Pramāṇa · Search · About · API

Taittiriyabrahmana 1.4.8

Taittirīyabrāhmaṇa 1.4.8

Language
Sanskrit

1.4.8.1

pávamānaḥ súvarjánaḥ /
pavítreṇa vícarṣaṇiḥ /
yáḥ pótā sá punātu mā /
punántu mā devajanā́ḥ /
punántu mánavo dhiyā́ /
punántu víśva āyávaḥ /
jā́tavedaḥ pavítravat /
pavítreṇa punāhi mā /
śukréṇa deva dī́dyat /
ágne krátvā krátūm̐ ránu //

1.4.8.2

yát te pavítram arcíṣi /
ágne vítatam antarā́ /
bráhma téna punīmahe /
ubhā́bhyāṃ deva savitaḥ /
pavítreṇa savéna ca /
idáṃ bráhma punīmahe /
vaiśvadevī́ punatī́ devy ā́gāt /
yásyai bahvī́s tanúvo vītápṛṣṭhāḥ /
táyā mádantaḥ sadha mā́dyeṣu /
vayám̐ syāma pátayo rayīṇā́m //

1.4.8.3

vaiśvānaró raśmíbhir mā punātu /
vā́taḥ prāṇéna_īṣiró mayobhū́ḥ /
dyā́vāpṛthivī́ páyasā páyobhiḥ /
ṛtā́varī yajñíye mā punītām /
bṛhádbhiḥ savitas tṛ́bhiḥ /
várṣiṣṭhair deva mánmabhiḥ /
ágne dákṣaiḥ punāhi mā /
yéna devā́ ápunata /
yéna_ā́po divyáṃ káśaḥ /
téna divyéna bráhmaṇā //

1.4.8.4

idáṃ bráhma punīmahe /
yáḥ pāvamānī́r adhyéti /
ṛ́ṣibhiḥ sáṃbhṛtam̐ rásam /
sárvam̐ sá pūtám aśnāti /
svaditáṃ mātaríśvanā /
pāvamānī́r yó adhyéti /
ṛ́ṣibhiḥ sáṃbhṛtam̐ rásam /
tásmai sárasvatī duhe /
kṣīrám̐ sarpír mádhūdakam /
pāvamānī́ḥ svastyáyanīḥ //

1.4.8.5

sudúghā hí páyasvatīḥ /
ṛ́ṣibhiḥ sáṃbhṛto rásaḥ /
brāhmaṇéṣv amṛ́tam̐ hitám /
pāvamānī́r diśantu naḥ /
imáṃ lokám átho amúm /
kā́mān sámardhayantu naḥ /
devī́r deváiḥ samā́bhṛtāḥ /
pāvamānī́ḥ svastyáyanīḥ /
sudúghā hí ghṛtaścútaḥ /
ṛ́ṣibhiḥ sámbhṛto rásaḥ //

1.4.8.6

brāhmaṇéṣv amṛ́tam̐ hitám /
yéna devā́ḥ pavítreṇa /
ātmā́naṃ punáte sádā /
téna sahásradhāreṇa /
pāvamānyáḥ punantu /
prājāpatyáṃ pavítram /
śata_údyāmam̐ hiraṇmáyam /
téna brahmavído vayám /
pūtáṃ bráhma punīmahe /
índraḥ sunītī́ sahá mā punātu /
sómaḥ svastyā́ váruṇaḥ samī́cyā /
yamó rā́jā pramṛṇā́bhiḥ punātu mā /
jātávedā mā_ūrjáyantyā punātu //

Commentaries (4)

Linked texts (3)