Taittiriyabrahmana 1.4.5
Taittirīyabrāhmaṇa 1.4.5
- Language
- Sanskrit
1.4.5.1
yásya prātaḥsavané sómo 'tirícyate /
mā́dhyandinam̐savanáṃ kāmáyamāno 'bhyátiricyate /
gáur dhayati marútām íti dháyadvatīṣu kurvanti /
hinásti vái sandhy ádhītam /
sandhí_íva khálu vā́ etát /
yát sávanasya_atirícyate /
yád dháyadvatīṣu kurvánti /
sandhéḥ śā́ntyai /
gāyatrám̐ sā́ma bhavati pañcadaśáḥ stómaḥ /
ténaivá prātaḥsavanā́n ná yanti //
1.4.5.2
marútvatīṣu kurvanti /
ténaivá mā́dhyandināt sávanān ná yanti /
hótuś camasám ánu_únnayante /
hótā_ánuśam̐sati /
madhyatá evá yajñám̐ samā́dadhāti /
yásya mā́dhyandine sávane sómo 'tirícyate /
ādityáṃ tṛtīyasavanáṃ kāmáyamāno 'bhyátiricyate /
gaurivītám̐ sā́ma bhavati /
átiriktaṃ vái gaurivītám /
átiriktaṃ yát sávanasya_atirícyate //
1.4.5.3
átiriktasya śā́ntyai /
báṇmahā́m̐ asi sūrya_íti kurvanti /
yásyaivá_ādityásya sávanasya kā́mena_atirícyate /
ténaiváinaṃ kā́mena sámardhayanti /
gaurivītám̐ sā́ma bhavati /
ténaivá mā́dhyandināt sávanān ná yanti /
saptadaśáḥ stómaḥ /
ténaivá tṛtīyasavanā́n ná yanti /
hótuś camasám ánu_únnayante /
hótā_anuśam̐sati //
1.4.5.4
madhyatá evá yajñám̐ samā́dadhāti /
yásya tṛtīyasavané sómo 'tirícyeta /
ukthyàṃ kurvīta /
yásya_ukthyè 'tirícyeta /
atirātráṃ kurvīta /
yásya_atirātrè 'tirícyeta /
tát tvái duṣprajñānám /
yájamānaṃ vā́ etát paśáva āsā́hya yanti /
bṛhát sā́ma bhavati /
bṛhád vā́ imā́m̐l lokā́n dādhāra /
bā́rhatāḥ paśávaḥ /
bṛhatā́_évā́smai paśū́n dādhāra /
śipiviṣṭávatīṣu kurvanti śipiviṣṭó vái devā́nāṃ puṣṭáṃ /
púṣṭyā_eváinam̐ sámardhayanti /
hótuś camasám ánu_únnayante /
hótā_ánuśam̐sati /
madhyatá evá yajñám̐ samā́dadhāti //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Linked texts (1)
- Baudhāyanaśrautasūtra — Baudhāyana, Sanskrit
Discussed in (2)
- Altindische Grammatik — Wackernagel & Debrunner 1896, German
- A Vedic Concordance — Bloomfield 1906, English