[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 1.4.10 # Taittiriyabrahmana 1.4.10 Taittirīyabrāhmaṇa 1.4.10 - **Language:** Sanskrit ### [1.4.10.1](https://indike.org/pramana/in.veda.brahmana.taittiriya.1.4.10.1) agnír vā́vá saṃvatsaráḥ / ādityáḥ parivatsaráḥ / candrámā idāvatsaráḥ / vāyúr anuvatsaráḥ / yád vaiśvadevéna yájate / agním evá tát saṃvatsarám āpnoti / tásmād vaiśvadevéna yájamānaḥ / saṃvatsarī́ṇām̐ svastím ā́śāsta íty ā́śāsīta / yád varuṇapraghāsáir yájate / ādityám evá tát parivatsarám āpnoti // ### [1.4.10.2](https://indike.org/pramana/in.veda.brahmana.taittiriya.1.4.10.2) tásmād varuṇapraghāsáir yájamānaḥ / parivatsarī́ṇām̐ svastím āśāsta íty ā́śāsīta / yát sākamedháir yájate / candrámasam evá tád idāvatsarám āpnoti / tásmāt sākamedháir yájamānaḥ / idāvatsarī́ṇām̐ savstim ā́śāsta íty ā́śāsīta / yát pitṛyajñéna yájate / devā́n evá tád anvávasyati / átha vā́ asya vāyúś ca\_anuvatsaráś ca\_áprītāv úcchiṣyete / yát\_śunāsīrī́yeṇa yájate // ### [1.4.10.3](https://indike.org/pramana/in.veda.brahmana.taittiriya.1.4.10.3) vāyúm evá tád anuvatsarám āpnoti / tásmāt\_śunāsīrī́yeṇa yájamānaḥ / anuvatsarī́ṇām̐ svastím ā́śāsta íty ā́śāsīta / saṃvatsaráṃ vā́ eṣá īpsati\_íty āhuḥ / yáś cāturmāsyáir yájata íti / eṣá ha tvái saṃvatsarám āpnoti / yá eváṃ vidvā́m̐ś cātúrmāsyáir yájate / víśve devā́ḥ sámayajanta / tè 'gnim evá\_áyajanta / tá etáṃ lokám ajayan // ### [1.4.10.4](https://indike.org/pramana/in.veda.brahmana.taittiriya.1.4.10.4) yásminn agníḥ / yád vaiśvadevéna yájate / etám evá lokáṃ jayati / yásminn agníḥ / agnér evá sā́yujyam úpaiti / yadā́ vaiśvadevéna yájate / átha saṃvatsarásya gṛhápatim āpnoti / yadā́ saṃvatsarásya gṛhápatim āpnóti / átha sahasrayājínam āpnoti / yadā́ sahasrayājínam āpnóti // ### [1.4.10.5](https://indike.org/pramana/in.veda.brahmana.taittiriya.1.4.10.5) átha gṛhamedhínam āpnoti / yadā́ gṛhamedhínam āpnóti / átha\_agnír bhavati / yadā́\_agnír bhávati / átha gáur bhavati / eṣā́ vái vaiśvadevásya mā́trā / etád vā́ etéṣām avamám / áto\_'to vā́ úttarāṇi śréyām̐si bhavanti / yád víśve devā́ḥ samáyajanta / tád vaiśvadevásya vaiśvadevatvám // ### [1.4.10.6](https://indike.org/pramana/in.veda.brahmana.taittiriya.1.4.10.6) átha\_ādityó váruṇam̐ rā́jānaṃ varuṇapraghāsáir ayajata / sá etáṃ lokám ajayat / yásminn ādityáḥ / yád varuṇapraghāsáir yajate / etám evá lokáṃ jayati / yásminn ādityáḥ / ādityásyaivá sā́yujyam úpaiti / yád ādityó váruṇam̐ rā́jānaṃ varuṇapraghāsáir áyajata / tád varuṇapraghāsā́naṃ varuṇapraghāsatvám / átha sómo rā́jā chándām̐si sākamedháir ayajata // ### [1.4.10.7](https://indike.org/pramana/in.veda.brahmana.taittiriya.1.4.10.7) sá etáṃ lokám ajayat / yásmim̐ś candrámā vibhā́ti / yát sākamedháir yájate / etám evá lokáṃ jayati / yásmim̐ś candrámā vibhā́ti / candrámasa evá sāyujyam úpaiti / sómo vái candrámāḥ / eṣá ha tvái sākṣā́t sómaṃ bhakṣayati / yá eváṃ vidvā́n sākamedháir yájate / yát sómaś ca rā́jā chándām̐si ca samáidhanta // ### [1.4.10.8](https://indike.org/pramana/in.veda.brahmana.taittiriya.1.4.10.8) tát sākamedhā́nām̐ sākamedhātvám / átha\_ṛtávaḥ pitáraḥ prajā́patiṃ pitáraṃ pitṛyajñéna\_ayajanta / tá etáṃ lokám ajayan / yásminn ṛtávaḥ / yát pitṛyajñéna yájate / etám evá lokáṃ jayati / yásminn ṛtávaḥ / ṛtūnā́m evá sā́yujyam úpaiti / yád ṛtávaḥ pitáraḥ prajā́patiṃ pitáraṃ pitṛyajñéna\_áyajanta / tát pitṛyajñasya pitṛyajñatvám // ### [1.4.10.9](https://indike.org/pramana/in.veda.brahmana.taittiriya.1.4.10.9) átha\_óṣadhaya imáṃ deváṃ tryambakair ayajanta práthemahi\_íti / táto vái tā́ aprathanta / yá eváṃ vidvā́m̐s tryambakair yájate / práthate prajáyā paśúbhiḥ / átha vāyúḥ parameṣṭhínam̐ śunāsīrī́yeṇa\_ayajata / sá etáṃ lokám ajayat / yásmin vāyúḥ / yát\_śunāsīrī́yeṇa yájate / etám evá lokáṃ jayati / yásmin vāyúḥ // ### [1.4.10.10](https://indike.org/pramana/in.veda.brahmana.taittiriya.1.4.10.10) vāyór evá sā́yujyam úpaiti / brahmavādíno vadanti / prá cāturmāsyayājī́ mīyatā́3 ná prámīyatā́3 íti / jī́van vā́ eṣá ṛtū́n ápyeti / yádi vasántā pramī́yate / vasantó bhavati / yádi grīṣmé grīṣmáḥ / yádi varṣā́su varṣā́ḥ / yádi śarádi śarát / yádi héman hemantáḥ / ṛtúr bhūtvā́ saṃvatsarám ápyeti / saṃvatsaraḥ prajā́patiḥ / prajā́patir vā́váiṣáḥ // ## Linked texts (2) - [Baudhāyanaśrautasūtra](https://indike.org/pramana/in.vedanga.kalpa.srauta.baudhayana.14.30.203.4) — Baudhāyana, Sanskrit - [Pañcaviṃśabrāhmaṇa](https://indike.org/pramana/in.veda.brahmana.pancavimsa.191) — Sanskrit --- Source: [https://indike.org/pramana/in.veda.brahmana.taittiriya.1.4.10](https://indike.org/pramana/in.veda.brahmana.taittiriya.1.4.10) · Pramāṇa