Taittiriyabrahmana 1.4.1
Taittirīyabrāhmaṇa 1.4.1
- Language
- Sanskrit
1.4.1.1
ubháye vā́ eté prajā́pater ádhyasṛjyanta /
devā́ś ca_ásurāś ca /
tā́n ná vyajānāt /
imè 'nyá imè 'nyá íti /
sá devā́nam̐ śūn akarot /
tā́n abhyàṣuṇot /
tā́n pavítreṇa_apunāt /
tā́n parástāt pavítrasya vyàgṛhṇāt /
té gráhā abhavan /
tád gráhāṇāṃ grahatvám //
1.4.1.2
devátā vā́ etā́ yájamānasya gṛhé gṛhyante /
yád gráhāḥ /
vidúr enaṃ devā́ḥ /
yásya_eváṃ vidúṣa eté gráhā gṛhyánte /
eṣā́ vái sómasya_ā́hutiḥ /
yád upām̐śúḥ /
sómena devā́m̐s tarpayāṇi_íti khálu vái sómena yajate /
yád upām̐śúṃ juhóti /
sómenaivá tád devā́m̐s tarpayati /
yád gráhāñ juhóti //
1.4.1.3
devā́ evá tád devā́n gacchanti /
yác camasāñ juhóti /
ténaiva_ánurūpeṇa yájamānaḥ suvargáṃ lokám eti /
kíṃ nv ètád ágra āsīd íty āhuḥ /
yát pā́trāṇi_íti /
iyáṃ vā́ etád ágra āsīt /
mṛnmáyāni vā́ etā́ny āsan /
táir devā́ ná vyāvṛ́tam agacchan /
tá etā́ni dārumáyāṇi pā́trāṇy apaśyan /
tā́ny akurvata //
1.4.1.4
táir vái té vyāvṛ́tam agacchan /
yád darumáyāṇi pā́trāṇi bhavanti /
vyāvṛ́tam evá táir yájamāno gacchati /
yā́ni darumáyāṇi pā́trāṇi bhávanti /
amúm evá táir lokám abhíjayati /
yā́ni mṛnmáyāni /
imámevá táir lokám abhíjayati /
brahmavādíno vadanti /
kā́ś cátasraḥ sthālī́r vāyavyā̀ḥ somagráhaṇīr íti /
devā́ vái pṛ́śnim aduhran //
1.4.1.5
tásyā eté stánā āsan /
iyáṃ vái pṛ́śniḥ /
tā́m ādityā́ ādityasthālyā́ cátuṣpadaḥ paśū́n aduhran /
yád ādityasthālī́ bhávati /
cátuṣpada evá táyā paśū́n yájamāna imā́ṃ duhe /
tā́m índra ukthyasthālyā́_índriyám aduhat /
yád ukthyasthālī́ bhávati /
indriyám evá táyā yájamāna imā́ṃ duhe /
tā́ṃ víśve devā́ āgrayaṇasthālyā́_ū́rjam aduhran /
yád āgrayaṇasthālī́ bhávati //
1.4.1.6
ū́rjam evá táyā yájamāna imā́ṃ duhe /
tā́ṃ manuṣyā̀ dhruvasthālyā́_ā́yur aduhran /
yád dhruvasthālī́ bhávati /
ā́yur evá táyā yájamāna imā́ṃ duhe /
sthālyā́ gṛhṇā́ti /
vāyavyèna juhoti /
tásmād anyéna pā́treṇa paśū́n duhánti /
anyéna prátigṛhṇanti /
átho vyāvṛ́tam evá tád yájamāno gacchati //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit