád vājapéyasya pū́rvaṃ yád áparam íti /
savitṛ́prasūta evá yathāpūrváṃ kármāṇi karoti /
sávane_savane juhoti /
ākrámaṇam evá tát sétuṃ yájamānaḥ kurute /
suvargásya lokásya sámaṣṭyai /
vācáspátir vā́cam adyá svadāti na íty āha /
vā́g vái devā́nāṃ purā́nnam āsīt /
vā́cam evā́smā ánnam̐ svadayati //
1.3.5.2
índrasya vájro 'si vā́rtraghna íti rátham upā́vaharati víjityai /
vā́jasya nú prasavé mātáraṃ mahī́m íty āha /
yác caivá_iyám /
yác ca_asyā́m ádhi /
tádevá_avarundhe /
átho tásminn evá_ubhaye 'bhíṣicyate /
apsv àntár amṛ́tam apsú bheṣajám íty áśvān palpūlayati /
apsú vā́ áśvasya tṛ́tīyaṃ práviṣṭam /
tád anuvénan v ávaplavate /
yád apsú palpūláyati //
1.3.5.3
yád evā́sya_apsú práviṣṭam /
tád evá_avarundhe /
bahú vā́ áśvo 'medhyám úpagacchati /
yád apsú palpūláyati /
médhyān eváinān karoti /
vāyúr vā tvā mánur vā tvā_íty āha /
etā́ vā etáṃ devátā ágre áśvam ayuñjan /
tā́bhir eváinān yunakti /
savásya_újjityai /
yájuṣā yunakti vyā́vṛttyai //
1.3.5.4
ápāṃnapād āśuhemann íti sáṃmārṣṭi /
médhyān eváinān karoti /
átho stáuty eváinān ājím̐ sariṣyatáḥ /
viṣṇukramā́n kramate /
víṣṇur evá bhūtvémā́n lokā́n abhíjayati /
vaiśvadevó vái ráthaḥ /
aṅkáu nyaṅkā́v abhíto ráthaṃ yā́v íty āha /
yā́ evá devátā ráthe práviṣṭāḥ /
tā́bhya evá námaskaroti /
ātmánó 'nārtyai /
áśamarathaṃbhāvuko 'sya rátho bhavati /
yá eváṃ véda //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- A Vedic Concordance — Maurice Bloomfield, English
- Vedic Index of Names and Subjects — Arthur A. Macdonell & A. Berriedale Keith, English