Pramāṇa · Search · About · API

Taittiriyabrahmana 1.3.6

Taittirīyabrāhmaṇa 1.3.6

Language
Sanskrit

1.3.6.1

devásyāhám̐ savitúḥ prasavé bṛ́haspátinā vājajítā vā́jaṃ jeṣam íty āha /
savitṛ́prasūta evá bráhmaṇā vā́jam újjayati /
devásyāhám̐ savitúḥ prasavé bṛ́haspátinā vājajítā várṣiṣṭhaṃ nā́kam̐ ruheyam íty āha /
savitṛ́prasūta evá bráhmaṇā várṣiṣṭhaṃ nā́kam̐ rohati /
cā́tvāle rathacakráṃ nímitam̐ rohati /
áto vā́ áṅgirasa uttamā́ḥ suvargáṃ lokám āyan /
sākṣā́d evá yájamānaḥ suvargáṃ lokám eti /
ā́veṣṭayati /
vájro vái ráthaḥ /
vájreṇaivá díśo 'bhíjayati //

1.3.6.2

vājínām̐ sā́ma gāyate /
ánnaṃ vái vā́jaḥ /
ánnam evá_avarundhe /
vācó várṣma devébhyó 'pākrāmat /
tád vánaspátīn prā́viśat /
sáiṣā́ vā́g vánaspátiṣu vadati /
yā́ dundubháu /
tásmād dundubhíḥ sárvā vā́co 'tivadati /
dundubhī́n samā́ghnanti /
paramā́ vā́ eṣā́ vā́k //

1.3.6.3

yā́ dundubháu /
paramáyaivá vācā́_avarāṃ vā́cam ávarundhe /
átho vācá evá várṣma yájamāno 'varundhe /
índrāya vā́caṃ vadata_índraṃ vā́jaṃ jāpayata_índro vā́jam ajayid íty āha /
eṣá vā́ etárhi_índraḥ /
yó yájate /
yájamāna evá vā́jam újjayati /
saptádaśa pravyādhā́n ājíṃ dhāvanti /
saptadaśám̐ stotráṃ bhavati /
saptádaśa_saptadaśa dīyante //

1.3.6.4

saptadaśáḥ prajā́patiḥ /
prajā́pater ā́ptyai /
árvā_asi sáptir asi vājyàsī́ty āha /
agnír vā́ árvā /
vāyúḥ sáptiḥ /
ādityó vājī́ /
etā́bhir evā́smai devátābhir devaratháṃ yunakti /
praṣṭivāhínaṃ yunakti /
praṣṭivāhī́ vái devaratháḥ /
devarathám evā́smai yunakti //

1.3.6.5

vā́jino vā́jaṃ dhāvata kā́ṣṭhāṃ gacchatéty āha /
suvargó vái lokáḥ kā́ṣṭhā /
suvargám evá lokáṃ yanti /
suvargáṃ vā́ eté lokáṃ yanti /
yá ājíṃ dhā́vanti /
prā́ñco dhāvanti /
prā́ṅ iva hí suvargó lokáḥ /
catasṛ́bhir ánumantrayate /
catvā́ri cchándā́m̐si /
chándobhir eváinān suvargáṃ lokáṃ gamayati //

1.3.6.6

prá vā́ etè 'smāl lokā́c cyavante /
yá ājíṃ dhā́vanti /
údañca ā́vartante /
asmā́d evá téna lokā́n náyanti /
rathavimocanī́yaṃ juhoti prátiṣṭhityai /
ā́ mā vā́jasya prasavó jagamyād íty āha /
ánnaṃ vái vā́jaḥ /
ánnam evá_avarundhe /
yathālokáṃ vā́ etá újjayanti /
yá ājíṃ dhā́vanti //

1.3.6.7

kṛṣṇálaṃ_kṛṣṇalaṃ vājasṛ́dbhyaḥ práyacchati /
yám evá té vā́jaṃ lokám ujjáyanti /
táṃ parikrī́ya_ávarundhe /
ekadhā́ brahmáṇa úpaharati /
ekadháivá yájamāne vīryàṃ dadhāti /
devā́ vā́ óṣadhīṣv ājím ayuḥ /
tā́ bṛ́haspátir údajayat /
sá nīvā́rān níravṛṇīta /
tán nīvā́rāṇāṃ nīvāratvám /
naivāráś carúr bhavati //

1.3.6.8

etád vái devā́nāṃ paramám ánnam /
yán nīvā́rāḥ /
paraméṇaivā́smā annā́dyena_ávaram annā́dyam ávarundhe /
saptádaśaśarāvo bhavati /
saptadaśáḥ prajā́patiḥ /
prajā́pater ā́ptyai /
kṣīré bhavati /
rúcam evā́smin dadhāti /
sarpíṣvān bhavati medhyatvā́ya /
bārhaspatyó vā́ eṣá devátayā //

1.3.6.9

yó vājapéyena yájate /
bārhaspatyá eṣá carúḥ /
áśvān sariṣyatáḥ sasrúṣaś ca_ávaghrāpayati /
yám evá té vā́jaṃ lokám ujjáyanti /
tám evá_avarundhe /
ájījipata vanaspataya índraṃ vā́jaṃ vímucyadhvam íti dundubhī́n vímuñcati /
yám evá té vā́jaṃ lokám indriyáṃ dundubháya ujjáyanti /
tám evá_avarundhe //

Commentaries (4)

Linked texts (6)