Taittiriyabrahmana 1.4.7
Taittirīyabrāhmaṇa 1.4.7
- Language
- Sanskrit
1.4.7.1
asúryaṃ vā́ etásmād várṇaṃ kṛtvā́ /
paśávo vīryàm ápakrāmanti /
yásya yū́po viróhati /
tvāṣṭráṃ bahurūpam ā́labheta /
tváṣṭā vái rūpā́ṇām īśe /
yá evá rūpā́ṇām ī́śe /
sò 'smín paśū́n vīryàṃ yacchati /
ná_asmāt paśávo vīryàm ápa krāmanti /
ā́rtiṃ vā́ eté níyanti /
yéṣāṃ dīkṣitā́nām agnír udvā́yati //
1.4.7.2
yád āhavanī́ya udvā́yet /
yát táṃ mánthet /
vícchindyāt /
bhrā́tṛvyam asmai janayet /
yád āhavanī́ya udvā́yet /
ā́gnīdhrād úddharet /
yád āgnīdhra udvā́yet /
gā́rhapatyād úddharet /
yád gā́rhapatya udvā́yet /
áta evá púnar manthet //
1.4.7.3
átra vā́vá sá nílayate /
yátra khálu vái nílīnam uttamáṃ páśyanti /
tádenam icchanti /
yásmād dā́ror udvā́yet /
tásya_aráṇī kuryāt /
krumukám ápi kuryāt /
eṣā́ vā́ agnéḥ priyā́ tanū́ḥ /
yát krumukáḥ /
priyáyā_eváinaṃ tanúvā sámardhayati /
gā́rhapatyaṃ manthati //
1.4.7.4
gā́rhapatyo vā́ agnér yóniḥ /
svā́d eváinaṃ yóner janayati /
ná_asmai bhrā́tṛvyaṃ janayati /
yásya sóma upadásyet /
suvárṇam̐ híraṇyaṃ dvedhā́ vicchídya /
ṛjīṣè 'nyád ādhūnuyā́t /
juhuyā́d anyát /
sómam evá_abhiṣuṇóti /
sómaṃ juhoti /
sómasya vā́ abhiṣūyámāṇasya priyā́ tanū́r údakrāmat //
1.4.7.5
tát suvárṇam̐ híraṇyam abhavat /
yát suvárṇam̐ híraṇyaṃ kurvánti /
priyáyā_eváinaṃ tanúvā sámardhayanti /
yásya_ákrītam̐ sómam apaháreyuḥ /
krīṇīyā́d evá /
sā́_evá tátaḥ prā́yaścittiḥ /
yásya krītám apaháreyuḥ /
ādārā́m̐śca phālgunā́ni ca_abhíṣuṇuyāt /
gāyātrī́ yám̐ sómam ā́harat /
tásya yó 'm̐śuḥ parā́patat //
1.4.7.6
tá ādārā́ abhavan /
índro vṛtrám ahan /
tásya valkáḥ párāpatat /
tā́ni phālgunā́ny abhavan /
paśávo vái phālgunā́ni /
paśávaḥ sómo rā́jā /
yád ādārā́m̐ś ca phālgunā́ni ca_abhiṣuṇoti /
sómam evá rā́jānamabhíṣuṇoti /
śṛténa prātaḥsavané śrīṇīyāt /
dadhnā́ madhyáṃdine //
1.4.7.7
nītamiśréṇa tṛtīyasavané /
agiṣṭomáḥ sómaḥ syād rathantarásāmā /
yá evá_ṛtvíjo vṛtā́ḥ syúḥ /
tá enaṃ yājayeyuḥ /
ékāṃ gā́ṃ dákṣiṇāṃ dadyāt tébhya evá /
púnaḥ sómaṃ krīṇīyāt /
yajñénaivá tád yajñám icchati /
sā́_eva tátaḥ prā́yaścittiḥ /
sárvābhyo vā́ eṣá devátābhyaḥ sárvebhyaḥ pṛṣṭhébhya ātmā́nam ā́gurate /
yáḥ sattrā́ya_āguráte /
etā́vān khálu vái púruṣaḥ /
yā́vad asya vittám /
sarvavedaséna yajeta /
sárvapṛṣṭho 'sya sómaḥ syāt /
sárvābhya evá devátābhyaḥ sárvebhyaḥ pṛṣṭhébhya ātmā́naṃ níṣkrīṇīte //
Commentaries (5)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇaṭīkā — Sanskrit
- Yajurbrahmaṇabhāṣya — Sāyaṇācārya, Sanskrit
Linked texts (4)
- Baudhāyanaśrautasūtra — Baudhāyana, Sanskrit
- Vedic Index of Names and Subjects — Arthur A. Macdonell & A. Berriedale Keith, English
- The Religion and Philosophy of the Veda and Upanishads — Arthur Berriedale Keith, English
- Vedic Mythology — Arthur Anthony Macdonell, English