Pramāṇa · Search · About · API

Taittiriyabrahmana 1.3.7

Taittirīyabrāhmaṇa 1.3.7

Language
Sanskrit

1.3.7.1

tārpyáṃ yájamānaṃ páridhāpayati /
yajñó vái tāpryám /
yajñénaiváinam̐ sámardhayati /
darbhamáyaṃ páridhāpayati /
pavítraṃ vái darbhā́ḥ /
punā́ty eváinam /
vā́jaṃ vā́ eṣó 'varurutsate /
yó vājapéyena yájate /
óṣadhayaḥ khálu vái vā́jaḥ /
yád darbhamáyaṃ paridhāpáyati //

1.3.7.2

vā́jasya_ávaruddhyai /
jā́ya éhi súvo róhāva_íty āha /
pátniyā eváiṣá yajñásya_anvārambhó 'navacchityai /
saptádaśāratnir yūpo bhavati /
saptadaśáḥ prajā́patiḥ /
prajā́pater ā́ptyai /
tūparáś cáturaśrir bhavati /
gaudhūmáṃ caṣā́lam /
ná vā́ eté vrīháyo ná yávāḥ /
yád godhūmāḥ //

1.3.7.3

evám iva hí prajā́patiḥ sámṛddhyai /
átho amúm evā́smai lokám ánnavantaṃ karoti /
vā́sobhir veṣṭayati /
eṣá vái yájamānaḥ /
yád yū́paḥ /
sarvadevatyàṃ vā́saḥ /
sárvābhir eváinaṃ devátābhiḥ sámardhayati /
átho ākrámaṇam evá tát sétuṃ yájamānaḥ kurute /
suvargásya lokásya sámaṣṭyai /
dvā́dáśa vājaprasavī́yāni juhoti //

1.3.7.4

dvā́daśa mā́sāḥ saṃvatsaráḥ /
saṃvatsarám evá prīṇāti /
átho saṃvatsarám evā́smā úpadadhāti /
suvargásya lokásya sámaṣṭyai /
daśábhiḥ kálpai rohati /
navá vái puruṣe prāṇā́ḥ /
nā́bhir daśamī́ /
prāṇā́n evá yathāsthānáṃ kalpayitvā́ /
suvargáṃ lokám eti /
etā́vad vái púruṣasya svám //

1.3.7.5

yā́vat prāṇā́ḥ /
yā́vad evā́sya_ásti /
téna sahá suvargáṃ lokám eti /
súvar devā́m̐ aganma_íty āha /
suvargám evá lokám eti /
amṛ́tā abhūma_íty āha /
amṛ́tam iva hí suvargo lokáḥ /
prajā́pateḥ prajā́ abhuma_íty āha /
prājāpatyó vā́ ayáṃ lokáḥ /
asmā́d evá téna lokā́n ná_eti //

1.3.7.6

sám aháṃ prajáyā sáṃ máyā prajā́_íty āha /
āśíṣam eváitā́m ā́śāste /
āsapuṭáir ghnanti /
ánnaṃ vā́ iyám /
annā́dyenaiváinam̐ sámardhayanti /
ū́ṣair ghnanti /
eté hí sākṣā́d ánnam /
yád ū́ṣāḥ /
sākṣā́d eváinam annā́dyena sámardhayanti /
purástāt pratyáñcaṃ ghnanti //

1.3.7.7

purástād dhí pratīcī́nam ánnam adyáte /
śīrṣató ghnanti /
śīrṣató hy ánnam adyate /
digbhyó ghnanti /
digbhyá evā́smā annā́dyam ávarundhate /
īśvaró vā́ eṣá párāṅ pradághaḥ /
yó yū́pam̐ rohati /
híraṇyam adhy àvarohati /
amṛ́taṃ vái híraṇyam /
amṛ́tam̐ suvargó lokáḥ //
amṛ́ta evá suvargé loké prátitiṣṭhati /
śatámānaṃ bhavati /
śatā́yuḥ púruṣaḥ śaténdriyaḥ /
ā́yuṣy evá_indriyé prátitiṣṭhati /
púṣṭyai vā́ etád rūpám /
yád ajā́ /
tríḥ saṃvatsarásyānyā́n paśū́n pári prájāyate /
bastājinám adhy àvarohati /
púṣṭyām evá prajánane prátitiṣṭhati //

Commentaries (4)

Linked texts (6)