Pramāṇa · Search · About · API

Taittiriyabrahmana 1.5.1

Taittirīyabrāhmaṇa 1.5.1

Language
Sanskrit

1.5.1.1

agnéḥ kṛ́ttikāḥ /
śukráṃ parástāt_ jyótir avástāt /
prajā́pate rohiṇī́ /
ā́paḥ parástād óṣadhayo 'vástāt /
sómasya_invakā́ /
vítatāni parástād váyanto 'vástāt /
rudrásya bāhū́ /
mṛgayávaḥ parástād vikṣārò 'vástāt /
ádityai púnarvasū /
vā́taḥ parástād ārdrám avástāt //

1.5.1.2

bṛ́haspátes tiṣyàḥ /
júhvataḥ parástād yájamānā avástāt /
sarpā́ṇām āśreṣā́ḥ /
abhyāgácchantaḥ parástād abhyānṛ́tyanto 'vástāt /
pitṛṇāṃ maghā́ḥ /
rudántaḥ parástād apabhram̐śò 'vástāt /
aryamṇáḥ pū́rve phálgunī /
jāyā́ parástād ṛṣabhò 'vástāt /
bhágasya_úttare /
vahatávaḥ parástād váhamānā avástāt //

1.5.1.3

devásya savitúr hástaḥ /
prasaváḥ parástāt sanír avástāt /
índrasya citrā́ /
ṛtáṃ parástāt satyám avástāt /
vāyór níṣṭyā /
vratátiḥ parástād ásiddhir avástāt /
indrāgniyór víśākhe /
yugā́ni parástāt kṛṣámāṇā avástāt /
mitrásya_anūrādhā́ḥ /
abhyāróhat parástād abhyā́rūḍham avástāt //

1.5.1.4

índrasya rohiṇī́ /
śṛṇát parástāt pratiśṛṇád avástāt /
nírṛtyai mūlavárhaṇī /
pratibhañjántaḥ parástāt pratiśṛṇánto 'vástāt /
apā́ṃ pū́rvā aṣāḍhā́ḥ /
várcaḥ parástāt sámitir avástāt /
víśveṣāṃ devā́nām úttarāḥ /
abhijáyat parástād abhíjitam avástāt /
víṣṇoḥ śroṇā́ /
pṛcchámānāḥ parástāt pánthā avástāt //

1.5.1.5

vásūnām̐ śráviṣṭhāḥ /
bhūtáṃ parástād bhū́tir avástāt /
índrasya śatábhiṣak /
viśvávyacāḥ parástād viśvákṣitir avástāt /
ajásya_ékapadaḥ pū́rve proṣṭhapadā́ḥ /
vaiśvānaráṃ parástād vaiśvāvasavám avástāt /
áher budhníyasya_úttare /
abhiṣiñcántaḥ parástād abhiṣuṇvánto 'vástāt /
pūṣṇó revátī /
gā́vaḥ parástād vatsā́ avástāt /
aśvínor aśvayújau /
grā́maḥ parástāt sénā_avástāt /
yamásya_apabháraṇīḥ /
apakárṣantaḥ parástād apaváhanto 'vástāt /
pūrṇā́ paścā́d yát te devā́ ádadhuḥ //

Commentaries (4)

Linked texts (4)