Pramāṇa · Search · About · API

Taittiriyabrahmana 1.4.4

Taittirīyabrāhmaṇa 1.4.4

Language
Sanskrit

1.4.4.1

ní vā́ etásya_āhavanī́yo gā́rhapatyaṃ kāmayate /
ní gā́rhapatya āhavanī́yam /
yásya_agním ánuddhṛtam̐ sū́ryo 'bhínimrócati /
darbhéṇa híraṇyaṃ prabádhya purástād dharet /
átha_agním /
átha_agnihotrám /
yád dhíraṇyaṃ purástād dhárati /
jyótir vái híraṇyam /
jyótir eváinaṃ páśyann úddharati /
yád agníṃ pū́rvam̐ háraty átha_agnihotrám //

1.4.4.2

bhāgadhéyenaiváinaṃ práṇayati /
brāhmaṇá ārṣeyá úddharet /
brāhmaṇó vái sárvā devátāḥ /
sárvābhir eváinaṃ devátābhir úddharati /
agnihotrám upasā́dya_ā́támitor āsīta /
vratám evá hatám ánumriyate /
ántaṃ vā́ eṣá ātmáno gacchati /
yás tā́myati /
ántam eṣá yajñásya gacchati /
yásya_agním ánuddhṛtam̐ sū́ryo 'bhínimrócati //

1.4.4.3

púnaḥ samánya juhoti /
ántenaivá_ántaṃ yajñásya níṣkaroti /
váruṇo vā́ etásya yajñáṃ gṛhṇāti /
yásya_agním ánuddhṛtam̐ sū́ryo 'bhinimrócati /
vāruṇáṃ carúṃ nírvapet /
ténaivá yajñáṃ níṣkrīṇīte /
ní vā́ etásya_āhavanī́yo gā́rhapatyaṃ kāmayate /
ní gā́rhapatya āhavanī́yam /
yásya_agním ánuddhṛtam̐ sū́ryo 'bhyùdéti /
caturgṛhītám ā́jyaṃ purástād dharet //

1.4.4.4

átha_agním /
átha_agnihotrám /
yád ā́jyaṃ purástād dhárati /
etád vā́ agnéḥ priyáṃ dhā́ma /
yád ā́jyam /
priyéṇaiváinaṃ dhā́mnā sámardhayati /
yád agníṃ pū́rvam̐ háraty átha_agnihotrám /
bhāgadhéyenaiváinaṃ práṇayati /
brāhmaṇá ārṣeyá úddharet /
brāhmaṇó vái sárvā devátāḥ //

1.4.4.5

sárvābhir eváinaṃ devátābhir úddharati /
párācī vā́ etásmai vyucchántī vyùcchati /
yásya_agním ánuddhṛtam̐ sū́ryo 'bhyùdéti /
uṣā́ḥ ketúnā juṣatām /
yajñáṃ devébhir /
devébhyo mádhumattamam̐ pratyáṅ niṣádya_ā́jyena juhuyāt /
pratī́cīm evā́smai vívāsayati /
agnihotrám upasā́dya_ā́támitor āsīta /
vratám evá hatám ánumriyate /
ántaṃ vā́ eṣá ātmáno gacchati //

1.4.4.6

yás tā́myati /
ántam eṣá yajñásya gacchati /
yásya_agním ánuddhṛtam̐ sū́ryo 'bhyùdeti /
púnaḥ samánya juhoti /
ántenaivá_antaṃ yajñásya níṣkaroti /
mitró vā́ etásya yajñáṃ gṛhṇāti /
yásya_agním ánuddhṛtam̐ sū́ryo 'bhyùdéti /
maitráṃ carúṃ nírvapet /
ténaivá yajñáṃ níṣkrīṇīte /
yásya_āhavanī́yé 'nudvāte gā́rhapatya udvā́yet //

1.4.4.7

yád āhavanī́yam ánudvāpya gā́rhapatyaṃ mánthet /
vícchindyāt /
bhrā́tṛvyam asmai janayet /
yád vái yajñásya vāstavyàṃ kriyáte /
tád ánu rudró 'vacarati /
yát pū́rvam anvavasyét /
vāstavyàm agním úpāsīta /
rudrò 'sya paśū́n ghā́tukaḥ syāt /
āhavanī́yam udvā́pya /
gā́rhapatyaṃ manthet //

1.4.4.8

itáḥ prathamáṃ jajñe agníḥ /
svā́d yóner ádhi jātávedāḥ /
sá gāyatriyā́ triṣṭúbhā jágatyā /
devébhyo havyáṃ vahatu prajānánn íti /
chándobhir eváinam̐ svā́d yóneḥ prájanayati /
gā́rhapatyaṃ manthati /
gā́rhapatyaṃ vā́ ánv ā́hitāgneḥ paśáva úpatiṣṭhante /
sá yád udvā́yati /
tád ánu paśávo 'pakrāmanti /
iṣé rayyái ramasva //

1.4.4.9

sáhase dyumnā́ya /
ūrjé 'pátyāya_íty āha /
paśávo vái rayíḥ /
paśū́n evā́smai ramayati /
sārasvatáu tvā_útsau sámindhātām íty āha /
ṛksāmé vái sārasavatā́v útsau /
ṛksāmā́bhyām eváinam̐ sámindhe /
samrā́ḍ asi virā́ḍ asi_íty āha /
rathantaráṃ vái samrā́ṭ /
bṛhád virā́ṭ //

1.4.4.10

tā́bhyām eváinam̐ sámindhe /
vájro vái cakrám /
vájro vā́ etásya yajñáṃ vícchinatti /
yásya_áno vā rátho vā_ántarā_ágnī́ yā́ti /
āhavanī́yam udvā́pya /
gā́rhapatyād úddharet /
yád agne pū́rvaṃ prábhṛtaṃ padám̐ hí te /
sū́ryasya raśmī́n ánv ātatā́na /
tátra rayiṣṭhā́m ánu sáṃbhara_etám /
sáṃ naḥ sṛja sumatyā́ vā́javatyā_íti //
pū́rveṇa_evā́sya yajñéna yajñám ánu sáṃtanoti /
tvám agne sapráthā asi_íty āha /
agníḥ sárvā devátāḥ /
devátābhir evá yajñám̐ sáṃtanoti /
agnáye pathikṛ́te puroḍā́śam aṣṭā́kapālaṃ nírvapet /
agním evá pathikṛ́tam̐ svéna bhāgadhéyena_úpadhāvati /
sá eváinaṃ yajñíyaṃ pánthām ápinayati /
anaḍvā́n dákṣiṇā /
vahī́ hy eṣa sámṛddhyai //

Commentaries (5)

Linked texts (1)

Discussed in (2)