Taittiriyabrahmana 1.4.3
Taittirīyabrāhmaṇa 1.4.3
- Language
- Sanskrit
1.4.3.1
údasthād devy áditir viśvarūpī́ /
ā́yur yajñápatāv adhāt /
índrāya kṛṇvatī́ bhāgám /
mitrā́ya váruṇāya ca /
iyáṃ vā́ agnihotrī́ /
iyáṃ vā́ etásya níṣīdati /
yásya_agnihotrī́ niṣī́dati /
tā́m útthāpayet /
údasthād devy áditir íti /
iyáṃ vái devy áditiḥ //
1.4.3.2
imā́m evā́smā útthāpayati /
ā́yur yajñápatāv adhād íty āha /
ā́yur evā́smin dadhāti /
índrāya kṛṇvatī́ bhāgáṃ mitrā́ya váruṇāya ca_íty āha /
yathāyajúr eváitát /
ávartiṃ vā́ eṣáitásya pāpmā́naṃ pratikhyā́ya níṣīdati /
yásya_agnihotry úpasṛṣṭā níṣīdati /
tā́ṃ dugdhvā́ brāhmaṇā́ya dadyāt /
yásya_ánnaṃ ná_adyā́t /
ávartim evā́smin pāpmā́naṃ prátimuñcati //
1.4.3.3
dugdhvā́ dadāti /
ná hy ádṛṣṭā dákṣiṇā dīyáte /
pṛthivī́ṃ vā́ etásya páyaḥ práviśati /
yásya_agnihotráṃ duhyámānam̐ skándati /
yád adyá dugdháṃ pṛthivī́m ásakta /
yád óṣadhīr apyásarad yád ā́paḥ /
páyo gṛhéṣu páyo aghniyā́su /
páyo vatséṣu páyo astu tán máyi_íty āha /
páya evá_ātmán gṛhéṣu paśúṣu dhatte /
apá úpasṛjati //
1.4.3.4
adbhír eváinad āpnoti /
yó vái yajñásya_ā́rtena_ánārtam̐ sam̐sṛjáti /
ubhé vái té tárhy ā́rchataḥ /
ā́rchati khálu vā́ etád agnihotrám /
yád duhyámānam̐ skándati /
yád abhiduhyā́t /
ā́rtena_ánārtaṃ yajñásya sám̐sṛjet /
tád evá yādṛ́k kīdṛ́k ca hotavyàm /
átha_anyā́ṃ dugdhvā́ púnar hotavyàm /
ánārtenaivá_ā́rtaṃ yajñásya níṣkaroti //
1.4.3.5
yády úddrutasya skándet /
yát tátó 'hutvā púnar eyā́t /
yajñáṃ vícchindyāt /
yátra skándet /
tán niṣádya púnar gṛhṇīyāt /
yátraivá skándati /
táta eváinat púnar gṛhṇāti /
tád evá yādṛ́k kīdṛ́k ca hotavyàm /
átha_anyāṃ dugdhvā́ púnar hotavyàm /
ánārtenaivá_ā́rtaṃ yajñásya níṣkaroti //
1.4.3.6
ví vā́ etásya yajñáś chidyate /
yásya_agnihotrè 'dhíśrite śvā́_antarā́ dhā́vati /
rudráḥ khálu vā́ eṣáḥ /
yád agníḥ /
yád gā́m anvatyāvartáyet /
rudrā́ya paśū́n ápidadhyāt /
apaśúr yájamānaḥ syāt /
yád apò 'nvatiṣiñcét /
anādyám agnér ā́paḥ /
anādyám ābhyām ápidadhyāt /
gā́rhapatyād bhásma_ādā́ya /
idáṃ víṣṇur íti vaiṣṇavyā́_ṛcā_ā́havanī́yād dhvam̐sáyann úddravet /
yajñó vái víṣṇuḥ /
yajñénaivá yajñám̐ sáṃtanoti /
bhásmanā padám ápivapati śā́ntyai //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Baudhāyanaśrautasūtra — Baudhāyana, Sanskrit
- A Vedic Concordance — Maurice Bloomfield, English
- Altindische Grammatik — Jacob Wackernagel & Albert Debrunner, German
- The Inner Conflict of Tradition: Essays in Indian Ritual, Kingship, and Society — J. C. Heesterman, English
- Śrautasūtra (Baudhāyana) — Baudhāyana, Sanskrit