Taittiriyabrahmana 1.4.2
Taittirīyabrāhmaṇa 1.4.2
- Language
- Sanskrit
1.4.2.1
yuvám̐ surā́mam aśvinā /
námucāv āsuré sácā /
vipipānā́ śubhaspatī /
índraṃ kármasvāvatam /
putrám iva pitárāv aśvínā_ubhā́ /
indra_āvataṃ kármaṇā dam̐sánābhiḥ /
yát surā́maṃ vyápibaḥ śácībhiḥ /
sáravatī tvā maghavann abhīṣṇāt /
áhāvy agne havír āsyè te /
srucí_iva ghṛtáṃ camū́ iva sómaḥ //
1.4.2.2
vājasánim̐ rayím asmé suvī́ram /
praśastáṃ dhehi yaśásaṃ bṛhántam /
yásminn áśvāsa ṛṣabhā́sa ukṣáṇaḥ /
vaśā́ meṣā́ avasṛṣṭā́sa ā́hutāḥ /
kīlālapé sómapṛṣṭhāya vedháse /
hṛdā́ matíṃ janaya cā́rum agnáye /
nā́nā hí vāṃ deváhitam̐ sádo mitám /
mā́ sám̐sṛkṣāthāṃ paramé vyòman /
súrā tvám ási śuṣmíṇī sóma eṣáḥ /
mā́ mā him̐sīḥ svā́ṃ yónim āviśán //
1.4.2.3
yád átra śiṣṭám̐ rasínaḥ sutásya /
yád índro ápibac_śácībhiḥ /
aháṃ tád asya mánasā śivéna /
sómam̐ rā́jānam ihá bhakṣayāmi /
dvé srutī́ aśṛṇavaṃ pitṝṇā́m /
aháṃ devā́nām utá mártyānām /
tā́bhyām idáṃ víśvaṃ bhúvanam̐ sámeti /
antarā́ pū́rvam áparaṃ ca ketúm /
yás te deva varuṇa gāyatráchandāḥ pā́śaḥ /
táṃ ta eténa_ávayaje //
1.4.2.4
yás te deva varuṇa triṣṭúpchandāḥ pā́śaḥ /
táṃ ta eténa_ávayaje /
yás te deva varuṇa jágatīchandāḥ pā́śaḥ /
táṃ ta eténa_ávayaje /
sómo vā́ etásya rājyám ā́datte /
yó rā́jā sán rājyó vā sómena yájate /
devasuvā́m etā́ni havī́m̐ṣi bhavanti /
etā́vanto vái devā́nām̐ savā́ḥ /
tá evā́smai savā́n práyacchanti /
tá enaṃ púnaḥ suvante rājyā́ya /
devasū́ rā́jā bhavati //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (3)
- A Vedic Concordance — Maurice Bloomfield, English
- History of Dharmaśāstra (Ancient and Mediaeval Religious and Civil Law in India) — P. V. Kane, English
- Altindische Grammatik — Jacob Wackernagel & Albert Debrunner, German