Pramāṇa · Search · About · API

Taittiriyabrahmana 1.5.2

Taittirīyabrāhmaṇa 1.5.2

Language
Sanskrit

1.5.2.1

yát púṇyaṃ nákṣatram /
tád báṭ kurvīta_upavyuṣám /
yadā́ vái sū́rya udéti /
átha nákṣatraṃ ná_eti /
yā́vati tátra sū́ryo gácchet /
yátra jaghanyàṃ páśyet /
tā́vati kurvīta yatkārī́ syāt /
puṇyāhá evá kurute /
evám̐ ha vái yajñéṣuṃ ca śatádyumnaṃ ca mātsyó niravasāyayā́ñ cakāra //

1.5.2.2

yó vái nakṣatríyaṃ prajā́patiṃ véda /
ubháyor enaṃ lokáyor viduḥ /
hásta evá_asya hástaḥ /
citrā́ śíraḥ /
níṣṭyā́ hṛ́dayam /
ūrū́ víśākhe /
pratiṣṭhā́_anūrādhā́ḥ /
eṣá vái nakṣatríyaḥ prajā́patiḥ /
yá eváṃ véda /
ubháyor enaṃ lokáyor viduḥ //

1.5.2.3

asmím̐ś ca_amúṣmím̐ś ca /
yā́ṃ kāmáyeta duhitáraṃ praiyā́ syād íti /
tā́ṃ níṣṭyāyāṃ dadyāt /
priyā́_evá bhavati /
tú púnar ā́gacchati /
abhijít_ nā́ma nákṣatram /
upáriṣṭād aṣāḍhā́nām /
avástāt_śroṇā́yai /
devāsurā́ḥ sáṃyattā āsan /
té devā́s tásmin nákṣatre 'bhyajayan //

1.5.2.4

yád abhyájayan /
tád abhijíto 'bhijittvám /
yáṃ kāmayeta_anapajayyáṃ jayed íti /
tám etásmin nákṣatre yātayet /
anapajayyám evá jayati /
pāpáparājitam iva tú /
prajā́patiḥ paśū́n asṛjata /
té nákṣatraṃnakṣatram úpātiṣṭhanta /
té samā́vanta evá_abhavan /
té revátīm úpātiṣṭhanta //

1.5.2.5

té revátyāṃ prā́bhavan /
tásmād revátyāṃ paśūnā́ṃ kurvīta /
yát kíṃ ca_arvācī́nam̐ sómāt /
prá_evá bhavanti /
saliláṃ vā́ idám antarā́sīt /
yád ataran /
tát tā́rakāṇāṃ tārakatvám /
yó vā́ ihá yájate /
amúm̐ sá lokáṃ nakṣate /
tán nákṣatrāṇāṃ nakṣatratvám //

1.5.2.6

devagṛhā́ vái nákṣatrāṇi /
yá eváṃ véda /
gṛhy èvá bhavati /
yā́ni vā́ imā́ni pṛthivyā́ś citrā́ṇi /
tā́ni nákṣatrāṇi /
tásmād aślīlánāmam̐ś citré /
ná_āvasyen ná yajeta /
yáthā pāpāhé kurute /
tādṛ́g evá tát /
devanakṣatrā́ṇi vā́ anyā́ni //

1.5.2.7

yamanakṣattrā́ṇy anyā́ni /
kṛ́ttikāḥ prathamám /
víśākhe uttamám /
tā́ni devanakṣatrā́ṇi /
anūrādhā́ḥ prathamám /
apabháraṇīr uttamám /
tā́ni yamanakṣatrā́ṇi /
yā́ni devanakṣatrā́ṇi /
tā́ni dákṣiṇena páriyanti /
yā́ni yamanakṣatrā́ṇi //

1.5.2.8

tā́ny úttareṇa /
ánv eṣām arātsma_íti /
tád anūrādhā́ḥ /
jyeṣṭhám eṣām avadhiṣma_íti /
táj jyeṣṭhaghnī́ /
mū́lam eṣām avṛkṣāma_íti /
tán mūlabárhaṇī /
yán ná_asahanta /
tád aṣāḍhā́ḥ /
yád áśloṇat //

1.5.2.9

tát_śroṇā́ /
yád áśṛṇot /
tát_śráviṣṭhāḥ /
yát_śatám ábhiṣajyan /
tát_śatábhiṣak /
proṣṭhapadéṣu_údayacchanta /
revátyām aravanta /
aśvayújor ayuñjata /
apabháraṇīṣv ápāvahan /
tā́ni vā́ etā́ni yamanakṣatrā́ṇi /
yā́ny evá devanakṣatrā́ṇi /
téṣu kurvīta yatkārī́ syā́t /
puṇyāhá evá kurute //

Commentaries (4)

Linked texts (8)