Taittiriyabrahmana 1.4.9
Taittirīyabrāhmaṇa 1.4.9
- Language
- Sanskrit
1.4.9.1
prajā́ vái satrám āsata tápas tápyamānā ájuhvatīḥ /
devā́ apaśyaṃ camasáṃ ghṛtásya pūrṇám̐ svadhā́m /
tám úpa_údatiṣṭhantám ajuhavuḥ /
téna_ardhamāsá ū́rjam ávārundhata /
tásmād ardhamāsé devā́ ijyante /
pitáro 'paśyaṃ camasáṃ ghṛtásya pūrṇám̐ svadhā́m /
tám úpa_údatiṣṭhantám ajuhavuḥ /
téna māsyū́rjam ávārundhata /
tásmān māsí pitṛ́bhyaḥ kriyate /
manuṣyā̀ apaśyaṃ camasáṃ ghṛtásya pūrṇám̐ svadhā́m //
1.4.9.2
tám úpa_údatiṣṭhantám ajuhavuḥ /
téna dvayī́m ū́rjam ávārundhata /
tásmād dvír áhno manuṣyèbhya úpahriyate /
prātáś ca sāyáṃ ca /
paśávo 'paśyaṃ camasáṃ ghṛtásya pūrṇám̐ svadhā́m /
tám úpa_údatiṣṭhantám ajuhavuḥ /
téna trayī́m ū́rjam ávārundhata /
tásmāt trír áhnaḥ paśávaḥ prérate /
prātáḥ saṃgavé sāyám /
ásurā apaśyaṃ camasáṃ ghṛtásya pūrṇám̐ svadhā́m //
1.4.9.3
tám úpa_údatiṣṭhantám ajuhavuḥ /
téna saṃvatsará ū́rjam ávārundhata /
té devā́ amanyanta /
amī́ vā́ idám abhūvan /
yád vayám̐ smá íti /
tá etā́ni cāturmāsyā́ny apaśyan /
tā́ni níravapan /
táir eváiṣāṃ tā́m ū́rjam avṛñjata /
táto devā́ ábhavan /
párā_ásurāḥ //
1.4.9.4
yád yájate /
yā́m evá devā́ ū́rjam avā́rundhata /
tā́ṃ téna_ávarundhe /
yát pitṛ́bhyaḥ karóti /
yā́m evá pitára ū́rjam avā́rundhata /
tā́ṃ téna_avarundhe /
yád āvasathé 'nnam̐ háranti /
yā́m evá manuṣyā̀ ū́rjam avā́rundhata /
tā́ṃ téna_ávarundhe /
yád dákṣiṇāṃ dádāti //
1.4.9.5
yā́m evá paśáva ū́rjam avā́rundhata /
tā́ṃ téna_ávarundhe /
yác cāturmāsyáir yájate /
yā́m evá_asurā ū́rjam avā́rundhata /
tā́ṃ téna_ávarundhe /
bhávaty ātmánā /
párā_asya bhrā́tṛvyo bhavati /
virā́jo vā́ eṣā́ víkrāntiḥ /
yác cāturmāsyā́ni /
vaiśvadevéna_asmím̐l loké prátyatiṣṭhat /
varuṇapraghāsáir antárikṣe /
sākamedháir amúṣmim̐l loké /
eṣá hatvā́vái tát sárvaṃ bhavati /
yá eváṃ vidvā́m̐ś cāturmāsyáir yájate //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- Vedic Index of Names and Subjects — Arthur A. Macdonell & A. Berriedale Keith, English