Pramāṇa · Search · About · API

Taittiriyabrahmana 1.4.6

Taittirīyabrāhmaṇa 1.4.6

Language
Sanskrit

1.4.6.1

ékaiko vái janátāyām índraḥ /
ékaṃ vā́ etā́v índram abhí sám̐sunutaḥ /
yáu dváu sám̐sunutáḥ /
prajā́patir vā́ eṣá vitāyate /
yád yajñáḥ /
tásya grā́vāṇo dántāḥ /
anyataráṃ vā́ eté sám̐sunvatór nírbapsati /
pū́rveṇa_upasṛ́tyā devátā íty āhuḥ /
pūrvopasṛtásya vái śréyān bhavati /
étivanty ā́jyāni bhavanty abhíjityai //

1.4.6.2

marútvatīḥ pratipádaḥ /
marúto vái devā́nām áparājitam āyátanam /
devā́nām evá_aparājita āyátane yatate /
ubhé bṛhadrathantaré bhavataḥ /
iyáṃ vā́va rathantarám /
asáu bṛhát /
ābhyā́m eváinam antáreti /
vācáś ca mánasaś ca /
prāṇā́c ca_apānā́c ca /
diváś ca pṛthivyā́ś ca //

1.4.6.3

sárvasmād vittā́d védyāt /
abhivartó brahmásāmaṃ bhavati /
suvargásya lokásya_abhívṛttyai /
abhijíd bhavati /
suvargásya lokásya_abhíjityai /
viśvajíd bhavati /
víśvasya jítyai /
yásya bhū́yām̐so yajñakratáva íty āhuḥ /
sá devátā vṛṅkta íti /
yády agniṣṭomáḥ sómaḥ parástāt syā́t //

1.4.6.4

ukthyàṃ kurvīta /
yády ukthyàḥ syāt /
atirātráṃ kurvīta /
yajñakratúbhir evā́sya devátā vṛṅkte /
yó vái chándobhir abhibhávati /
sá saṃsunvatór abhíbhavati /
saṃveśā́ya tvā_upaveśā́ya tvā_íty āha /
chándām̐si vái saṃveśá upaveṣáḥ /
chándobhir evā́sya chándām̐sy abhíbhavati /
iṣṭárgo vā́ ṛtvíjām adhvaryúḥ //

1.4.6.5

iṣṭárgaḥ khálu vái pū́rvo 'rṣṭúḥ kṣīyate /
prā́ṇāpānau mṛtyór mā pātam íty āha /
prāṇāpānáyorevá śrayate /
prā́ṇāpānau mā́ mā hāsiṣṭam íty āha /
náinaṃ purā́_ā́yuṣaḥ prāṇāpānáu jahitaḥ /
ā́rtiṃ vā́ eté níyanti /
yéṣāṃ dīkṣitā́nāṃ pramī́yate /
táṃ yád avavárjeyuḥ /
krūrakṛ́tām ivaiṣāṃ lokáḥ syāt /
ā́hara dahá_íti brūyāt //

1.4.6.6

táṃ dakṣiṇató védyai nidhā́ya /
sarparājñíyā ṛgbhíḥ stuyuḥ /
iyáṃ vái sárpato rā́jñī /
asyā́ eváinaṃ páridadati /
vyṛ̀ddhaṃ tád íty āhuḥ /
yát stutám ánanuśastam íti /
hótā prathamáḥ pracīnāvītī́ mārjālī́yaṃ párīyāt /
yāmī́r anubruván /
sarparājñīnāṃ kīrtayet /
ubháyor eváinaṃ lokáyoḥ páridadati //

1.4.6.7

átho dhuvánty eváinam /
átho nyè vāsmai hnuvate /
tríḥ páriyanti /
tráya imé lokā́ḥ /
ebhyá eváinaṃ lokébhyo dhuvate /
tríḥ púnaḥ páriyanti /
ṣáṭ sáṃpadyante /
ṣáḍ vā́ ṛtávaḥ /
ṛtúbhir eváinaṃ dhuvate /
ágna ā́yūm̐ṣi pavasa íti pratipádaṃ kurvīran /
rathantarásāma_eṣām̐ sómaḥ syāt /
ā́yur evá_ātmán dadhate /
átho pāpmā́nam evá vijáhato yanti //

Commentaries (4)

Linked texts (6)