Taittiriyabrahmana 1.3.8
Taittirīyabrāhmaṇa 1.3.8
- Language
- Sanskrit
1.3.8.1
saptā́nnahomā́ñ juhoti /
saptá vā́ ánnāni /
yā́vanty evá_ánnāni /
tā́ny evá_avarundhe /
saptá grāmyā́ óṣadhayaḥ /
saptá_araṇyā́ḥ /
ubháyīṣām ávaruddhyai /
ánnasya_annasya juhoti /
ánnasya_annasya_ávaruddhyai /
yád vājapeyayājy ánavaruddhasya_aśnīyā́t //
1.3.8.2
ávaruddhena vyṛ̀dhyeta /
sárvasya samavadā́ya juhoti /
ánavaruddhasya_ávaruddhyai /
áudumbareṇa sruvéṇa juhoti /
ū́rg vā́ ánnam udumbáraḥ /
ūrjá evá_annā́dyasya_ávaruddhyai /
devásya tvā savitúḥ prasava íty āha /
savitṛ́prasūta eváinaṃ bráhmaṇā devátābhir abhíṣiñcati /
ánnasya_annasya_abhíṣiñcati /
ánnasya_annasyā́varuddhyai //
1.3.8.3
purástāt pratyáñcam abhíṣiñcati /
purástād dhí pratīcī́nam ánnam adyáte /
śīrṣatò 'bhíṣiñcati /
śīrṣató hy ánnam adyáte /
ā́ múkhād anv ávasrāvayati /
mukhatá evā́smā annā́dyaṃ dadhāti /
agnés tvā sā́mrājyena_abhíṣiñcāmi_íty āha /
eṣá vā́ agnéḥ saváḥ /
ténaiváinam abhíṣiñcati /
indrasya tvā sā́mrājyena_abhíṣiñcāmi_íty āha //
1.3.8.4
indriyám evā́sminn eténa dadhāti /
bṛ́haspátes tvā sā́mrājyena_abhíṣiñcāmi_íty āha /
bráhma vái devā́nāṃ bṛ́haspátiḥ /
bráhmaṇā_eváinam abhíṣiñcati /
somagrahā́m̐ś ca_avadānīyā́ni ca_ṛtvígbhya úpa haranti /
amúm evá táir lokám ánnavantaṃ karoti /
surāgrahā́m̐ś ca_anavadānīyā́ni ca vājasṛ́dbhyaḥ /
imám evá táir lokám ánnavantaṃ karoti /
ábho ubháyīṣv evá_abhíṣicyate /
vimātháṃ kurvate vājasṛ́taḥ //
1.3.8.5
indriyásya_ávaruddhyai /
ániruktābhiḥ prātaḥsavané stuvate /
ániruktaḥ prajā́patiḥ /
prajā́pater ā́ptyai /
vā́javatībhir mā́dhyandine /
ánnaṃ vái vā́jaḥ /
ánnam evá_avarundhe /
śipiviṣṭávatībhis tṛtīyasavané /
yajñó vái víṣṇuḥ /
paśávaḥ śípiḥ /
yajñá evá paśúṣu prátitiṣṭhati /
bṛhád ántyaṃ bhavati /
ántam eváinam̐ śriyái gamayati //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (2)
- A Vedic Concordance — Maurice Bloomfield, English
- Altindische Grammatik — Jacob Wackernagel & Albert Debrunner, German